Azərbaycanın investisiya potensialı və yeni iqtisadi inkişaf perspektivləri - ŞƏRH

Azərbaycan Respublikasının Prezidenti İlham Əliyevin II Azərbaycan Beynəlxalq İnvestisiya Forumu çərçivəsində keçirilən tədbirdə çıxışı ölkəmizin iqtisadi inkişafının əsas istiqamətləri, investisiya imkanları və qarşıdakı dövr üçün müəyyənləşdirilən prioritetlər baxımından mühüm əhəmiyyət daşıyıb. Dövlət başçısı çıxışında Azərbaycanın son illərdə əldə etdiyi iqtisadi nailiyyətlər, formalaşdırılmış əlverişli biznes və investisiya mühiti, maliyyə dayanıqlığı, enerji siyasəti və iqtisadiyyatın şaxələndirilməsi istiqamətində görülən işlər barədə fikirlərini bölüşüb.

Son illərdə Azərbaycanın iqtisadi potensialının əhəmiyyətli dərəcədə genişlənməsi ölkənin beynəlxalq investisiya məkanında mövqeyini də möhkəmləndirib. Prezident İlham Əliyev bildirib ki, son 20 il ərzində Azərbaycana 350 milyard ABŞ dollarından artıq investisiya yatırılıb. Bu vəsaitin təxminən yarısının birbaşa xarici investisiyaların payına düşməsi xarici investorların Azərbaycan iqtisadiyyatına göstərdiyi marağın mühüm göstəricilərindən biridir.
Ölkədə siyasi və makroiqtisadi sabitliyin qorunması, maliyyə imkanlarının genişləndirilməsi və ardıcıl iqtisadi siyasətin həyata keçirilməsi investisiya mühitinin formalaşmasında mühüm rol oynayır. Azərbaycan qarşıdakı mərhələdə də mövcud potensialdan səmərəli istifadə etməklə yeni investisiyaların cəlb edilməsini, müasir texnologiyaların tətbiqini və iqtisadi fəaliyyət sahələrinin genişləndirilməsini qarşıya məqsəd qoyur.
İqtisadiyyatın şaxələndirilməsi isə bu strategiyanın əsas istiqamətlərindən biridir. Qeyri-neft sektorunun inkişaf etdirilməsi, yeni istehsal sahələrinin yaradılması, kənd təsərrüfatı, sənaye, logistika, rəqəmsal iqtisadiyyat və digər istiqamətlərdə investisiya imkanlarının artırılması ölkənin gələcək iqtisadi inkişafında mühüm yer tutur. Bu proses həm iqtisadi artımın davamlılığının təmin olunmasına, həm də yeni iş imkanlarının formalaşmasına şərait yaradır.
Tədbirdə Azərbaycanın enerji sektorunun perspektivləri də xüsusi diqqət mərkəzində olub. Prezident İlham Əliyev qeyd edib ki, neft və qaz sənayesi yaxın illərdə də ölkə iqtisadiyyatında mühüm əhəmiyyətini qoruyacaq. Bununla yanaşı, enerji sektorunda yeni yataqların işlənilməsi və mövcud layihələrin genişləndirilməsi Azərbaycanın enerji imkanlarının daha da artırılmasına xidmət edir.
Bu baxımdan “Exxon” şirkəti ilə qeyri-ənənəvi neft və qaz yataqlarının işlənilməsi istiqamətində əməkdaşlıq, həmçinin “Total” şirkəti ilə “Abşeron” yatağının işlənilməsinin ikinci mərhələsinə dair müqavilə mühüm layihələr sırasında qeyd olunub. Dövlət başçısının bildirdiyinə görə, “Abşeron” yatağının ikinci mərhələsinin reallaşdırılması nəticəsində qaz hasilatının üç-dörd il ərzində əlavə 5 milyard kubmetr artırılması mümkün olacaq.
Azərbaycanın enerji siyasətində diqqət çəkən digər mühüm istiqamət isə bərpaolunan enerji mənbələrinin inkişafıdır. Xüsusilə Xəzər dənizinin Azərbaycan sektorunun külək enerjisi baxımından böyük potensiala malik olması ölkənin gələcək enerji strategiyası üçün geniş imkanlar yaradır. Dövlət başçısı Xəzərin Azərbaycan sektorunda 157 giqavat həcmində enerji potensialının olduğunu diqqətə çatdırıb.
Qarşıdakı beş il ərzində Azərbaycanın müxtəlif ərazilərində bərpaolunan enerji mənbələrinin daha geniş tətbiqinin nəzərdə tutulması ölkənin enerji sistemində yeni mərhələnin formalaşmasına imkan verə bilər. Günəş və külək enerjisindən istifadənin genişləndirilməsi, enerji istehsalının şaxələndirilməsi və yaşıl enerji layihələrinin həyata keçirilməsi Azərbaycanın həm daxili enerji tələbatının təmin olunmasına, həm də gələcəkdə yeni ixrac imkanlarının yaradılmasına xidmət edən istiqamətlər kimi qiymətləndirilir.
Forum çərçivəsində Azərbaycanın nəqliyyat və logistika imkanlarının genişləndirilməsi də ölkənin investisiya potensialı ilə əlaqəli mühüm məsələlərdən biri kimi ön plana çıxıb. Azərbaycanın Avropa ilə Asiya arasında əlverişli coğrafi mövqedə yerləşməsi, nəqliyyat infrastrukturuna yatırılan investisiyalar və regional layihələr ölkənin tranzit imkanlarını artırır. Bu potensialın daha da inkişaf etdirilməsi yeni ticarət marşrutlarının formalaşmasına və beynəlxalq iqtisadi əlaqələrin genişlənməsinə şərait yaradır.
Azərbaycanın investisiya siyasətində mühüm istiqamətlərdən biri də ölkəyə yeni texnologiyaların, müasir idarəetmə təcrübəsinin və innovativ yanaşmaların gətirilməsidir. Xarici investisiyaların yalnız maliyyə resursu deyil, eyni zamanda yeni bilik, texnologiya və təcrübə mənbəyi kimi əhəmiyyəti böyükdür. Bu baxımdan beynəlxalq şirkətlərlə əməkdaşlığın genişləndirilməsi ölkə iqtisadiyyatının rəqabət qabiliyyətinin artırılmasına töhfə verə bilər.
II Azərbaycan Beynəlxalq İnvestisiya Forumu Azərbaycanın iqtisadi potensialının və investisiya imkanlarının beynəlxalq biznes dairələrinə təqdim edilməsi baxımından əhəmiyyətli platforma kimi diqqət çəkib. Forum çərçivəsində müxtəlif sahələr üzrə aparılan müzakirələr və əldə olunan razılaşmalar ölkənin iqtisadi əlaqələrinin daha da genişləndirilməsi üçün yeni imkanlar yaradır.
Prezident İlham Əliyevin tədbirdə səsləndirdiyi fikirlər Azərbaycanın qarşıdakı dövrdə daha şaxələndirilmiş, dayanıqlı və innovativ iqtisadi modelə keçid istiqamətində fəaliyyətini davam etdirəcəyini göstərir. İnvestisiyaların cəlb edilməsi, enerji potensialının səmərəli istifadəsi, qeyri-neft sektorunun inkişafı, yaşıl enerjiyə keçid və nəqliyyat-logistika imkanlarının genişləndirilməsi Azərbaycanın yeni iqtisadi inkişaf mərhələsinin əsas istiqamətləri sırasında yer alır.
Beləliklə, II Azərbaycan Beynəlxalq İnvestisiya Forumu ölkənin iqtisadi imkanlarının beynəlxalq səviyyədə təqdim olunması ilə yanaşı, Azərbaycanla xarici investorlar arasında yeni əməkdaşlıq perspektivlərinin formalaşmasına xidmət edən mühüm tədbirlərdən biri kimi yadda qalıb. Dövlət başçısının çıxışı isə Azərbaycanın gələcək iqtisadi inkişafında investisiya, enerji, innovasiya və şaxələndirmənin xüsusi əhəmiyyət daşıdığını bir daha ortaya qoyub.

İlkin Bağırov
YAP Babək rayon təşkilatının əməkdaşı