“Şuşa Zəfəri – Milli Qürurumuzun, Tarixi Qələbəmizin Zirvəsi” - ŞƏRH

Azərbaycan xalqının tarixində elə günlər var ki, həmin günlər yalnız təqvimdə bir tarix deyil, milli qürurun, birliyin, qəhrəmanlığın və tarixi ədalətin təntənəsinə çevrilir. 8 Noyabr – Şuşa Şəhəri Günü də xalqımızın yaddaşına qızıl hərflərlə yazılmış belə əlamətdar günlərdəndir. Bu tarix 2020-ci ildə 44 günlük Vətən müharibəsində Azərbaycan Ordusunun qazandığı möhtəşəm Qələbənin, milli iradənin və sarsılmaz vətənpərvərliyin rəmzidir.
Şuşa Azərbaycan xalqı üçün sadəcə bir şəhər deyil. O, milli mədəniyyətimizin, ədəbiyyatımızın, musiqimizin, tarixi yaddaşımızın və mənəvi dəyərlərimizin beşiyidir. Qarabağın tacı adlandırılan bu qədim şəhər əsrlər boyu Azərbaycan mədəniyyətinə görkəmli şəxsiyyətlər bəxş etmiş, xalqımızın zəngin irsinin formalaşmasında mühüm rol oynamışdır. Molla Pənah Vaqifin, Xurşidbanu Natəvanın, Üzeyir Hacıbəylinin, Bülbülün və neçə-neçə sənətkarın adı Şuşanın adı ilə qoşa çəkilir. Buna görə də Şuşanın azad edilməsi hər bir azərbaycanlı üçün təkcə hərbi uğur deyil, həm də milli-mənəvi qayıdış idi.
Şuşaya aparan Zəfər yolu uzun illərin həsrəti, mübarizəsi və xalqımızın sarsılmaz inamı ilə formalaşmışdır. 1992-ci il mayın 8-də Şuşanın işğal olunması Azərbaycan xalqının yaddaşında ağır faciə kimi qaldı. Şəhərin tarixi abidələri dağıdıldı, mədəni irsimizə ciddi ziyan vuruldu, minlərlə insan doğma yurd-yuvasından didərgin düşdü. Lakin xalqımız heç vaxt Şuşaya qayıdacağına olan inamını itirmədi.
İllər ərzində Azərbaycan dövləti güclü ordu quruculuğu həyata keçirdi, iqtisadi və siyasi potensialını artırdı, beynəlxalq müstəvidə haqq səsini ucaltdı. Ulu Öndər Heydər Əliyevin müəyyən etdiyi dövlətçilik strategiyası və Prezident, Müzəffər Ali Baş Komandan İlham Əliyevin rəhbərliyi ilə həyata keçirilən məqsədyönlü siyasət Azərbaycanın tarixi Qələbəsinə zəmin yaratdı.
2020-ci il sentyabrın 27-də Ermənistan silahlı qüvvələrinin genişmiqyaslı təxribatlarına cavab olaraq Azərbaycan Ordusu əks-hücum əməliyyatlarına başladı. 44 gün davam edən Vətən müharibəsi xalqımızın birliyini, ordumuzun gücünü və əsgər-zabitlərimizin qəhrəmanlığını bütün dünyaya nümayiş etdirdi. Cəbrayıl, Füzuli, Zəngilan, Qubadlı və digər yaşayış məntəqələrinin azad edilməsi Şuşa Zəfərinə doğru mühüm mərhələlər oldu.
Vətən müharibəsinin ən mühüm və həlledici hadisələrindən biri 2020-ci il noyabrın 8-də Şuşa şəhərinin azad edilməsi oldu. Şuşa əməliyyatı hərb tariximizin ən parlaq səhifələrindən biri kimi yadda qaldı. Mürəkkəb relyefə, sərt hava şəraitinə və düşmənin müdafiə mövqelərinə baxmayaraq, Azərbaycan hərbçiləri böyük şücaət və peşəkarlıq nümayiş etdirərək şəhəri işğaldan azad etdilər.
Şuşa əməliyyatının özünəməxsusluğu ondan ibarət idi ki, Azərbaycan əsgərləri dağlıq ərazidə, çətin keçilən meşəlik sahələrdə irəliləyərək şəhərə daxil oldular. Bu döyüşlərdə hər bir hərbçinin cəsarəti, döyüş ruhu və Vətən sevgisi həlledici rol oynadı. Şuşanın azad edilməsi Azərbaycan Ordusunun hərbi qüdrətini və döyüş qabiliyyətini nümayiş etdirməklə yanaşı, müharibənin taleyinə də ciddi təsir göstərdi.
Noyabrın 8-də Prezident İlham Əliyevin Şuşanın azad olunması ilə bağlı xalqa müraciəti Azərbaycan tarixinin unudulmaz anlarından birinə çevrildi. Bu xəbər illərlə Şuşa həsrəti ilə yaşayan milyonlarla insanın sevincinə səbəb oldu. Şuşa azad edildi, Qarabağın tacında Azərbaycan bayrağı dalğalandı!
Bu gün azad Şuşa yeni inkişaf dövrünü yaşayır. Şəhərdə genişmiqyaslı bərpa və quruculuq işləri aparılır, tarixi abidələr yenidən öz əvvəlki görkəminə qaytarılır, mədəni tədbirlər keçirilir. Vaqif Poeziya Günlərinin, “Xarıbülbül” Beynəlxalq Musiqi Festivalının yenidən Şuşada keçirilməsi şəhərin əvvəlki şöhrətinin bərpasının parlaq nümunəsidir.
8 Noyabr – Şuşa Şəhəri Günü bizə bir daha xatırladır ki, milli birlik, güclü dövlətçilik, vətənə sədaqət və sarsılmaz iradə ən çətin hədəfləri belə gerçəkləşdirə bilər. Şuşanın azadlığı şəhidlərimizin qanı, qazilərimizin fədakarlığı və Azərbaycan əsgərinin qəhrəmanlığı hesabına əldə olunmuşdur.
Bu gün Şuşa azaddır, Azərbaycan bayrağı Şuşada əzəmətlə dalğalanır. Şuşa Zəfəri xalqımızın yaddaşında əbədi yaşayacaq, gələcək nəsillərə Vətən sevgisinin, qəhrəmanlığın və milli qürurun ən böyük nümunəsi kimi ötürüləcəkdir.

Şuşa bizimdir! Qarabağ Azərbaycandır!

Mələk Rzayeva
YAP Kəngərli rayon təşkilatının əməkdaşı