9 Noyabr – Dövlət Bayrağı Günümüz milli qürurumuzun təcəssümüdür - ŞƏRH

Dövlət rəmzləri hər bir xalqın tarixi keçmişini, milli kimliyini, mənəvi dəyərlərini və müstəqillik ideallarını özündə əks etdirən mühüm atributlardır. Bayraq, gerb və himn dövlətin suverenliyini, xalqın birliyini və milli dövlətçilik ənənələrinə bağlılığını ifadə edir. Azərbaycan Respublikasının üçrəngli Dövlət Bayrağı da bu baxımdan xalqımızın azadlıq mübarizəsinin, tarixi irsinin və müstəqil dövlət qurmaq əzminin ən parlaq rəmzidir. Hər bir azərbaycanlı üçün xüsusi mənəvi dəyər daşıyan bayrağımız yalnız dövlət atributu deyil, həm də Vətənə bağlılığın, milli həmrəyliyin və gələcəyə inamın ifadəsidir. Ona göstərilən ehtiram xalqımızın öz tarixinə, dövlətçiliyinə və milli dəyərlərinə verdiyi qiymətin göstəricisidir.

Azərbaycanın üçrəngli bayrağının yaranması Azərbaycan Xalq Cümhuriyyətinin fəaliyyəti ilə bağlıdır. 1918-ci il noyabrın 9-da qəbul edilən qərarla mavi, qırmızı və yaşıl rənglərdən ibarət Dövlət Bayrağımız təsdiq olundu. Bayrağın hər üç rəngi özündə dərin ideoloji və mənəvi məna daşıyır. Mavi rəng türkçülük düşüncəsini, xalqımızın etnik köklərini və milli mənsubiyyətini, qırmızı rəng müasirliyi, tərəqqini və demokratik inkişaf prinsiplərini, yaşıl rəng isə islam mədəniyyətinə və mənəvi irsimizə bağlılığı ifadə edir. Aypara və səkkizguşəli ulduzla tamamlanan bu üçrəngli kompozisiya Azərbaycanın tarixi kimliyini və milli ideallarını özündə birləşdirir. Məhz bu xüsusiyyətlər bayrağımızı xalqımızın keçmişi ilə gələcəyi arasında mənəvi körpüyə çevirir.
Azərbaycan Xalq Cümhuriyyəti 1920-ci ildə süqut etsə də, onun dövlətçilik irsi və müstəqillik ideyaları xalqımızın yaddaşında yaşamaqda davam etdi. Sovet hakimiyyəti dövründə üçrəngli bayrağımız rəsmi dövlət atributu kimi istifadə olunmasa da, milli azadlıq düşüncəsi və müstəqillik arzusu heç vaxt sönmədi. 1980-ci illərin sonlarında genişlənən milli azadlıq hərəkatı ilə birlikdə xalqımızın tarixi bayrağı yenidən meydana çıxdı. Bu prosesdə Ulu Öndər Heydər Əliyevin fəaliyyəti xüsusi əhəmiyyət kəsb etdi. 1990-cı il noyabrın 17-də onun təşəbbüsü və rəhbərliyi ilə Naxçıvan Muxtar Respublikası Ali Məclisinin sessiyasında üçrəngli bayrağımızın dövlət rəmzi kimi qəbul edilməsi barədə mühüm qərar verildi. Bu hadisə milli dövlətçilik tariximizdə yeni mərhələnin başlanğıcı oldu və müstəqilliyə gedən yolda mühüm siyasi addım kimi yadda qaldı. 1991-ci il fevralın 5-də isə üçrəngli bayrağımız Azərbaycan Respublikasının Dövlət Bayrağı kimi rəsmən qəbul edildi.
Müstəqilliyimizin bərpasından sonra dövlət rəmzlərinin qorunması və milli dəyərlərin möhkəmləndirilməsi ölkə siyasətinin əsas istiqamətlərindən birinə çevrildi. Ulu Öndər Heydər Əliyevin müəyyən etdiyi dövlətçilik strategiyası əsasında Azərbaycanın müstəqillik atributlarına ehtiramın artırılması, onların cəmiyyətdə təbliği və gələcək nəsillərə çatdırılması istiqamətində mühüm işlər görüldü. Bu siyasət Prezident İlham Əliyev tərəfindən də uğurla davam etdirilir. Dövlət başçısının 2009-cu il noyabrın 17-də imzaladığı sərəncamla hər il noyabrın 9-u Azərbaycanda Dövlət Bayrağı Günü kimi qeyd olunmağa başladı. Bu qərar üçrəngli bayrağımızın tarixi əhəmiyyətinin daha geniş təbliğinə və dövlət rəmzlərinə olan ehtiramın gücləndirilməsinə mühüm töhfə verdi.
Bayrağımıza göstərilən diqqət və ehtiramın bariz nümunələrindən biri də Bakıda Dövlət Bayrağı Meydanının yaradılmasıdır. 2010-cu il sentyabrın 1-də istifadəyə verilən bu meydan Azərbaycanın dövlətçilik qüdrətini və milli qürurunu nümayiş etdirən mühüm məkanlardan birinə çevrildi. Burada ucaldılan nəhəng üçrəngli bayrağımız ölkəmizin müstəqilliyinin əbədiliyini, xalqımızın birliyini və dövlətimizin gücünü simvolizə edir. Bu gün paytaxtımızla yanaşı, ölkəmizin bütün bölgələrində, dövlət müəssisələrində, təhsil ocaqlarında və ictimai məkanlarda bayrağımızın dalğalanması milli rəmzlərimizə olan ehtiramın ifadəsidir.
Üçrəngli Dövlət Bayrağımızın mənəvi dəyəri xüsusilə Vətən müharibəsi dövründə daha aydın şəkildə üzə çıxdı. 2020-ci ildə Azərbaycan Ordusunun 44 günlük müharibədə qazandığı tarixi Qələbə nəticəsində uzun illər işğal altında qalmış torpaqlarımız azad edildi. Bu Zəfər xalqımızın milli qürurunu daha da yüksəltdi, bayrağımızın doğma torpaqlarımızda yenidən dalğalanmasını təmin etdi. Şuşanın azad olunması ilə bağlı tarixi gün olan 8 Noyabr və ardınca əldə edilən Qələbə üçrəngli bayrağımızın xalqımız üçün daşıdığı mənəvi məzmunu daha da zənginləşdirdi. İşğaldan azad edilmiş ərazilərimizdə Dövlət Bayrağının ucaldılması illərlə davam edən həsrətin sona çatmasının, tarixi ədalətin bərpasının və milli iradənin təntənəsinin rəmzinə çevrildi.
Bu gün rəşadətli Azərbaycan Ordusunun gücü və Müzəffər Ali Baş Komandan İlham Əliyevin rəhbərliyi ilə üçrəngli bayrağımız Şuşada, Xankəndidə, Laçında və Qarabağın digər yaşayış məntəqələrində qürurla dalğalanır. Bu mənzərə Azərbaycanın öz ərazi bütövlüyünü və dövlət suverenliyini təmin etməsinin, milli maraqlarını qətiyyətlə müdafiə etmək gücünə malik olmasının göstəricisidir. Xüsusilə Şuşanın uca zirvələrində və Cıdır düzündə dalğalanan bayrağımız xalqımızın qəhrəmanlıq tarixini, şəhidlərimizin fədakarlığını və əsgərlərimizin misilsiz şücaətini xatırladır. Həmin torpaqlarda üçrəngli bayrağımızın ucalması yalnız hərbi uğurun deyil, həm də milli ruhun və dövlətçilik iradəsinin təntənəsidir.
Zəfərdən sonra azad edilmiş ərazilərimizdə həyata keçirilən genişmiqyaslı bərpa və quruculuq işləri də bayrağımızın təmsil etdiyi müstəqil dövlətçilik ideallarının davamıdır. Qarabağ və Şərqi Zəngəzurda yeni yollar, məktəblər, xəstəxanalar, yaşayış kompleksləri və müasir infrastruktur obyektləri inşa olunur. Doğma yurdlarından uzun illər ayrı düşmüş insanların öz torpaqlarına qayıtması, dağıdılmış yaşayış məntəqələrində həyatın yenidən canlanması Azərbaycanın quruculuq əzmini nümayiş etdirir. Bu gün həmin bölgələrdə dalğalanan Dövlət Bayrağı həm keçmişə ehtiramı, həm də gələcəyə yönəlmiş inkişaf və tərəqqi məqsədlərini özündə əks etdirir.
Dövlət bayrağına sevgi və hörmət hər bir vətəndaşın gündəlik həyatında, Vətənə münasibətində və cəmiyyət qarşısında məsuliyyətində özünü göstərməlidir. Xüsusilə gənc nəslin dövlət rəmzlərinin tarixi, onların daşıdığı məna və əhəmiyyət barədə maarifləndirilməsi mühüm vəzifələrdəndir. Bayrağımızın hansı tarixi şəraitdə yarandığını, hansı mübarizənin nəticəsi olaraq yenidən dövlət atributuna çevrildiyini bilmək gənclərdə milli şüurun və vətənpərvərlik hisslərinin güclənməsinə xidmət edir. Çünki dövlətçilik ənənələrinə hörmətlə yanaşan, milli dəyərlərini qoruyan və tarixini dərindən bilən gənclər Azərbaycanın gələcək inkişafının əsas dayaqlarıdır.
9 Noyabr – Dövlət Bayrağı Günü xalqımızın milli yaddaşında xüsusi yer tutan, müstəqilliyimizin və dövlətçilik iradəmizin təcəssümünə çevrilən əlamətdar tarixdir. Üçrəngli bayrağımız Azərbaycan xalqının azadlıq arzularını, tarixi köklərini, milli birliyini və gələcəyə olan inamını özündə yaşadır. Bu müqəddəs rəmz uğrunda mübarizə aparanların, Vətən naminə canından keçən şəhidlərimizin və dövlətimizin inkişafı üçün çalışan insanların fədakarlığını xatırladır. Azərbaycan bayrağı bu gün olduğu kimi, gələcəkdə də ölkəmizin bütün uğurlarının və müstəqil dövlətçiliyimizin rəmzi olaraq yüksəklərdə dalğalanacaqdır.

İlkin Bağırov
YAP Babək rayon təşkilatının əməkdaşı