Mədəniyyət

  • 566

"Unudulmayan sənətkar" adlı videoçarx hazırlanıb

image

Bakı Şəhər Mədəniyyət Baş İdarəsi Sabunçu rayon Mərkəzləşdirilmiş Kitabxana Sisteminin 8 nömrəli filialı görkəmli opera müğənnisi Lütfiyar İmanovun anım günü ilə əlaqədar "Unudulmayan sənətkar" adlı videoçarx hazırlayıb. Baş İdarədən SİA-ya bildirilib ki, videoçarxda sənətkarın həyat və yaradıcılığı haqqında məlumatlar yer alıb.

Lütfiyar İmanov 1928-ci il aprelin 17-də Sabirabad rayonunda anadan olub. İlk dəfə məktəbli olarkən −1943-cü ildə Sabirabad Dövlət Dram Teatrında aktyor kimi özünü sınayıb. 18 yaşındaykən dram dərnəyinin rəhbəri olub. 1948-ci ildən Sabirabad şəhər mədəniyyət evində bədii rəhbər işləyib. O, 1957-ci ildə Asəf Zeynallı adına Bakı musiqi məktəbinin vokal şöbəsini bitirib.

İlk dəfə 1957-ci ildə Moskvada Üzeyir Hacıbəylinin "Koroğlu" operasında baş rolda debüt edib. 1958-ci ildən ömrünün sonuna qədər Azərbaycan Dövlət Akademik Opera və Balet Teatrının solisti olub. 1965-ci ildə Moskvada Böyük Teatrda, 1975-ci ildə İtalyanın Milan şəhərində "La Skala" teatrında təcrübə edib. 1968-ci ildən başlayaraq 30-dan çox operada baş rolda çıxış edib. İran, İtaliya, Almaniya, Hindistan, Kanada, ABŞ, Türkiyə, bir sıra ərəb ölkələrində və s. qastrol səfərlərində olub.

Sovet dönəmində Azərbaycan Dövlət Konservatoriyasında (professor), 1991-1995-ci illərdə İstanbul və İzmirin opera teatrlarında dərs deyib. 1996-cı ildə İtaliyada Vivaldinin xatirəsinə həsr edilən konsertdə, Almaniyada "Milleniumun mahnısı" festivalında çıxış edib. "Karmen", "Faust", "Otello", "Trubador", "Aida", "Riqoletto" və s. klassik opera əsərlərində rollar oynayıb. 1987-1991-ci illərdə Azərbaycan Teatr Xadimləri İttifaqının sədri olub. 1980 və 1985-ci illərdə Azərbaycan SSR-nın Ali Sovetinin deputatı seçilib.

Lütfiyar İmanov 21 yanvar 2008-ci ildə Bakı şəhərində vəfat edib, Fəxri xiyabanda dəfn olunub.

Digər xəbərlər