PDF Oxu

Siyasət

  • 390

Azərbaycan ilə Böyük Britaniya arasında əməkdaşlığın möhkəm təməli qoyulub

Azərbaycan ilə Böyük Britaniya arasında əməkdaşlığın möhkəm təməli qoyulub

Azərbaycan Respublikası ilə Böyük Britaniya və Şimali İrlandiya Birləşmiş Krallığı arasında münasibətlər qarşılıqlı hörmət, etimad və ortaq maraqlar əsasında inkişaf edərək bu gün mühüm strateji tərəfdaşlıq səviyyəsinə yüksəlmişdir.
Müstəqilliyimizi bərpa etdikdən sonra Azərbaycanla Böyük Britaniya arasında əlaqələrin qurulması və möhkəmləndirilməsi xarici siyasətimizin əsas istiqamətlərindən biri olmuşdur. Böyük Britaniya Azərbaycanın müstəqilliyini 1991-ci il dekabrın 26-da tanımış, iki ölkə arasında diplomatik münasibətlər isə 1992-ci il martın 11-də qurulmuşdur.
Ulu Öndər Heydər Əliyevin həyata keçirdiyi uzaqgörən siyasət nəticəsində Azərbaycan ilə Böyük Britaniya arasında əməkdaşlığın möhkəm təməli qoyulmuşdur. Xüsusilə enerji sahəsində qurulan əməkdaşlıq iki ölkə arasındakı münasibətlərin inkişafına böyük töhfə vermişdir. Böyük Britaniyanın BP şirkətinin Azərbaycanda fəaliyyəti, neft və qaz layihələrində iştirakı ölkəmizin enerji sektorunun inkişafında mühüm rol oynamışdır.
Bu gün Azərbaycan-Böyük Britaniya münasibətləri yalnız enerji sahəsi ilə məhdudlaşmır. İqtisadiyyat, ticarət, investisiya, nəqliyyat, təhsil, elm, mədəniyyət və humanitar sahələrdə də əməkdaşlıq genişlənir. Böyük Britaniya şirkətlərinin Azərbaycanda müxtəlif sahələrdə fəaliyyəti ölkəmizin iqtisadi potensialına və investisiya imkanlarına olan inamın göstəricisidir.
Prezident İlham Əliyevin rəhbərliyi ilə həyata keçirilən məqsədyönlü xarici siyasət nəticəsində Azərbaycan beynəlxalq münasibətlər sistemində etibarlı tərəfdaş kimi mövqeyini daha da gücləndirmişdir. Böyük Britaniya ilə siyasi dialoqun davam etdirilməsi, qarşılıqlı səfərlər və yüksək səviyyəli görüşlər ikitərəfli əlaqələrin inkişafına yeni imkanlar yaradır.
Son dövrdə əməkdaşlığın yeni istiqamətləri, xüsusilə yaşıl enerji, rəqəmsal texnologiyalar, nəqliyyat-logistika və regional təhlükəsizlik məsələləri xüsusi əhəmiyyət kəsb edir. Azərbaycanın Avropa ilə Asiya arasında mühüm nəqliyyat və enerji dəhlizlərinin inkişafında oynadığı rol Böyük Britaniya ilə əməkdaşlığın perspektivlərini daha da artırır.
12 noyabr 2026-cı ildə Azərbaycan Respublikası ilə Böyük Britaniya arasında Strateji Tərəfdaşlıq haqqında Birgə Bəyannamənin qəbul edilməsi münasibətlərin inkişafında yeni mərhələnin başlanğıcı olmuşdur. Bu sənəd müdafiə və təhlükəsizlik, ticarət və investisiya, təhsil, innovasiya və digər sahələrdə əməkdaşlığın daha da genişləndirilməsini nəzərdə tutur.
Bütün bunlar göstərir ki, Azərbaycan ilə Böyük Britaniya arasında münasibətlər qarşılıqlı faydalı əməkdaşlıq prinsiplərinə əsaslanaraq dinamik şəkildə inkişaf edir. Əminliklə demək olar ki, mövcud siyasi iradə və qarşılıqlı maraqlar gələcəkdə də iki ölkə arasında dostluq və tərəfdaşlıq əlaqələrinin daha da möhkəmlənməsinə xidmət edəcəkdir.

Elnarə Vəlibəyli

YAP Şərur rayon təşkilatının fəal üzvü

Digər xəbərlər