Vandalizmə cavab verən qürur və yenidənqurma simvolu

Biz Ağdam şəhərini bərpa edəcəyik, bütün kəndləri bərpa edəcəyik. Heç kimdə bu haqda şübhə olmasın. Azərbaycan Respublikasının Prezidenti, Müzəffər Ali Baş Komandan cənab İlham Əliyevin bu sözləri həm azərbaycanlıların keçmiş ağrılarını, həm də gələcəyə olan böyük inamını əks etdirən tarixi bir bəyanatdır. Bu fikir, həmçinin uzun illər işğal altında qalmış Ağdamın başına gətirilən dağıntıların bir daha unudulmaması və bu torpaqlarda həyatın yenidən qurulacağına dair dövlətin sarsılmaz iradəsini ifadə edir. Ağdam şəhəri 1993-cü il işğalından sonra tamamilə viran edilmiş, evlər yandırılmış, tarixi və dini abidələr məhv edilmiş, mədəniyyət ocaqları dağıdılmış, şəhərin infrastrukturu tamamilə sıradan çıxarılmışdı. Bir zamanlar Qarabağın ən inkişaf etmiş mərkəzlərindən olan Ağdam uzun illər boyu sanki bir səhraya çevrilmiş, xalqımızın yaddaşında “ruhlar şəhəri” kimi qalmışdı. Bu dağıntılar təkcə fiziki məhvetmə deyildi, həm də bir xalqın milli kimliyinə, tarix və mədəniyyətinə qarşı yönəlmiş vandalizm aktı idi. Lakin Azərbaycan dövləti və xalqı heç vaxt bu torpaqlardan əl çəkmədi, Ağdamın azad ediləcəyi günə böyük ümid və qətiyyətlə hazırlaşdı. 2020-ci il Vətən müharibəsində qazanılan Zəfər nəticəsində Ağdam 20 noyabrda işğaldan azad edildi və bu tarix yeni bir mərhələnin—qayıdış və bərpa dövrünün başlanğıcı oldu. Prezident İlham Əliyevin Ağdamla bağlı söylədiyi sözlər bu torpaqların yenidən dirçəldilməsinin dövlətin ən mühüm prioritetlərindən biri olduğunu göstərir. Artıq Ağdamda böyük quruculuq işləri sürətlə həyata keçirilir, şəhərin baş planı əsasında müasir infrastrukturlar yaradılır, yeni yollar, məktəblər, sənaye zonaları, yaşayış məhəllələri inşa olunur. Şəhər “ağıllı şəhər” konsepsiyasına uyğun bərpa edilir, tarixi abidələr yenidən təqdim olunur və bölgəyə həyatın tam şəkildə qaytarılması üçün genişmiqyaslı layihələr icra olunur. Bu bərpa prosesi yalnız tikinti fəaliyyəti deyil, həm də milli qürurun bərpasıdır. Ağdamın bərpası Azərbaycan xalqının öz torpağına sahib çıxmasının, dövlətin gücünün və siyasi iradəsinin təntənəsidir. Prezidentin “Heç kimdə bu haqda şübhə olmasın” sözləri xalqın gələcəyə olan inamını daha da möhkəmləndirir və bu gün Ağdamda atılan hər bir addım tarixi ədalətin bərpası kimi qiymətləndirilir. Ağdamın dirçəlişi həm şəhidlərimizin ruhuna ehtiram, həm də bölgənin gələcək rifahının təməlidir. Bu gün Ağdam yenidən doğulur, dağıntılar yerini inkişaf və quruculuğa verir, şəhər öz əvvəlki şöhrətinə və daha artıq inkişaf səviyyəsinə qovuşmaq yolunda inamla irəliləyir.


Nicat Quliyev
YAP Laçın rayon təşkilatının məsləhətçisi