Zəfərdən Quruculuğa: VIII Qurultay və Azərbaycanın yeni inkişaf hədəfləri - ŞƏRH

2026-cı il oktyabrın 2-də keçirilən Yeni Azərbaycan Partiyasının VIII Qurultayı Azərbaycanın ictimai-siyasi həyatında yeni mərhələnin müzakirə olunduğu mühüm tədbirlərdən biri kimi yadda qaldı. Qurultayda Azərbaycan Respublikasının Prezidenti, Yeni Azərbaycan Partiyasının Sədri İlham Əliyevin çıxışında partiyanın keçdiyi tarixi yol, dövlətçiliyin möhkəmləndirilməsi, suverenlikdən sonrakı inkişaf mərhələsi, Qarabağ və Şərqi Zəngəzurda aparılan quruculuq işləri, Böyük Qayıdış proqramı və ideoloji fəaliyyətin müasir çağırışlara uyğun qurulması əsas mövzular kimi təqdim olundu. Çıxışda vurğulanan əsas məqamlardan biri VIII Qurultayın Azərbaycanın ərazi bütövlüyünü və suverenliyini tam bərpa etməsindən sonra keçirilən ilk qurultay olması idi. Bu baxımdan tədbir yalnız ötən dövrün nəticələrinin qiymətləndirilməsi deyil, həm də qarşıdakı mərhələnin prioritetlərinin müəyyənləşdirilməsi baxımından proqram xarakteri daşıyırdı. Prezident çıxışında Yeni Azərbaycan Partiyasının 1992-ci ildə yaranmasından ötən müddətdə keçdiyi siyasi inkişaf yoluna toxunaraq, dövlətçiliyin möhkəmləndirilməsi, siyasi sabitliyin qorunması və müstəqilliyin gücləndirilməsi məsələlərini tarixi kontekstdə şərh etdi. Nitqdə Ümummilli Lider Heydər Əliyevin dövlətçilik irsinin davamlılığına xüsusi diqqət yetirildi və bu siyasi xəttin yeni dövrün çağırışlarına uyğun şəkildə davam etdirildiyi bildirildi. Qurultayda ölkədə həyata keçirilən siyasi islahatların davam etdirilməsi də diqqət mərkəzində idi. Dövlət idarəçiliyinin təkmilləşdirilməsi, ictimai-siyasi institutların müasir tələblərə uyğun inkişafı və dəyişən geosiyasi şəraitə uyğun fəaliyyət prinsiplərinin formalaşdırılması çıxışın əsas istiqamətlərindən biri kimi təqdim edildi.

Çıxışın mühüm hissəsi Qarabağ və Şərqi Zəngəzurda aparılan genişmiqyaslı bərpa və yenidənqurma işlərinə həsr olunmuşdu. Azad edilmiş ərazilərdə şəhər və kəndlərin yenidən qurulması, müasir infrastruktur layihələrinin icrası, yolların, enerji obyektlərinin, sosial və təhsil müəssisələrinin tikintisi Böyük Qayıdış proqramının əsas istiqamətləri sırasında göstərildi. Bu layihələrin keçmiş məcburi köçkünlərin doğma yurdlarına qayıdışına şərait yaratdığı qeyd olundu. 
Qurultay nitqində ideoloji fəaliyyətin müasir informasiya mühitinin tələblərinə uyğun qurulması ayrıca vurğulandı. Prezident İlham Əliyev formal yanaşmalardan uzaqlaşaraq daha çevik və müasir ideoloji işin aparılmasının vacibliyini qeyd etdi. Çıxışda gənclərlə işin, düzgün informasiya siyasətinin və milli dəyərlərin qorunmasının yeni mərhələdə xüsusi əhəmiyyət daşıdığı bildirildi.
Gənclərin vətənpərvərlik, milli-mənəvi dəyərlər və azərbaycançılıq ruhunda tərbiyəsi də çıxışın önəmli istiqamətlərindən biri idi. Bu kontekstdə təhsil, maarifləndirmə və ideoloji fəaliyyətin qarşılıqlı əlaqəsinin gücləndirilməsinin vacibliyi vurğulandı. Çıxışda müasir informasiya məkanında milli maraqların qorunmasının yalnız təhlükəsizlik deyil, həm də ideoloji dayanıqlıq məsələsi kimi qiymətləndirildiyi ifadə olundu.
VIII Qurultayda səsləndirilən fikirlər ümumilikdə Azərbaycanın suverenlikdən sonrakı inkişaf mərhələsində dövlətçilik, iqtisadi inkişaf, quruculuq, Böyük Qayıdış, gənclər siyasəti və ideoloji fəaliyyət kimi istiqamətlərin qarşıdakı dövrün əsas prioritetləri kimi təqdim edildiyini göstərdi. Bu baxımdan qurultayda müəyyənləşdirilən mövzular Azərbaycanın yeni tarixi mərhələsinə dair strateji baxışın əsas elementləri kimi diqqət çəkdi.

Həqiqət Şükürova

YAP Kəlbəcər rayon Ərazi Partiya Təşkilatının sədri

Bakı şəhər Suraxanı rayon 346 nömrəli tam orta ümumtəhsil məktəbin direktoru