9 Noyabr – Dövlət Bayrağı Günü: milli kimliyimizin, dövlət suverenliyimizin və tarixi varisliyimizin rəmzi - ŞƏRH

Azərbaycan Respublikasının Dövlət Bayrağı xalqımızın milli kimliyini, dövlətçilik ənənələrini, müstəqillik və suverenlik ideallarını özündə əks etdirən müqəddəs dövlət rəmzidir. Üçrəngli bayrağımız Azərbaycanın tarixi keçmişini, milli-mənəvi dəyərlərini və gələcəyə yönəlmiş inkişaf hədəflərini təcəssüm etdirir. Hər il 9 noyabr tarixinin Dövlət Bayrağı Günü kimi qeyd olunması xalqımızın dövlətçilik irsinə ehtiramının və milli həmrəyliyinin ifadəsidir.
Azərbaycanın üçrəngli Dövlət Bayrağının tarixi 1918-ci il noyabrın 9-dan başlayır. Həmin gün Azərbaycan Xalq Cümhuriyyətinin hökuməti tərəfindən qəbul edilən bayraq milli dövlətçilik tariximizdə mühüm hadisə olmuşdur. Şərqdə ilk demokratik respublikalardan biri olan Azərbaycan Xalq Cümhuriyyəti bu qərarla xalqımızın azadlıq, müstəqillik və milli suverenlik arzularını dövlət səviyyəsində təsdiqləmişdir. Cümhuriyyətin süqutundan sonra bayraq rəsmi statusunu itirsə də, xalqımızın milli yaddaşında yaşamaqda davam etmiş və müstəqillik ideyasının əsas simvollarından birinə çevrilmişdir.
Üçrəngli bayrağın dövlətçilik tariximizdə yenidən bərpasında 1990-cı il noyabrın 17-də Naxçıvan Muxtar Respublikası Ali Məclisinin qəbul etdiyi qərar xüsusi əhəmiyyət daşımışdır. Ümummilli Lider Heydər Əliyevin təşəbbüsü və rəhbərliyi ilə üçrəngli bayrağın Naxçıvanın dövlət rəmzi kimi qəbul edilməsi milli dövlətçilik ənənələrinin bərpasına mühüm töhfə vermişdir. 1991-ci il fevralın 5-də isə Azərbaycan Respublikasının Ali Soveti üçrəngli bayrağı dövlət bayrağı kimi qəbul etmişdir. Həmin ilin oktyabrında dövlət müstəqilliyimizin bərpası ilə bayrağımız suveren Azərbaycanın əsas atributlarından birinə çevrilmişdir.
Bayrağımızın rəngləri dərin tarixi və mənəvi məna daşıyır. Mavi rəng türk mənşəyimizi və milli kimliyimizi, qırmızı rəng müasirliyi, inkişafı və tərəqqi ideallarını, yaşıl rəng isə İslam sivilizasiyasına və mənəvi dəyərlərimizə bağlılığımızı ifadə edir. Aypara və səkkizguşəli ulduz bayrağımızın kompozisiyasını tamamlayan mühüm rəmzlərdir. Bu elementlərin vəhdəti Azərbaycanın tarixi köklərinə sadiq, müasir inkişafı hədəfləyən və beynəlxalq əməkdaşlığa açıq dövlət olduğunu nümayiş etdirir.
Azərbaycan Respublikasının Prezidenti İlham Əliyevin 2009-cu il noyabrın 17-də imzaladığı sərəncama əsasən, hər il noyabrın 9-u Dövlət Bayrağı Günü kimi qeyd olunur. Bu qərar milli rəmzlərimizin təbliği, tarixi dövlətçilik irsinin qorunması və gənc nəslin vətənpərvərlik ruhunda tərbiyəsi baxımından mühüm əhəmiyyət daşıyır. Azərbaycan Respublikası Konstitusiyasının 23-cü maddəsində Dövlət Bayrağının ölkəmizin əsas dövlət rəmzlərindən biri kimi təsbit olunması onun hüquqi və siyasi statusunu müəyyən edir.
Dövlət Bayrağı yalnız milli atribut deyil, həm də Azərbaycanın beynəlxalq aləmdə müstəqil dövlət kimi təmsilçiliyinin rəmzidir. Bayrağımızın beynəlxalq təşkilatların qərargahlarında, diplomatik nümayəndəliklərimizin binalarında və müxtəlif beynəlxalq tədbirlərdə dalğalanması dövlətimizin suveren hüquqlarını, müstəqil xarici siyasətini və beynəlxalq nüfuzunu ifadə edir. O, Azərbaycanın beynəlxalq münasibətlər sistemində etibarlı tərəfdaş kimi mövqeyini və qarşılıqlı hörmətə əsaslanan əməkdaşlıq prinsipinə sadiqliyini nümayiş etdirir.
Son illərdə üçrəngli bayrağımızın ölkəmizin bütün ərazisində dalğalanması müasir dövlətçilik tariximizin ən mühüm nailiyyətlərindən biridir. 2020-ci ildə baş vermiş Vətən müharibəsi xalqımızın milli birliyini, həmrəyliyini və dövlətimizin gücünü nümayiş etdirmişdir. 2023-cü ildə həyata keçirilmiş lokal xarakterli antiterror tədbirlərindən sonra Azərbaycanın dövlət suverenliyinin tam bərpa olunması bu tarixi prosesin mühüm mərhələsini təşkil etmişdir. Bu gün üçrəngli bayrağımızın Qarabağda və Şərqi Zəngəzurda dalğalanması milli iradənin, tarixi ədalətin və dövlət suverenliyinin təcəssümüdür.
İşğaldan azad edilmiş ərazilərdə həyata keçirilən genişmiqyaslı bərpa və quruculuq işləri, infrastruktur layihələri və Böyük Qayıdış proqramı Azərbaycanın gələcəyə hesablanmış inkişaf strategiyasının mühüm istiqamətləridir. Həmin ərazilərdə yüksələn Dövlət Bayrağımız xalqımızın doğma torpaqlara qayıdış əzmini, quruculuq iradəsini və davamlı sülhə olan istəyini ifadə edir.
Dövlət bayrağımızın qorunması və təbliği gənc nəslin milli ruhda formalaşması baxımından da xüsusi əhəmiyyət daşıyır. Təhsil müəssisələrində və ictimai platformalarda dövlət rəmzlərinin tarixi və mahiyyətinin təbliği vətəndaşlıq məsuliyyətinin gücləndirilməsinə xidmət edir. Xarici ölkələrdə yaşayan soydaşlarımızın üçrəngli bayrağımızı beynəlxalq tədbirlərdə, mədəniyyət festivallarında və idman yarışlarında nümayiş etdirməsi isə milli kimliyimizin sərhədlərdən kənarda yaşadılmasının və dünya azərbaycanlıları arasında həmrəyliyin bariz nümunəsidir.
Beləliklə, 9 Noyabr – Dövlət Bayrağı Günü Azərbaycan xalqının azadlıq mübarizəsinin, tarixi dövlətçilik ənənələrinin, milli birliyinin və suverenlik iradəsinin təntənəsidir. Üçrəngli bayrağımız keçmişimizlə gələcəyimizi birləşdirən, milli kimliyimizi və müstəqil dövlətçilik əzmimizi ifadə edən müqəddəs rəmzdir. Ona göstərilən ehtiram dövlətimizə, xalqımıza və milli dəyərlərimizə sədaqətin göstəricisidir. Dövlət bayrağımız daim yüksəklərdə dalğalansın, müstəqilliyimizin və suverenliyimizin rəmzi kimi gələcək nəsillərə ötürülsün!

Nurlana Yusifova
YAP Samux rayon təşkilatının əməkdaşı