8 Noyabr – Zəfər Günü Azərbaycanın tarixi Qələbəsinin təntənəsidir - ŞƏRH

8 Noyabr – Zəfər Günü Azərbaycan xalqının tarixində xüsusi yer tutan, milli qürur və iftixar mənbəyinə çevrilən möhtəşəm tarixi hadisənin təntənəsidir. Bu əlamətdar gün xalqımızın çoxəsrlik dövlətçilik tarixinin ən şanlı səhifələrindən biri olmaqla yanaşı, milli birliyimizin, sarsılmaz iradəmizin və Vətən sevgimizin parlaq təcəssümüdür.
44 günlük Vətən müharibəsində qazanılan tarixi Zəfər Azərbaycan dövlətinin gücünü, xalqımızın birliyini və milli iradəsini bütün dünyaya nümayiş etdirdi. Cənab Prezident İlham Əliyevin qətiyyətli siyasi rəhbərliyi və düşünülmüş strategiyası, Azərbaycan Ordusunun qəhrəmanlığı nəticəsində xalqımızın uzun illər qəlbində yaşatdığı tarixi ədalətin bərpası istiqamətində həlledici uğur əldə edildi. Döyüş meydanında qazanılan Qələbə Azərbaycanın diplomatik və informasiya müstəvisində nümayiş etdirdiyi prinsipial mövqe ilə də tamamlandı.
2020-ci il sentyabrın 27-də başlayan Vətən müharibəsi noyabrın 8-də Şuşa şəhərinin azad edilməsi ilə tarixi Zəfərin ən mühüm mərhələsinə çatdı. Qarabağın tacı sayılan Şuşanın azad olunması hərb tariximizə qəhrəmanlıq nümunəsi kimi daxil olmaqla yanaşı, milli kimliyimizə, tarixi-mədəni irsimizə və mənəvi dəyərlərimizə bağlılığımızın təntənəsinə çevrildi. Bu hadisə xalqımızın illərlə qəlbində yaşatdığı Böyük Qələbənin rəmzi oldu.
Zəfərimizin təməlində xalqımızın sarsılmaz iradəsi, dövlətimizin qətiyyətli siyasəti, Azərbaycan Ordusunun gücü və Vətən sevgisi dayanırdı. Müharibə dövründə nümayiş etdirilən xalq-ordu birliyi, vətəndaş həmrəyliyi və ümummilli məqsəd ətrafında səfərbərlik Qələbəmizin əsas mənəvi dayaqlarından oldu. Bu tarixi hadisə bir daha sübut etdi ki, vahid milli məqsəd ətrafında birləşən xalq ən çətin sınaqların öhdəsindən gəlmək qüdrətinə malikdir.
Bu möhtəşəm Qələbə, eyni zamanda, Vətən uğrunda canlarından keçmiş şəhidlərimizin müqəddəs xatirəsinin, qazilərimizin qəhrəmanlığının və fədakarlığının təntənəsidir. Şəhidlərimizin əziz xatirəsi xalqımızın yaddaşında daim yaşayacaq, onların göstərdikləri qəhrəmanlıq gələcək nəsillər üçün əsl vətənpərvərlik nümunəsi olacaqdır. Qazilərimizin Vətən qarşısındakı xidmətləri isə hər zaman böyük ehtiramla yad ediləcəkdir.
Zəfər Gününün ən mühüm mənəvi və ictimai əhəmiyyətlərindən biri Azərbaycan xalqının vahid milli ideya ətrafında daha sıx birləşməsidir. Vətən müharibəsi milli birliyin, dövlətə sədaqətin və ümumi məqsəd naminə həmrəyliyin xalqımızın ən böyük güc mənbəyi olduğunu bir daha təsdiqlədi. Bu gün vahid milli ideya bizi ortaq tariximiz, milli-mənəvi dəyərlərimiz, dövlətçilik ənənələrimiz və müstəqil Azərbaycanın gələcəyinə dair ümumi məqsədlərimiz ətrafında birləşdirir.
Vahid milli ideya yalnız keçmişimizin qəhrəmanlıq salnaməsini yaşatmaq deyil, həm də güclü, müstəqil və suveren Azərbaycanın gələcəyini birlikdə qurmaq deməkdir. Onun əsasını dövlət müstəqilliyinə sədaqət, milli həmrəylik, tarixi yaddaşın qorunması və Vətənə bağlılıq təşkil edir. Xüsusilə gənc nəslin bu dəyərlər ruhunda formalaşması, dövlətçilik düşüncəsi və yüksək vətənpərvərlik hissi ilə yetişməsi mühüm əhəmiyyət daşıyır.
Ulu Öndər Heydər Əliyevin rəhbərliyi ilə yaradılmış Yeni Azərbaycan Partiyası ölkəmizin ictimai-siyasi həyatında mühüm yer tutur. Partiyanın fəaliyyətində milli maraqların qorunması, dövlətçilik ənənələrinin yaşadılması, vətənpərvərlik ideyalarının təbliği və cəmiyyətin müxtəlif təbəqələrinin ümumi məqsədlər ətrafında birləşdirilməsi mühüm istiqamətlərdəndir. Zəfər tariximizin təbliği, milli həmrəyliyin möhkəmləndirilməsi və gənclərin dövlətçilik ruhunda tərbiyə olunması da bu fəaliyyətin əsas tərkib hissəsini təşkil edir.
Bu gün işğaldan azad edilmiş ərazilərimizdə genişmiqyaslı bərpa və quruculuq işləri həyata keçirilir, Böyük Qayıdış prosesi davam etdirilir. Uzun illər doğma yurdlarından didərgin düşmüş soydaşlarımızın öz torpaqlarına qayıtması Zəfərimizin yaratdığı yeni reallığın mühüm göstəricilərindəndir. Qarabağ və Şərqi Zəngəzurda yeni yaşayış məntəqələrinin salınması, sosial infrastrukturun yaradılması və quruculuq işlərinin aparılması həmin ərazilərin dirçəldilməsinə, bölgədə dayanıqlı həyatın bərpasına xidmət edir.
Doğma torpaqlarımıza qayıdan soydaşlarımızın öz evlərində yeni həyata başlaması xalqımızın uzun illər boyu arzuladığı tarixi istəyin gerçəkləşməsidir. Qarabağda və Şərqi Zəngəzurda aparılan quruculuq işləri Qələbəmizin davamı, dövlətimizin iqtisadi qüdrətinin və gələcəyə hesablanmış inkişaf strategiyasının bariz nümunəsidir.
8 Noyabr – Zəfər Günü bizə bir daha xatırladır ki, xalqın birliyi, dövlətin gücü və milli iradə hər bir tarixi sınağın öhdəsindən gəlməyə qadirdir. Əldə olunmuş tarixi Qələbənin siyasi, mənəvi və tarixi əhəmiyyətini qorumaq, Zəfər salnaməmizi gələcək nəsillərə çatdırmaq və müstəqil, suveren Azərbaycanımızın inkişafı naminə üzərimizə düşən vəzifələri layiqincə yerinə yetirmək hər birimizin vətəndaşlıq borcudur.

8 Noyabr Azərbaycan xalqının yaddaşında yalnız tarixi Qələbə günü kimi deyil, həm də milli birliyin, dövlətçilik iradəsinin və vahid milli ideyanın təntənəsi kimi əbədi yaşayacaqdır. Bu Zəfər xalqımızın gələcəyə inamını möhkəmləndirən, müstəqil dövlətimizin qüdrətini və milli həmrəyliyimizin sarsılmazlığını nümayiş etdirən şanlı tariximizdir.

Nicat Ələkbərov
YAP Şahbuz rayon təşkilatının sədri