Mədəniyyətlərarası dialoq – ortaq gələcəyə aparan mühüm yol - ŞƏRH

Cənab Prezident İlham Əliyevin 2026-cı il oktyabrın 27-də Bakıda keçirilən VII Ümumdünya Mədəniyyətlərarası Dialoq Forumundakı çıxışı beynəlxalq əməkdaşlığın və qarşılıqlı anlaşmanın əhəmiyyətini bir daha ön plana çəkdi.
Müasir dünyada münaqişələrin, dini və etnik zəmində qarşıdurmaların, dözümsüzlük hallarının artdığı bir dövrdə xalqlar və sivilizasiyalar arasında qarşılıqlı anlaşmanın, etimadın və əməkdaşlığın gücləndirilməsi xüsusi əhəmiyyət daşıyır. Mədəniyyətlərarası dialoqun təşviqi, müxtəlif mədəniyyətlərin və dinlərin nümayəndələri arasında sağlam münasibətlərin qurulması beynəlxalq təhlükəsizliyin və davamlı inkişafın vacib şərtlərindəndir.
2026-cı il oktyabrın 27-də Bakıda “Ortaq gələcək naminə dialoq” mövzusunda keçirilən VII Ümumdünya Mədəniyyətlərarası Dialoq Forumunda Azərbaycan Respublikasının Prezidenti, Yeni Azərbaycan Partiyasının sədri cənab İlham Əliyevin çıxışı bu baxımdan mühüm mesajlarla yadda qaldı. Dövlət başçısı forumun beynəlxalq əhəmiyyətini vurğulayaraq bildirdi ki, Ümumdünya Mədəniyyətlərarası Dialoq Forumu mədəniyyətlərarası münasibətləri və digər əlaqədar məsələləri müzakirə etmək, onların həlli yollarını müəyyənləşdirmək üçün olduqca səmərəli və əhatəli platformalardan birinə çevrilmişdir.
2011-ci ildə Azərbaycanın təşəbbüsü ilə əsası qoyulan bu beynəlxalq platforma ötən illər ərzində dünyanın müxtəlif ölkələrindən nümayəndələri bir araya gətirən mühüm dialoq məkanına çevrilib. Forum müxtəlif mədəniyyətlər və sivilizasiyalar arasında qarşılıqlı anlaşmanın gücləndirilməsinə, tolerantlıq və birgəyaşayış prinsiplərinin təşviqinə, qlobal problemlərin həlli istiqamətində əməkdaşlığın genişləndirilməsinə xidmət edir.
Azərbaycan tarixən müxtəlif sivilizasiyaların qovuşduğu, fərqli mədəniyyətlərin, dinlərin və etnik qrupların qarşılıqlı hörmət şəraitində yaşadığı məkan kimi tanınıb. Avropa ilə Asiyanın qovşağında yerləşən ölkəmiz əsrlər boyu Şərqlə Qərb arasında mədəni körpü rolunu oynayıb. Bu ənənələr xalqımızın həyat tərzində, milli-mənəvi dəyərlərində və ictimai münasibətlərində öz əksini tapıb.
Cənab Prezident İlham Əliyevin çıxışında Azərbaycanın çoxəsrlik multikulturalizm ənənələrinə, dini və etnik tolerantlıq mühitinə xüsusi diqqət yetirilməsi ölkəmizin bu sahədəki təcrübəsinin əhəmiyyətini bir daha göstərir. Azərbaycanda müxtəlif dinlərin və etnik qrupların nümayəndələri qarşılıqlı hörmət və anlaşma şəraitində yaşayırlar.
Multikulturalizm Azərbaycanda yalnız dövlət siyasətinin istiqaməti deyil, həm də xalqımızın tarixi təcrübəsindən və həyat tərzindən qaynaqlanan dəyərdir. Bu dəyərlərin qorunması cəmiyyətdə ictimai həmrəyliyin və qarşılıqlı etimadın möhkəmlənməsinə xidmət edir.
Cənab Prezident İlham Əliyevin çıxışında milli birlik və azərbaycançılıq ideyasının əhəmiyyəti də diqqət çəkən məqamlardandır. Azərbaycançılıq ideyası ölkəmizdə yaşayan bütün xalqları və etnik qrupları vahid milli məqsədlər ətrafında birləşdirən əsas dəyərlərdən biridir. Vətən müharibəsi zamanı müxtəlif etnik və dini mənsubiyyətə malik Azərbaycan vətəndaşlarının vahid amal uğrunda birləşməsi milli həmrəyliyin bariz nümunəsi oldu. Bu birlik Azərbaycanın suverenliyinin və ərazi bütövlüyünün bərpası ilə nəticələnən tarixi Zəfərin mühüm amillərindən biri idi.
Azərbaycanın təşəbbüsü ilə həyata keçirilən Bakı Prosesi də mədəniyyətlərarası dialoqun inkişafına mühüm töhfə verir. Bu təşəbbüs müxtəlif mədəniyyətlərin və sivilizasiyaların nümayəndələrini bir araya gətirərək qarşılıqlı etimadın möhkəmləndirilməsinə, ortaq problemlərin müzakirəsinə və əməkdaşlıq imkanlarının genişləndirilməsinə şərait yaradır.
Bu gün dünyada davam edən münaqişələr, dini və etnik zəmində ayrı-seçkilik, dözümsüzlük və qarşılıqlı etimadın azalması mədəniyyətlərarası dialoqun daha da gücləndirilməsini zəruri edir. Belə bir şəraitdə beynəlxalq platformaların fəaliyyəti, dövlətlər və xalqlar arasında açıq müzakirələrin aparılması, ortaq yanaşmaların müəyyənləşdirilməsi xüsusi əhəmiyyət daşıyır.
Azərbaycanın müxtəlif beynəlxalq tədbirlərə ev sahibliyi etməsi və fərqli mövqeləri təmsil edən nümayəndələri bir araya gətirməsi ölkəmizin dialoq və əməkdaşlıq platforması kimi rolunu genişləndirir. Ümumdünya Mədəniyyətlərarası Dialoq Forumu da bu istiqamətdə həyata keçirilən təşəbbüslərin mühüm nümunəsidir.
Cənab Prezident İlham Əliyevin VII Forumdakı çıxışı bir daha göstərdi ki, mədəniyyətlərarası dialoq yalnız humanitar sahəyə aid məsələ deyil. Bu, beynəlxalq təhlükəsizlik, siyasi sabitlik və davamlı inkişafla sıx bağlı olan mühüm prosesdir. Fərqli mədəniyyətlərin nümayəndələri arasında qarşılıqlı anlaşmanın gücləndirilməsi qlobal problemlərin həllinə, sülhün və təhlükəsizliyin təmin olunmasına töhfə verə bilər.
Nəticə etibarilə, “Ortaq gələcək naminə dialoq” mövzusunda keçirilən VII Ümumdünya Mədəniyyətlərarası Dialoq Forumu müxtəlif xalqlar və sivilizasiyalar arasında qarşılıqlı anlaşmanın möhkəmləndirilməsi baxımından mühüm əhəmiyyət daşıyır. Azərbaycanın ev sahibliyi etdiyi bu beynəlxalq tədbir ölkəmizin zəngin multikulturalizm ənənələrini və dialoq təşəbbüslərinə verdiyi önəmi bir daha nümayiş etdirir.
Bakıda keçirilən forumun əsas çağırışı fərqlilikləri qarşıdurma səbəbinə deyil, qarşılıqlı zənginləşmə və ortaq gələcəyin qurulması üçün imkanlara çevirməkdir. Çünki sülhə, etimada və əməkdaşlığa aparan yol məhz dialoqdan keçir.

Nicat Ələkbərov
YAP Şahbuz rayon təşkilatının sədri