Bakıdan dünyaya sülh və həmrəylik mesajı - ŞƏRH

VII Ümumdünya Mədəniyyətlərarası Dialoq Forumu bəşəriyyətin üz-üzə qaldığı mürəkkəb qlobal çağırışlar, artan gərginliklər və geosiyasi ziddiyyətlər fonunda sülh, qarşılıqlı anlaşma və həmrəylik ideyalarının təbliği baxımından növbəti tarixi mərhələyə çevrildi. 2026-cı il oktyabrın 27-də paytaxt Bakıda “Ortaq gələcək naminə dialoq” mövzusunda öz işinə başlayan bu möhtəşəm beynəlxalq platforma müxtəlif sivilizasiyaların, mədəniyyətlərin və dinlərin nümayəndələrini bir araya gətirməklə Azərbaycanın dünyadakı tolerantlıq və multikulturalizm mərkəzi kimi mövqeyini bir daha təsdiqlədi. Forumun açılış mərasimində dərin məzmunlu və proqram xarakterli çıxış edən Azərbaycan Respublikasının Prezidenti İlham Əliyev qlobal dialoqun inkişafı, müxtəlif xalqlar arasında etimadın bərpası və dayanıqlı sülhün bərqərar olunması ilə bağlı dövlətimizin strateji baxışını və qətiyyətli mövqeyini bütün dünyaya bəyan etdi. Ölkə başçısı öz nitqində Azərbaycanın əsrlər boyu müxtəlif mədəniyyətlərin və konfessiyaların dinc yanaşı yaşadığı, bir-birini zənginləşdirdiyi unikal bir məkan olduğunu vurğulayaraq, bu zəngin tarixi irsin müasir dövrdə də dövlət siyasətinin prioritet istiqamətini təşkil etdiyini bildirdi. Prezident İlham Əliyev qeyd etdi ki, müasir dünyada baş verən münaqişələrin və bölünmələrin qarşısını almağın yeganə yolu ksenofobiya, islamofobiya və digər ayrı-seçkilik təzahürlərinə qarşı birgə mübarizə aparmaq, mədəniyyətlərarası körpüləri möhkəmləndirməkdir. Çıxışda həmçinin regional təhlükəsizlik, Cənubi Qafqazda formalaşan yeni reallıqlar, sülh gündəliyinin irəliyə aparılması və Azərbaycanın beynəlxalq hüquqa, ədalətə əsaslanan xarici siyasəti xüsusi yer aldı. Dövlət başçısı nitqində xüsusilə vurğuladı ki, dünyada parçalanma və qarşıdurma meyllərinin artdığı bir şəraitdə beynəlxalq birliyin vahid dəyərlər ətrafında sıx birləşməsinə hər zamankından daha böyük ehtiyac duyulur. Ölkəmizin təşəbbüsü ilə formalaşan beynəlxalq platformaların coğrafiyasının ilbəil genişlənməsi Azərbaycanın sadəcə ev sahibliyi edən tərəf kimi deyil, eyni zamanda qlobal sülh və təhlükəsizlik gündəliyini formalaşdıran fəal aktora çevrildiyini aydın göstərir. Prezident İlham Əliyev diqqətə çatdırdı ki, müxtəlif mədəniyyətlərin nümayəndələri arasında açıq və səmimi ünsiyyətin qurulması strateji zərurətdir, çünki qarşılıqlı etimadın olmadığı bir mühitdə dayanıqlı inkişafa və təhlükəsizliyə nail olmaq qeyri-mümkündür. Çıxışda ikili standartların, ksenofobiyanın və neoimperialist təfəkkürün müasir beynəlxalq münasibətlər sisteminə vurduğu zərər dərin təhlil olundu, bəzi güc mərkəzlərinin ayırıcı xətlər çəkmək cəhdlərinin təhlükəli fəsadları barədə ciddi xəbərdarlıq edildi. Azərbaycan Lideri bildirdi ki, milli, dini və irqi fərqliliklər qarşıdurma vasitəsi deyil, bəşəriyyətin zənginliyi kimi qəbul edilməli, humanist dəyərlər siyasi konyunkturadan üstün tutulmalıdır. Cənubi Qafqazda bərqərar olan yeni geosiyasi reallıqlardan bəhs edən dövlət başçısı regionda ədalətli və uzunmüddətli sülhün təmin olunması istiqamətində atılan addımları, həmçinin Azərbaycanın təşəbbüskarı olduğu nəqliyyat və kommunikasiya layihələrinin xalqları bir-birinə yaxınlaşdıran mühüm vasitəyə çevrildiyini qeyd etdi. Bərpa edilən ərazilərdə həyata keçirilən genişmiqyaslı quruculuq işləri, tarixi-mədəni irsin dirçəldilməsi və regionun sülh zonasına çevrilməsi istiqamətində görülən tədbirlər forum iştirakçılarının xüsusi diqqətinə çatdırıldı. Prezidentin nitqində yer alan tezislər bir daha nümayiş etdirdi ki, mədəniyyətlərarası dialoq yalnız nəzəri ideya deyil, həm də konkret siyasi, iqtisadi və mənəvi əməkdaşlıq mexanizmləri ilə dəstəklənən canlı prosesdir.
VII Ümumdünya Mədəniyyətlərarası Dialoq Forumu və burada səslənən ali fikirlər bəşəriyyətin sülh içində gələcək qurması üçün aydın bir yol xəritəsidir. Azərbaycanın irəli sürdüyü qlobal təşəbbüslər və dövlətimizin nümayiş etdirdiyi prinsipial möqey bir daha göstərir ki, gücün hüququ deyil, hüququn və mənəvi dəyərlərin üstünlüyü beynəlxalq birliyin əsas prinsipi olmalıdır. Bakı platformasından verilən mesajlar gələcək nəsillərə daha təhlükəsiz, ədalətli və dözümlü bir dünya irs qoymaq məsuliyyətini bir daha xatırlatdı. Prezident İlham Əliyevin proqram xarakterli çıxışı isə təkcə forumun işinə deyil, ümumilikdə sivilizasiyalararası münasibətlərin gələcək inkişaf vektoruna uzunmüddətli və dərin töhfə kimi dəyərləndirilməlidir.

Türkanə Kərimova

YAP Babək rayon təşkilatının əməkdaşı