Xərçəng müalicəsində əsaslı inqilab: 2 saatlıq müalicə 2 dəqiqəyə endirildi

Böyük Britaniyada xərçəng xəstələrinin müalicəsi üçün yeni immunoterapiya inyeksiyası tətbiq edilib. Cəmi 1-2 dəqiqə ərzində tətbiq olunan dərmanlar sayəsində minlərlə xəstə xəstəxana kreslolarında saatlarla gözləməkdən xilas olacaq.

İstifadə edilən immunoterapiya dərmanı "pembrolizumab" yeni inyeksiya şəklində səhiyyə sisteminə daxil olub. Əvvəllər venadaxili olaraq tətbiq edilən və təxminən iki saat davam edən prosedur bu iynə ilə cəmi 1-2 dəqiqə ərzində edilə bilər. Hər il minlərlə xəstənin bu üsuldan faydalanacağı gözlənilir.

Yeni üsul immun sistemini sıxışdıran və bununla da xərçəng hüceyrələrini məhv edən PD-1 zülalını hədəf alır. Kimyaterapiyadan fərqli olaraq, bu müalicə birbaşa xərçəng hüceyrələrini hədəf almır, əvəzində immunitet sistemindəki maneələri aradan qaldırır, bədənin öz müdafiəsini aktivləşdirir. Hər xəstədə kimyaterapiyanı əvəz etməsə də, bəzi hallarda alternativ və ya tamamlayıcı seçim kimi istifadə edilə bilər. Bununla belə, əsl dəyişiklik müalicənin effektivliyində deyil, onun tətbiqinin sürətindədir. Yeni forma hazırda xüsusi steril otaqlarda venadaxili tətbiq olunan pembrolizumabı əvəz edəcək. Hər üç həftədə təxminən bir dəqiqə və ya altı həftədə bir-iki dəqiqə davam edən iynələr xəstələrin xəstəxanada keçirdikləri vaxtı kəskin şəkildə azaldır.

Hazırda təxminən 14 000 xəstənin istifadə etdiyi bu yeni müalicə formasına keçməklə, hər il 100000 saatdan çox vaxta qənaət etmək planlaşdırılır. Bu sistem xəstələrə gündəlik həyatlarına daha tez qayıtmağa və səhiyyə işçilərinə daha çox xəstəyə yardım etmək imkanı yaradır.

Yeni müalicə ilə Böyük Britaniya Səhiyyə Departamenti indi təxminən 14 xərçəng növü üçün iki fərqli immunoterapiya variantını təklif edir. Böyük Britaniyada bu yeni təcrübənin geniş tətbiqinin xərçəng müalicəsində xəstəxanaların yükünü əhəmiyyətli dərəcədə azaldacağı gözlənilir.