Qələbələrimizin başlanğıcından böyük Zəfərə gedən yol - ŞƏRH

Azərbaycan Respublikasının Prezidenti, Yeni Azərbaycan Partiyasının Sədri İlham Əliyevin Yeni Azərbaycan Partiyasının VIII Qurultayında səsləndirdiyi fikirlər Azərbaycanın müasir inkişaf tarixinin mühüm mərhələlərinə, dövlətçiliyimizin möhkəmləndirilməsi və milli qələbələrimizin əldə olunmasına aparan tarixi yola geniş nəzər salmaq baxımından xüsusi əhəmiyyət daşıyır. Prezident İlham Əliyevin çıxışında vurğuladığı kimi, Azərbaycanın bugünkü uğurlarının təməlində Ulu Öndər Heydər Əliyevin müəyyən etdiyi və bu gün də ardıcıl şəkildə davam etdirilən siyasi kurs dayanır.
Yeni Azərbaycan Partiyasının 1992-ci ilin noyabrında Naxçıvanda keçirilmiş təsis qurultayı ölkənin mürəkkəb ictimai-siyasi vəziyyətində xalqın dövlətçilik iradəsinin ifadəsi kimi tarixə düşdü. Həmin dövrdə Azərbaycan ciddi siyasi, iqtisadi və hərbi böhranla üz-üzə idi. Torpaqlarımız işğal olunur, ölkədə idarəetmə böhranı dərinləşir, iqtisadiyyat tənəzzülə uğrayırdı. Belə bir şəraitdə Azərbaycanın mütərəqqi və vətənpərvər insanlarının Ulu Öndər Heydər Əliyevin ətrafında birləşməsi xalqın nicat yolunu müəyyənləşdirən mühüm tarixi hadisəyə çevrildi.
Ulu Öndər Heydər Əliyevin Azərbaycana rəhbərliyə qayıdışı xalqın tələbi və böyük ümidlərin ifadəsi idi. 1993-cü ildə xalqın iradəsi ilə Prezident seçilən Heydər Əliyev ölkəni parçalanmaq təhlükəsindən xilas etdi, dövlətçiliyin əsaslarını möhkəmləndirdi, ictimai-siyasi sabitliyi təmin etdi və Azərbaycanın gələcək inkişaf strategiyasını müəyyənləşdirdi. Həmin illərdə separatçılıq, dövlət çevrilişi cəhdləri, ağır iqtisadi vəziyyət və qaçqın-köçkün problemi kimi ciddi sınaqlar qarşısında Ulu Öndərin qətiyyəti Azərbaycanın müstəqilliyinin qorunmasında həlledici rol oynadı.
Heydər Əliyevin rəhbərliyi ilə Azərbaycan beynəlxalq təcriddən çıxmağa, özünün haqlı mövqeyini dünya ictimaiyyətinə çatdırmağa və xarici investisiyaların ölkəyə cəlb edilməsinə nail oldu. “Əsrin müqaviləsi”nin imzalanması, dövlətin iqtisadi əsaslarının möhkəmləndirilməsi və uzunmüddətli inkişaf strategiyasının müəyyənləşdirilməsi Azərbaycanın gələcək yüksəlişi üçün möhkəm zəmin yaratdı. Ulu Öndərin müəyyən etdiyi siyasi kursun əsasını müstəqilliyin və dövlətçiliyin möhkəmləndirilməsi, iqtisadi müstəqilliyin təmin olunması, güclü hərbi potensialın yaradılması və milli maraqların qətiyyətlə müdafiəsi təşkil edirdi.
Bu siyasi xətt Prezident İlham Əliyev tərəfindən uğurla davam etdirildi və yeni mərhələdə daha da zənginləşdirildi. 2003-cü ildən etibarən qarşıya qoyulan əsas məqsədlərdən biri Azərbaycanın ərazi bütövlüyünün və suverenliyinin bərpası idi. Ölkəmizin iqtisadi, siyasi və hərbi gücünün davamlı şəkildə artırılması nəticəsində bu tarixi məqsədə nail olundu. 2020-ci ildə 44 günlük Vətən müharibəsində əldə edilən şanlı Zəfər və sonrakı tarixi hadisələr Azərbaycanın ərazi bütövlüyünün və suverenliyinin tam bərpasını təmin etdi.
Prezident İlham Əliyevin vurğuladığı kimi, bu gün Azərbaycan beynəlxalq müstəvidə böyük hörmətə layiq olan, öz taleyini özü müəyyən edən və milli maraqlarını qətiyyətlə müdafiə edən güclü dövlətdir. Qarşıya qoyulan tarixi vəzifələrin ardıcıl şəkildə yerinə yetirilməsi Azərbaycan dövlətinin siyasi iradəsinin və xalqın Prezident İlham Əliyevin rəhbərliyi ətrafında sıx birliyinin nəticəsidir.
VIII Qurultayda diqqət çəkilən mühüm məsələlərdən biri də qarşıda duran vəzifələrdir. Əldə edilmiş Zəfər Azərbaycanın inkişaf yolunun sonu deyil, yeni mərhələnin başlanğıcıdır. Bu mərhələdə ölkənin hərbi gücünün daha da artırılması, müdafiə qabiliyyətinin möhkəmləndirilməsi, iqtisadi potensialın gücləndirilməsi və dövlət müstəqilliyinin daha etibarlı şəkildə qorunması əsas prioritetlər sırasındadır.
Yeni Azərbaycan Partiyasının təsis qurultayından başlanan yol bu gün Azərbaycanın qüdrətli, müstəqil və suveren dövlət kimi mövqeyinin daha da möhkəmlənməsi ilə davam edir. Ulu Öndər Heydər Əliyevin siyasi irsinə əsaslanan və Prezident İlham Əliyev tərəfindən uğurla davam etdirilən bu siyasi kurs Azərbaycanın yeni nailiyyətlərə, davamlı inkişafa və daha böyük qələbələrə doğru inamla irəliləməsinin başlıca təminatıdır.

Səxavət Həsənov
YAP Kəngərli rayon təşkilatının fəalı