“Diaspor Gənclərinin V Yay Düşərgəsi”nə seçimlər yekunlaşıb

Laçın şəhərində keçiriləcək “Gənclər Yaşıl Dünya Naminə” Diaspor Gənclərinin V Yay Düşərgəsinə seçimlər başa çatıb. Komitədən SİA-ya verilən məlumata görə, düşərgəyə qatılmaq üçün 500-ə yaxın elektron müraciət daxil olub. Qeydiyyat və müsahibə mərhələlərindən sonra 60 ölkəni təmsil edən 119 nəfər düşərgədə iştirak üçün seçilib. Onların arasında həm dünyanın müxtəlif ölkələrində yaşayan azərbaycanlılar, həm də Azərbaycana dost münasibəti bəsləyən xalqların nümayəndələri var.Qeyd edək ki, “Diaspor Gənclərinin V Yay Düşərgəsi” 2024-cü ilin “Yaşıl dünya naminə həmrəylik ili” elan olunması münasibətilə Azərbaycanın dilbər guşələrindən olan Laçın şəhərində təşkil ediləcək.Yay düşərgəsinin proqramına müxtəlif ictimai-siyasi xarakterli panellər, şəhid ailələrinin üzvləri və qəhrəman qazilərimizlə, həmçinin müxtəlif sahələr üzrə ekspertlərlə görüşlər, ana dili dərsləri, eləcə də gənclər üçün əyləncəli proqramlar, intellektual oyunlar daxildir.Xatırladaq ki, Diaspor Gənclərinin bu günədək təşkil olunan düşərgələri Şəki, Şamaxı, Şuşa və Naxçıvanda baş tutub.