Siyasi partiyanın cəmiyyətdəki mövqeyi yalnız onun təşkilati strukturu və üzvlərinin sayı ilə müəyyən edilmir. Bu mövqenin formalaşmasında ictimai proseslərdə iştirakı, seçicilərlə əlaqələri, qarşıya qoyduğu məqsədlərin həyata keçirilməsi istiqamətində fəaliyyəti və üzvlərinin məsuliyyətli mövqeyi də mühüm rol oynayır. Yeni Azərbaycan Partiyasının 1992-ci ildən başlayaraq keçdiyi siyasi yol bu amillərin təşkilatın inkişafında nə qədər əhəmiyyətli olduğunu göstərən nümunələrdəndir.
YAP-ın yaranmasından sonra ölkənin müxtəlif bölgələrində yerli təşkilatların formalaşdırılması, partiya üzvlərinin ictimai-siyasi proseslərə cəlb olunması və əhali ilə əlaqələrin qurulması təşkilati fəaliyyətin əsas istiqamətlərindən birinə çevrildi. Partiyanın rayon və şəhər təşkilatları onun ümumrespublika miqyasında fəaliyyətinin təmin edilməsində, yerli səviyyədə ictimai təşəbbüslərin əlaqələndirilməsində və üzvlərlə işin təşkilində mühüm rol oynadı. Bu strukturun əsas xüsusiyyətlərindən biri mərkəzi qərarların yerlərdə həyata keçirilməsi ilə yanaşı, yerli məsələlərin və ictimai gözləntilərin də partiya fəaliyyətində nəzərə alınmasıdır.
Yeni Azərbaycan Partiyasının siyasi fəaliyyətində xalqla əlaqələrin qorunması və gücləndirilməsi məsələsi xüsusi əhəmiyyət daşıyır. İctimai etimad hər bir siyasi təşkilat üçün zamanla formalaşan münasibətdir. Bu münasibətin davamlılığı isə bəyan edilən məqsədlərlə real fəaliyyət arasında uyğunluqdan, cəmiyyətin ehtiyaclarına diqqətdən və üzərinə götürülən məsuliyyətin yerinə yetirilməsindən asılıdır. Bu baxımdan partiya üzvlərinin və fəallarının gündəlik fəaliyyəti təşkilatın cəmiyyətlə təmaslarının mühüm hissəsini təşkil edir.
Prezident İlham Əliyev 2026-cı il oktyabrın 2-də keçirilən Yeni Azərbaycan Partiyasının VIII Qurultayındakı çıxışında bu məsələyə xüsusi diqqət yetirib. Dövlət başçısı qeyd edib: “Ölkəmizin son illər ərzində uğurlu və şərəfli yolunda partiyamızın fəallarının çox böyük payı var, böyük töhfəsi var.” Bu fikir partiya fəallarının fəaliyyətinə verilən siyasi qiymətlə yanaşı, onların üzərinə düşən məsuliyyətin də ifadəsidir. Çünki siyasi təşkilatın gündəlik fəaliyyəti, ictimaiyyətlə əlaqələri və təşəbbüslərinin həyata keçirilməsi bilavasitə onun üzvlərinin fəallığından və təşkilati işin səmərəliliyindən asılıdır.
Partiya fəallarının rolu yalnız siyasi tədbirlərdə iştirakla məhdudlaşmır. Onlar əhali ilə ünsiyyətin qurulmasında, ictimai məsələlərin öyrənilməsində, müxtəlif sosial qrupların maraq və gözləntilərinin nəzərə çatdırılmasında, maarifləndirmə və ictimai təşəbbüslərin həyata keçirilməsində iştirak edirlər. Yerli təşkilatların fəaliyyəti də məhz bu istiqamətlərin əlaqələndirilməsi baxımından əhəmiyyətlidir. Xüsusilə rayon və şəhər səviyyəsində keçirilən görüşlər, ictimai müzakirələr, veteranlarla, gənclərlə və müxtəlif peşə sahələrinin nümayəndələri ilə aparılan iş partiyanın cəmiyyətlə əlaqələrinin canlı saxlanmasına xidmət edir.
Bu prosesdə partiya üzvlərinin şəxsi məsuliyyəti və davranış mədəniyyəti də mühüm meyardır. Üzvlük yalnız təşkilati mənsubiyyət deyil, həm də müəyyən prinsiplərə və ictimai öhdəliklərə bağlılıq deməkdir. Peşəkarlıq, işgüzarlıq, etik davranış, qarşılıqlı hörmət, sağlam rəqabət və təşəbbüskarlıq kimi keyfiyyətlər partiyadaxili münasibətlərin inkişafı üçün vacibdir. Müasir dövrdə siyasi təşkilatların fəaliyyətinin səmərəliliyi də bu prinsiplərin gündəlik işdə nə dərəcədə tətbiq olunması ilə sıx bağlıdır.
Yeni Azərbaycan Partiyasının fəaliyyətində gənclərin iştirakı və yeni nəslin təşkilati proseslərə cəlb edilməsi də diqqət tələb edən istiqamətlərdəndir. Gənclərin təşəbbüslərinin dəstəklənməsi, onların bilik və bacarıqlarının inkişafına şərait yaradılması, ictimai fəaliyyət təcrübəsi qazanması partiyanın gələcək təşkilati potensialının formalaşmasına təsir göstərir. Eyni zamanda, partiya veteranlarının təcrübəsindən istifadə olunması, müxtəlif nəsillər arasında əlaqələrin qorunması təşkilati varisliyin təmin edilməsi baxımından əhəmiyyətlidir.
Xalqın etimadı ilə partiya fəallarının fəaliyyəti arasında qarşılıqlı əlaqə mövcuddur. Etimad yalnız siyasi bəyanatlarla deyil, ardıcıl iş, açıq ünsiyyət, məsuliyyətli münasibət və ictimai ehtiyaclara diqqətlə möhkəmlənir. Buna görə də partiya təşkilatlarının qarşısında duran vəzifələrdən biri cəmiyyətlə əlaqələri formal tədbirlər səviyyəsində saxlamamaq, vətəndaşlarla dialoqu davamlı və məzmunlu fəaliyyətə çevirməkdir. Bu yanaşma siyasi təşkilatın ictimai həyatdakı rolunun daha aydın görünməsinə imkan yaradır.
Azərbaycanın yeni inkişaf mərhələsində bu məsuliyyət daha geniş məzmun kəsb edir. Ərazi bütövlüyünün və suverenliyin tam bərpasından sonra ölkənin qarşısında duran vəzifələr – işğaldan azad edilmiş ərazilərin bərpası, Böyük Qayıdışın davam etdirilməsi, sosial rifahın yüksəldilməsi, iqtisadi imkanların genişləndirilməsi və milli həmrəyliyin möhkəmləndirilməsi – cəmiyyətin müxtəlif təbəqələrinin fəal iştirakını tələb edir. Bu proseslərdə siyasi təşkilatların üzərinə düşən vəzifələr də onların ictimai məsuliyyətini artırır.
Yeni Azərbaycan Partiyasının keçdiyi yol göstərir ki, təşkilati inkişafın davamlılığı üzvlərin fəallığı, yerli strukturların işi və cəmiyyətlə əlaqələrin keyfiyyəti ilə sıx bağlıdır. Prezident İlham Əliyevin partiya fəallarının ölkənin inkişafındakı rolunu xüsusi vurğulaması da bu fəaliyyətin əhəmiyyətini önə çıxarır. Qarşıdakı dövrdə həmin potensialın daha səmərəli reallaşdırılması üçün peşəkarlığın, təşəbbüskarlığın, ictimai dialoqun və məsuliyyətli fəaliyyətin gücləndirilməsi mühüm vəzifələr olaraq qalır.
Mustafa Zeynalov,
YAP Neftçala rayon təşkilatının fəal üzvü
“Peşə Təmayüllü Siniflər” layihəsinin qrup rəhbəri