Kaya Kallas: Putin Avropaya təhlükəsizlik şərtlərini diktə etməyəcək

...Avropa İttifaqının Xarici İşlər və Təhlükəsizlik Siyasəti üzrə Ali Nümayəndəsi Kaja Kallas Avropa liderlərinə xəbərdarlıq edib ki, Rusiya Avropada yeni təhlükəsizlik arxitekturasının müzakirəsini məcbur etmək və diqqəti öz təcavüzündən yayındırmaq üçün Ukraynaya qarşı müharibəni dayandırmaq üçün danışıqlardan istifadə etməyə çalışır.

O, bu taktikalara uymamağa və müharibəni kimin başlatdığını unutmamağa çağırıb.

SİA-nın əldə etdiyi məlumata görə, bu barədə The Guardian yazır.

Kallas Dublində keçirilən AB sammitindən əvvəl bildirib ki, "Təcavüzkar və qurban var və təcavüzkarın heç bir təhlükəsizlik problemi yoxdur".

Moskva bir daha Avropa təhlükəsizlik sisteminin yenidən nəzərdən keçirilməsini tələb edir. Bu tələblər Mərkəzi və Şərqi Avropa ölkələrinin suverenliyini təhdid etdiyi üçün artıq 2021-ci ildə rədd edilib.

Ukrayna, Rusiya və ABŞ arasında Əbu-Dabidə aparılan danışıqlardan sonra ABŞ Prezidentinin nümayəndəsi Cared Kuşner tərəflərin növbəti mərhələyə avropalıları daxil etmək barədə razılığa gəldiyini açıqlayıb.

Lakin Moskva tezliklə bu məlumatı təkzib edib. Kreml əvvəlcə Avropanın "əsl niyyətlərini" anlamaq istədiyini bildirib.

Almaniya kansleri Fridrix Merts mövcud müqavilələrin yenidən nəzərdən keçirilməsinin zəruriliyini rədd edib: "Bunu müzakirə etməyə ehtiyac yoxdur - arxitektura artıq mövcuddur".

Avropa Komissiyasının prezidenti Ursula fon der Leyen də Avropanın sülh danışıqlarında iştirakını onun maraqlarını qorumaq və Ukraynanı dəstəkləmək üçün zəruri adlandırıb. Lakin Avropa ölkələri hələlik danışıqlar masasında onları kimin təmsil edəcəyinə qərar verməyiblər.

E3 formatı (Birləşmiş Krallıq, Fransa və Almaniya) və İtaliya və Polşanın da daxil olduğu E5 formatı Aİ qurumlarının nümayəndələri ilə birlikdə müzakirə olunur.

Avropa liderləri xüsusilə Böyük Britaniya və Norveçin iştirakını tələb edirlər.

Əli Babayev