PDF Oxu

Siyasət

  • 256

Azərbaycan–Vyetnam strateji tərəfdaşlığı: qarşılıqlı etimad, iqtisadi imkanlar və yeni əməkdaşlıq perspektivləri - ŞƏRH

Azərbaycan–Vyetnam strateji tərəfdaşlığı: qarşılıqlı etimad, iqtisadi imkanlar və yeni əməkdaşlıq perspektivləri - ŞƏRH

Azərbaycan Respublikasının Prezidenti İlham Əliyevin Vyetnam Sosialist Respublikasına səfəri ölkəmizin fəal, praqmatik və milli maraqlara əsaslanan xarici siyasətinin növbəti mühüm təzahürüdür. Bu səfər Azərbaycan ilə Vyetnam arasında mövcud dostluq münasibətlərinin daha da möhkəmləndirilməsi, strateji tərəfdaşlığın yeni məzmunla zənginləşdirilməsi və qarşılıqlı faydalı əməkdaşlığın genişləndirilməsi baxımından xüsusi əhəmiyyət daşıyır. Prezident İlham Əliyevin vurğuladığı kimi, Vyetnama səfər Azərbaycan və Vyetnam arasında qarşılıqlı faydalı tərəfdaşlığın dərinləşdirilməsində daha bir mühüm addım olacaq. Müasir beynəlxalq münasibətlər sistemində dövlətlərin uğurlu inkişafı, ilk növbədə, düzgün müəyyənləşdirilmiş xarici siyasət strategiyasından, etibarlı tərəfdaşlıq əlaqələrindən və milli maraqların ardıcıl müdafiəsindən asılıdır. Azərbaycan Prezidenti İlham Əliyevin rəhbərliyi ilə həyata keçirilən xarici siyasət kursu ölkəmizin beynəlxalq mövqelərinin möhkəmləndirilməsinə, yeni tərəfdaşların qazanılmasına, iqtisadi əlaqələrin şaxələndirilməsinə və Azərbaycanın dünya miqyasında etibarlı tərəfdaş kimi tanınmasına xidmət edir. Vyetnam səfəri də məhz bu strateji yanaşmanın davamı olmaqla, Azərbaycanın Asiya regionu ilə əlaqələrinin genişləndirilməsinə yeni imkanlar yaradır.

Azərbaycan ilə Vyetnam arasında münasibətlər qarşılıqlı hörmət, dostluq və əməkdaşlıq prinsipləri əsasında formalaşıb. 1992-ci ildə qurulan diplomatik münasibətlər ötən müddət ərzində siyasi dialoq, iqtisadi əlaqələr və humanitar əməkdaşlıq istiqamətlərində inkişaf edib. Xalqlarımız arasında tarixi dostluq bağları, qarşılıqlı səfərlər və əməkdaşlıq təcrübəsi bu münasibətlərin möhkəm təməlini təşkil edir. 2025-ci ildə Vyetnam rəhbərinin Azərbaycana səfəri zamanı münasibətlərin strateji tərəfdaşlıq səviyyəsinə yüksəldilməsi isə ikitərəfli əlaqələrin inkişafında yeni mərhələnin başlanğıcı olmuşdur. Prezident İlham Əliyevin Vyetnama səfəri bu strateji xəttin davam etdirilməsi, siyasi iradənin iqtisadi və praktiki əməkdaşlıqla möhkəmləndirilməsi baxımından mühüm siyasi hadisədir.
İki ölkə arasında əlaqələrin genişləndirilməsi beynəlxalq əməkdaşlığın yeni imkanlarının dəyərləndirilməsi, qarşılıqlı maraqların uzlaşdırılması və müxtəlif sahələrdə birgə fəaliyyətin gücləndirilməsi üçün əlverişli zəmin yaradır. Azərbaycanın beynəlxalq münasibətlərdə nümayiş etdirdiyi müstəqil mövqe, prinsipiallıq və əməkdaşlığa açıq siyasəti Vyetnamla münasibətlərdə də öz əksini tapır. Bu yanaşma ölkəmizin yalnız regional deyil, həm də qlobal miqyasda iqtisadi və siyasi tərəfdaşlıq imkanlarını genişləndirmək məqsədinə xidmət edir. İqtisadi əməkdaşlıq Azərbaycan–Vyetnam münasibətlərinin əsas prioritetlərindən biridir. Ticarət dövriyyəsinin 150 milyon ABŞ dollarından artıq olması iki ölkə arasında iqtisadi əlaqələrin inkişafında müsbət dinamikanın mövcudluğunu göstərir. Bununla belə, hər iki ölkənin iqtisadi potensialı və qarşılıqlı maraqları ticarət əlaqələrinin daha da genişləndirilməsi üçün böyük imkanlar yaradır. Sənaye, kənd təsərrüfatı, enerji, investisiya, logistika, turizm və digər sahələrdə əməkdaşlığın inkişafı iqtisadi münasibətlərin daha şaxəli və dayanıqlı olmasına zəmin yarada bilər.
Tranzit daşımaları sahəsində müşahidə olunan müsbət dinamika da xüsusi diqqətə layiqdir. Azərbaycanın əlverişli coğrafi mövqeyi, müasir nəqliyyat infrastrukturu, beynəlxalq dəhlizlərin inkişafı və logistika imkanları ölkəmizi Avropa ilə Asiya arasında mühüm tranzit mərkəzlərindən birinə çevirir. Vyetnamla tranzit daşımaları sahəsində əməkdaşlığın genişləndirilməsi qarşılıqlı ticarətin inkişafına, yükdaşımaların səmərəliliyinin artırılmasına və yeni iqtisadi bağlantıların formalaşmasına xidmət edə bilər. Orta Dəhliz və digər beynəlxalq nəqliyyat marşrutlarının imkanlarından istifadə Azərbaycan–Vyetnam iqtisadi əlaqələrinin gələcək inkişafında mühüm rol oynamaq potensialına malikdir.
Energetika sahəsində Azərbaycanın zəngin təcrübəsi və potensialı, Vyetnamın iqtisadi inkişaf istiqamətləri ilə uzlaşan əməkdaşlıq imkanları ikitərəfli münasibətlərə yeni perspektivlər qazandırır. Bununla yanaşı, bərpaolunan enerji, texnologiya, sənaye, investisiya və innovasiya sahələrində əlaqələrin genişləndirilməsi hər iki ölkənin iqtisadi inkişafına töhfə verə bilər. Qarşılıqlı biznes əlaqələrinin gücləndirilməsi, sahibkarlar arasında təmasların artırılması və birgə layihələrin təşviqi strateji tərəfdaşlığın real iqtisadi nəticələrlə möhkəmləndirilməsi baxımından vacibdir. Azərbaycan–Vyetnam münasibətlərinin inkişafı yalnız iqtisadi və siyasi sahələrlə məhdudlaşmır. Təhsil, elm, mədəniyyət və humanitar əlaqələrin genişləndirilməsi xalqlarımız arasında qarşılıqlı anlaşmanın və dostluğun daha da möhkəmlənməsinə xidmət edir. Tələbə və mütəxəssis mübadiləsi, birgə elmi layihələr, mədəni tədbirlər və turizm əlaqələri gələcək əməkdaşlığın mühüm istiqamətləri kimi çıxış edir. Bu sahələrdə əlaqələrin inkişafı dövlətlərarası münasibətlərə humanitar məzmun qazandırmaqla, strateji tərəfdaşlığın uzunmüddətli və dayanıqlı olmasına şərait yaradır.
Prezident İlham Əliyevin Vyetnama səfəri Azərbaycanın beynəlxalq siyasətdə artan rolunun, genişlənən diplomatik əlaqələrinin və yeni əməkdaşlıq platformalarına verdiyi önəmin göstəricisidir. Bu səfər ölkəmizin Asiya regionu ilə münasibətlərinin inkişafına, iqtisadi əlaqələrin şaxələndirilməsinə və Azərbaycanın beynəlxalq tranzit imkanlarının daha geniş tanıdılmasına mühüm töhfə verəcək. Bu gün Azərbaycan müstəqil siyasət yürüdən, milli maraqlarını qətiyyətlə qoruyan, beynəlxalq əməkdaşlığa açıq olan və qlobal proseslərdə fəal iştirak edən dövlət kimi mövqeyini möhkəmləndirir. Prezident İlham Əliyevin həyata keçirdiyi məqsədyönlü diplomatik fəaliyyət ölkəmizin yeni tərəfdaşlıqlar qurmasına, mövcud əlaqələri daha yüksək səviyyəyə çatdırmasına və gələcək inkişaf üçün əlverişli imkanlar əldə etməsinə xidmət edir.
Əminliklə demək olar ki, Azərbaycan Prezidentinin Vyetnama səfəri iki ölkə arasında dostluq və strateji tərəfdaşlıq münasibətlərinin inkişafında mühüm mərhələ olacaq. Səfər çərçivəsində əldə olunacaq siyasi və iqtisadi nəticələr, qarşılıqlı əməkdaşlığın yeni istiqamətləri və formalaşacaq əlaqələr gələcəkdə Azərbaycan–Vyetnam münasibətlərinin daha da möhkəmlənməsinə, qarşılıqlı faydalı tərəfdaşlığın genişlənməsinə və hər iki xalqın rifahına xidmət edəcək. Bu səfər Azərbaycanın uzaq regionlarla əlaqələrini gücləndirən, milli maraqlara əsaslanan xarici siyasətinin uğurlu davamı kimi mühüm siyasi və strateji əhəmiyyət daşıyır.

Anar Alışov

Yeni Azərbaycan Partiyası Yardımlı rayon təşkilatının sədri

Digər xəbərlər