Əli Əhmədov: “Ölkədə qiymətləri süni artıran şəxslər barədə tədbirlər görüləcək”

Manatın devalvasiyasından sonra fürsətdən istifadə edib süni şəkildə heç bir obyektiv əsas olmadan satdığı məhsulların qiymətlərini qaldırmağa çalışanlara qarşı Azərbaycan hökuməti, müvafiq qurumlar tərəfindən tədbirlər görüləcək. AZƏRTAC xəbər verir ki, bu barədə Baş nazirin müavini Əli Əhmədov jurnalistlərə açıqlama verib. Baş nazirin müavini deyib ki, bu tədbirlər qanun çərçivəsində aparılacaq: "Çalışmaq lazımdır ki, Azərbaycan vətəndaşları əlavə əziyyət çəkməsin, yaranmış vəziyyətdə sıxıntı keçirməsin. Obyektiv olaraq qiymətlərdə baş verən artımlara gəldikdə isə güman edirəm ki, bu, o qədər də böyük olmayacaq. Xüsusilə də yerli istehsalla əlaqədar olan məhsulların qiymətlərində ciddi artım olmayacaq. Ola bilsin ki, bu məhsulların bəzi komponentləri xaricdən gətirilir və onların gətirilməsi üçün xarici valyutadan istifadə olunur. Qiymət artımı da yalnız o dərəcədə ola bilər", - deyə Ə.Əhmədov bildirib. Baş nazirin müavini əlavə edib ki, manatın dollara olan məzənnəsinin enməsi ilə əlaqədar olaraq təbii ki, dərmanların qiymətlərində dəyişikliklər aparılacaq və məzənnəyə uyğunlaşdırılacaq. Azərbaycanda dərman preparatlarının qiymətləri dövlət tərəfindən tənzimlənir. Hökumətin qarşıya qoyduğu məqsəd ondan ibarətdir ki, Azərbaycan vətəndaşları bir sıra hallarda dərmanların qiymətlərində müşahidə olunan süni qiymət artımlarından əziyyət çəkməsinlər. Eyni zamanda, Azərbaycana dərman idxal edən sahibkarlar da ziyana düşməsinlər. Ə. Əhmədov qeyd edib ki, dərmanların qiymətləri ilə bağlı optimal bir variant işlənib hazırlanacaq. Dərmanların qiymətlərinin süni surətdə şişirdilməsinə imkan verilməyəcək. Manatın məzənnəsinin aşağı düşməsinə uyğun şəkildə qiymətlər yenidən müəyyənləşdiriləcək və heç kim ziyanda qalmayacaq.

Ə.Əhmədov bildirib ki, qiymətlərin süni surətdə şişirdilməsinə imkan verilməyəcək. Manatın dollara olan məzənnəsinin enməsi ilə əlaqədar dərmanların qiymətlərində dəyişikliklər aparılacaq və qiymətlər hazırkı məzənnəyə uyğunlaşdırılacaq. SİA-nın xəbərinə görə, Ə.Əhmədov deyib ki, Azərbaycanda dərman preparatlarının qiymətləri dövlət tərəfindən tənzimlənir: "Əlbəttə, belə bir addımı atmaqla hökumətin qarşıya qoyduğu məqsəd ondan ibarətdir ki, Azərbaycan vətəndaşları bir sıra hallarda dərmanların qiymətlərində müşahidə olunan süni qiymət artımlarından əziyyət çəkməsinlər. Buna da nail olunub. Məlum hadisə ilə əlaqədar olaraq qiymətlərə yenidən baxılacaq, dərmanların qiymətləri məzənnədə baş verən dəyişikliklərə uyğunlaşdırılacaq. İndi də atılan addım ondan ibarət olacaq ki, iş adamları, Azərbaycana dərman idxal edən sahibkarlar ziyana düşməsinlər. Dərmanların qiymətləri ilə bağlı optimal bir variant işlənib hazırlanacaq".