Qətiyyətli islahatların nəticəsi - ŞƏRH

Hər il 26 iyun tarixində ölkəmizdə Azərbaycan Respublikasının Silahlı Qüvvələri Günü qeyd olunur. Bu əlamətdar gün xalqımızın təhlükəsizliyinin və dövlət müstəqilliyinin əsas təminatçısı olan Azərbaycan Ordusunun keçdiyi şərəfli inkişaf yoluna nəzər salmaq üçün mühüm fürsətdir. Müasir Azərbaycan Ordusunun bugünkü qüdrəti dövlətimizin həyata keçirdiyi məqsədyönlü və uzaqgörən ordu quruculuğu siyasətinin məntiqli nəticəsidir.

Azərbaycan Silahlı Qüvvələrinin əsası 1918-ci il iyunun 26-da Azərbaycan Xalq Cümhuriyyəti tərəfindən qoyulmuşdur. Müstəqilliyin bərpasından sonra isə ümummilli lider Heydər Əliyev tərəfindən ordu quruculuğu sahəsində mühüm addımlar atılmış, vahid komandanlıq sistemi yaradılmış və Silahlı Qüvvələrin inkişafı üçün möhkəm təməl formalaşdırılmışdır.
Bu siyasət hazırda Prezident cənab İlham Əliyev tərəfindən uğurla davam etdirilir. Ordunun maddi-texniki bazasının gücləndirilməsi, müasir silah və hərbi texnikanın alınması, peşəkar kadr hazırlığı və hərbi təhsilin inkişafı dövlət siyasətinin əsas istiqamətlərindən birinə çevrilmişdir. Azərbaycanın müdafiə qabiliyyətinin artırılması məqsədilə hərbi büdcə əhəmiyyətli dərəcədə yüksəldilmiş, ordumuz dünyanın ən müasir silah sistemləri ilə təchiz olunmuşdur.
Ordu quruculuğu siyasətinin ən mühüm nəticələrindən biri Azərbaycan əsgərinin yüksək döyüş hazırlığı və vətənpərvərlik ruhudur. Müntəzəm keçirilən təlimlər, beynəlxalq hərbi əməkdaşlıq və peşəkar idarəetmə sistemi Silahlı Qüvvələrin döyüş qabiliyyətini daha da gücləndirmişdir. Bu amillər Azərbaycan Ordusunun regionun ən güclü ordularından birinə çevrilməsinə şərait yaratmışdır.
2020-ci ildə baş vermiş İkinci Qarabağ müharibəsi zamanı Azərbaycan Ordusu yüksək peşəkarlıq, qəhrəmanlıq və müasir döyüş taktikasını nümayiş etdirərək tarixi Qələbə qazandı. 44 günlük Vətən müharibəsində əldə olunan uğurlar uzun illər ərzində həyata keçirilən səmərəli ordu quruculuğu siyasətinin real nəticəsi kimi tarixə yazıldı. Azərbaycan əsgəri öz gücü və şücaəti ilə ölkənin ərazi bütövlüyünü bərpa etdi və xalqımıza böyük qürur yaşatdı.
Bu gün Azərbaycan Ordusu dövlətimizin təhlükəsizliyinin etibarlı təminatçısı olmaqla yanaşı, regionda sülhün və sabitliyin qorunmasına da mühüm töhfə verir. Güclü iqtisadiyyat, müasir idarəetmə və məqsədyönlü hərbi strategiya nəticəsində formalaşan qüdrətli Silahlı Qüvvələr ölkəmizin müstəqilliyinin və suverenliyinin əsas dayaqlarından biridir.
26 İyun – Silahlı Qüvvələr Günü münasibətilə bütün hərbi qulluqçularımızı təbrik edir, Vətənimizin müdafiəsi uğrunda xidmət göstərən hər bir əsgər və zabitə dərin minnətdarlığımızı bildiririk. Azərbaycan Ordusunun qazandığı uğurlar effektiv ordu quruculuğu siyasətinin məntiqli nəticəsi olmaqla yanaşı, xalqımızın birliyinin, dövlətimizin gücünün və milli həmrəyliyimizin parlaq təzahürüdür.

Mələk Rzayeva
YAP Kəngərli rayon təşkilatının məsləhətçisi