Gənclərin sağlam ruhda tərbiyə edilməsi əsas çağırışlardandır

Azərbaycanın idman uğurları, eyni zamanda, idmana dövlət tərəfindən dəstək, Dövlət Proqramlarının icrası beynəlxalq idman qurumları tərəfindən də yüksək qiymətləndirilir. Ölkəmizdə uğurla həyata keçirilən gənclər və idman siyasəti özündə mühüm çağırışları ehtiva edir. Dövlət başçısı İlham Əliyevin 2025-ci ilin idman yekunlarına həsr olunan mərasimdə qeyd etdiyi kimi, bizim siyasətimizin əsas istiqamətlərindən biri gəncləri sağlam ruhda, vətənpərvərlik ruhunda tərbiyə etməkdir ki, gənclər Vətən sevgisi ilə böyüsünlər, tərbiyə alsınlar və beləliklə, ölkəmizin inkişafı daimi, əbədi olsun: “Əlbəttə ki, burada əsas amil cəmiyyətdə mövcud olan ab-havadır. Bu da çox müsbətdir. Bizim xalqımız böyük dərəcədə həmrəylik, vətənpərvərlik göstərir və son illərin hadisələri bunu bir daha təsdiqləyir. Gənclərin fiziki hazırlığı, mənəvi saflığı vəhdət təşkil etməlidir. Məhz o halda ölkə uğurla inkişaf edə bilər. İdmanın isə gənc nəslin vətənpərvərlik ruhunda tərbiyə edilməsində çox böyük önəmi var”.İdmançılarımız Azərbaycan Bayrağını dünyanın müxtəlif ölkələrində keçirilən yarışlarda yüksəklərə qaldırır, Dövlət Himnimiz səsləndirilir. Bu, Azərbaycanın beynəlxalq təqdimatıdır. Dövlət başçısı İlham Əliyev 2025-ci ilin idman yekunlarına həsr olunan mərasimdəki çıxışında idmanımızın uğurlu inkişafını şərtləndirən amillərdən geniş bəhs edərək vurğuladı ki, Azərbaycanda idmanın inkişafı dövlət siyasətidir və dövlət xətti ilə bir çox proqramlar icra edilmişdir. İdman infrastrukturu demək olar ki, sıfırdan qurulmuşdur və bu gün ən yüksək səviyyədədir. Bölgələrdə idmanla məşğul olmaq üçün bütün şərait var. 2025-ci ildə Gəncədə və Yevlaxda Olimpiya İdman Kompleksinin tikintisi başa çatmışdır. Beləliklə, bölgələrdə Olimpiya İdman komplekslərinin sayı 46-ya çatıb. Əlbəttə, bütün bunlar, eyni zamanda, düzgün aparılan siyasət idmanın inkişafını şərtləndirir və gəncləri idmanla məşğul olmağa daha da həvəsləndirir. Bu da çox önəmlidir. Çünki sağlam gənc nəsil yetişməsə, idman uğurlarını əldə etmək mümkün olmayacaq.Azərbaycanın ev sahibliyi etdiyi beynəlxalq yarışlar da idmanımızın inkişafının təqdimatında əhəmiyyətli rol oynayır. 2025-ci ildə III MDB Oyunları, ilk dəfə olaraq UFC üzrə beynəlxalq turnir keçirildi. Bu sırada ənənəvi keçirilən Formula 1 yarışlarını da xüsusi qeyd etməliyik. Dövlətimizin başçısının qeyd etdiyi kimi, ölkəmizdə yüzlərlə idman, beynəlxalq idman yarışları keçirilmişdir və 2026-cı ildə də yarışların keçirilməsi gözlənilir. Xüsusilə ölkəmizdə ilk dəfə olaraq keçiriləcək Xizək üzrə Dünya Kubokunu qeyd etmək istərdim. Çünki bu, ilk dəfə olaraq keçiriləcək tədbirdir. Qusarda, Şahdağ Xizək Kurortunda keçiriləcək. Bu da Azərbaycanı və Şahdağı beynəlxalq xizək idmanının cədvəlinə salmış olur. Burada da ölkələrin sayı kifayət qədər məhduddur və Azərbaycanın burada da olması, qış idmanı növündə Dünya Kubokunun keçirilməsi əlbəttə ki, böyük hadisədir: “Şahdağ Turizm Xizək Mərkəzinin inkişafı hər il təmin edilir. Hər il biz yeni traslar, yeni xizək zolaqları istifadəyə veririk. Əminəm ki, yaxın 1-2 ilə trasların uzunluğu 50 kilometri ötəcək, təqribən 55 kilometr olacaq. Gələcəkdə yeni mərhələnin inkişafı ilə bağlı da məsələlərə baxılacaq. Amma hazırda bu, bizim bölgəmizdə ən inkişaf etmiş xizək mərkəzidir və orada mövcud olan infrastruktur, hotellərin sayı və gələcək planlar, - indi özəl sektor tərəfindən oraya çox böyük maraq göstərilir,- bütövlükdə o bölgədə minlərlə iş yerinin yaradılmasına gətirib çıxarıb. Təkcə Şahdağ Xizək Mərkəzi bundan faydalanmır, bütün ətraf kəndlər, şəhərlər, orada işləyən, yaşayan insanların bir çoxu turizmin bu sektoruna da cəlb edilib”.İşğaldan azad edilmiş ərazilərimiz də idman yarışlarına ev sahibliyi etmək imkanlarına malikdilər. Cənab İlham Əliyevin qeyd etdiyi kimi, Qarabağda və Şərqi Zəngəzurda böyük infrastruktur işləri görülür. Artıq orada da - Köndələnçay su anbarında, Suqovuşan su anbarında yarışlar keçirilir. Gələcəkdə Sərsəng su anbarında da avarçəkmə üzrə yarışlar keçirilə bilər. Yəni ölkəmizin bu cür inkişafı, o cümlədən idman sektoruna da müsbət təsir göstərir.Ümumilikdə Azərbaycan idmanı yeni inkişaf dövrünü yaşayır. Ölkəmizin malik olduğu imkanlar idmanın bütün növləri üzrə beynəlxalq yarışlara ev sahibliyini şərtləndirir. Paytaxt Bakının “Dünyanın İdman Paytaxtı” seçilməsi ölkəmizdə idmanın inkişafına verilən yüksək dəyərdir. Bu kimi mühüm addımlar Azərbaycanın beynəlxalq münasibətlər sistemində yerinin və rolunun təqdimatında əhəmiyyətli rol oynayır.

Həbib Cəfərov
YAP Astara rayon təşkilatının sədri