VIII Qurultay – yeni dövrün çağırışları və böyük hədəflər - ŞƏRH

Yeni Azərbaycan Partiyasının VIII Qurultayı Azərbaycanın ictimai-siyasi həyatında mühüm hadisə olmaqla yanaşı, ölkəmizin keçdiyi tarixi inkişaf yoluna nəzər salmaq, əldə edilmiş nailiyyətləri qiymətləndirmək və qarşıdakı dövr üçün yeni hədəfləri müəyyənləşdirmək baxımından xüsusi əhəmiyyət daşıyır.
2 oktyabr 2026-cı ildə Bakıda, Heydər Əliyev Mərkəzində keçirilən VIII Qurultay Azərbaycan Respublikasının Prezidenti, Yeni Azərbaycan Partiyasının Sədri cənab İlham Əliyevin çıxışında Yeni Azərbaycan Partiyasının yaranması və keçdiyi şərəfli yol xüsusi vurğulandı. YAP 1992-ci ildə Ulu Öndər Heydər Əliyevin rəhbərliyi ilə yaranarkən Azərbaycan olduqca mürəkkəb ictimai-siyasi vəziyyətlə üz-üzə idi. Ölkənin müstəqilliyinin qorunması, dövlətçiliyin möhkəmləndirilməsi və xalqın gələcəyinin təmin olunması üçün güclü siyasi qüvvəyə böyük ehtiyac var idi.
Yeni Azərbaycan Partiyasının yaranması məhz belə bir tarixi zərurətdən irəli gəlirdi. Ulu Öndər Heydər Əliyevin ətrafında birləşən xalqımızın mütərəqqi və vətənpərvər insanları Azərbaycanın gələcək inkişafının möhkəm təməlini yaratdılar. Bu gün YAP-ın ölkənin və Cənubi Qafqazın ən böyük siyasi qüvvəsinə çevrilməsi həmin tarixi seçimin nə qədər doğru olduğunu bir daha təsdiqləyir.
Prezident İlham Əliyevin qurultayda qeyd etdiyi kimi, partiyanın fəaliyyəti ölkəmizin son illərdə keçdiyi uğurlu və şərəfli inkişaf yolunda mühüm rol oynayıb. Qarşıya qoyulan əsas məqsədlərin böyük əksəriyyətinin həyata keçirilməsi, xüsusilə Azərbaycanın ərazi bütövlüyünün və suverenliyinin tam bərpa olunması dövlət siyasətinin ardıcıllığının və məqsədyönlülüyünün nəticəsidir.
VIII Qurultayın ən mühüm xüsusiyyətlərindən biri onun Azərbaycanın ərazi bütövlüyünü və suverenliyini tam bərpa etdiyi şəraitdə keçirilməsidir.
44 günlük Vətən müharibəsində əldə etdiyimiz tarixi Zəfər və 2023-cü ilin sentyabrında həyata keçirilən lokal antiterror tədbirləri nəticəsində Azərbaycanın ərazi bütövlüyünün və suverenliyinin tam təmin edilməsi xalqımızın çoxəsrlik tarixində yeni səhifə açdı.
Bu Zəfər Azərbaycan xalqının milli iradəsinin, birliyinin, dövlətə və dövlət rəhbərinə inamının, ordumuzun gücünün və Ali Baş Komandanın qətiyyətli siyasətinin nəticəsidir. Şəhidlərimizin qanı və qəhrəmanlığı hesabına qazanılmış bu böyük Qələbə hər bir azərbaycanlının qəlbində əbədi yaşayacaqdır.
Prezident İlham Əliyev qurultaydakı çıxışında 8 Noyabr – Zəfər Günü ilə yanaşı, 20 Sentyabrın da tariximizdə xüsusi əhəmiyyət daşıdığını vurğuladı. Bu tarixlər Azərbaycanın ərazi bütövlüyünün və suverenliyinin bərpası baxımından xüsusi tarixi məna kəsb edir.
Lakin Zəfər yalnız keçmiş nailiyyətlərin qeyd edilməsi deyil. Zəfər həm də qarşıya yeni vəzifələr qoyur. Bu gün əsas məqsədlərdən biri əldə olunmuş uğurları qorumaq, Azərbaycanın hərbi və iqtisadi gücünü daha da artırmaq, Qarabağ və Şərqi Zəngəzurun sürətli inkişafını təmin etmək və Böyük Qayıdışı uğurla həyata keçirməkdir.
Prezident İlham Əliyevin qurultayda diqqət çəkdiyi əsas məsələlərdən biri Azərbaycanın hərbi gücünün daha da artırılmasıdır.
Dünyada baş verən proseslər göstərir ki, dövlətin təhlükəsizliyi daim diqqət mərkəzində saxlanılmalıdır. Azərbaycan öz ərazi bütövlüyünü və suverenliyini bərpa etsə də, ölkənin müdafiə qüdrətinin daha da möhkəmləndirilməsi strateji əhəmiyyət daşıyır.
Güclü ordu güclü dövlətin əsas dayaqlarından biridir. Bu baxımdan Azərbaycan Ordusunun müasir silah və texnologiyalarla təchiz olunması, hərbi potensialımızın artırılması və müdafiə sənayesinin inkişaf etdirilməsi qarşıda duran mühüm vəzifələr sırasındadır.
Bununla yanaşı, ölkəmizin gücünün əsas mənbələrindən biri xalqımızın milli birliyidir. Azərbaycan xalqı çətin və həlledici məqamlarda birlik nümayiş etdirərək öz iradəsini ortaya qoyub. Vətən müharibəsi dövründə xalqımızın nümayiş etdirdiyi həmrəylik bunun ən parlaq nümunəsidir.
Milli birlik qorunmalı və daha da möhkəmləndirilməlidir. Çünki müstəqil dövlətimizin gələcək inkişafı, təhlükəsizliyi və tərəqqisi məhz cəmiyyətin bütün təbəqələrinin ümummilli məqsədlər ətrafında birliyindən asılıdır.
Qurultayda səsləndirilən mühüm fikirlərdən biri də Yeni Azərbaycan Partiyasının ideoloji fəaliyyətinin müasir dövrün tələblərinə uyğun qurulması ilə bağlıdır.
Prezident İlham Əliyev qeyd etdi ki, ideoloji iş elə aparılmalıdır ki, Azərbaycanın reallıqları, ölkədə həyata keçirilən işlər və müsbət ab-hava daim ictimai müzakirədə olsun. Bunun üçün şablon yanaşmalardan uzaqlaşmaq, formal xarakter daşıyan tədbirləri azaltmaq və müasir ideoloji iş üsullarından istifadə etmək vacibdir. Bu fikirlər YAP-ın yerli təşkilatları üçün də mühüm istiqamət müəyyənləşdirir.
Bu gün insanlarla işləmək yalnız ənənəvi görüş və tədbirlərlə məhdudlaşmamalıdır. Müasir informasiya texnologiyalarından, sosial şəbəkələrdən, rəqəmsal platformalardan daha səmərəli istifadə edilməli, xüsusilə gənclərlə ünsiyyətin yeni formaları yaradılmalıdır.
Ən başlıcası isə təbliğat və maarifləndirmə işində real faktlara, ölkəmizin əldə etdiyi nəticələrə və insanların gündəlik həyatında hiss olunan dəyişikliklərə əsaslanmaq lazımdır.
Azərbaycanın bu gün əldə etdiyi uğurlar barədə həqiqətlərin dünya ictimaiyyətinə çatdırılması da mühüm vəzifədir. Biz öz reallıqlarımızı düzgün və obyektiv şəkildə təqdim etməli, ölkəmizin müstəqil siyasətini, inkişaf modelini və milli maraqlarını layiqincə müdafiə etməliyik.
Bu gün Azərbaycanın qarşısında duran ən mühüm vəzifələrdən biri işğaldan azad edilmiş ərazilərin bərpası və Böyük Qayıdışın təmin edilməsidir.
Qarabağ və Şərqi Zəngəzurda həyata keçirilən genişmiqyaslı quruculuq işləri Azərbaycanın iqtisadi gücünün, maliyyə imkanlarının və siyasi iradəsinin göstəricisidir.
Yeni yolların, yaşayış məntəqələrinin, məktəblərin, xəstəxanaların, sosial obyektlərin, enerji və digər infrastruktur layihələrinin yaradılması həmin ərazilərin gələcək inkişafına möhkəm zəmin yaradır.
Bu proses təkcə dağıdılmış şəhər və kəndlərin bərpası deyil. Qarabağ və Şərqi Zəngəzur müasir Azərbaycanın ən mühüm inkişaf məkanlarından birinə çevrilir. Burada yeni iqtisadi imkanların yaradılması, investisiyaların cəlb olunması, məşğulluğun artırılması və insanların öz doğma torpaqlarına qayıdışı dövlət siyasətinin mühüm istiqamətlərindəndir.
Prezident İlham Əliyevin çıxışında Azərbaycanın iqtisadi və enerji potensialına da xüsusi diqqət yetirildi.
Müasir dünyada enerji təhlükəsizliyi məsələsi getdikcə daha böyük əhəmiyyət qazanır. Azərbaycan isə öz təbii resurslarından səmərəli istifadə etməklə yanaşı, enerji sahəsində etibarlı tərəfdaş kimi mövqeyini daha da möhkəmləndirir.
Ölkəmizin neft, neft məhsulları, təbii qaz, elektrik enerjisi, neft-kimya məhsulları və gübrə istehsalı sahələrində imkanlara malik olması Azərbaycanın iqtisadi potensialının genişliyini göstərir. Dövlətimizin həyata keçirdiyi siyasət nəticəsində Azərbaycan enerji resurslarının istehsalı və ixracı sahəsində mühüm ölkələrdən birinə çevrilib.
İqtisadi güc isə öz növbəsində sosial layihələrin həyata keçirilməsinə, əhalinin rifahının yaxşılaşdırılmasına, yeni iş yerlərinin yaradılmasına və regionların inkişafına imkan yaradır.
VIII Qurultayda səsləndirilən fikirlər Yeni Azərbaycan Partiyasının bütün yerli təşkilatları, o cümlədən YAP Sabirabad rayon təşkilatı üçün də mühüm fəaliyyət istiqamətləri müəyyənləşdirir.
Sabirabad rayon təşkilatı bundan sonra da dövlət siyasətinin mahiyyətinin əhali arasında düzgün izah olunmasına, partiya üzvləri ilə işin gücləndirilməsinə, gənclərin və qadınların ictimai-siyasi proseslərdə fəallığının artırılmasına xüsusi diqqət yetirməlidir.
Xüsusilə gənclərlə iş yeni yanaşmalar tələb edir. Gənclərin müasir dünyagörüşünə, informasiya texnologiyalarından geniş istifadəsinə uyğun fəaliyyət formaları seçilməlidir. Onların dövlətçilik, vətənpərvərlik və milli dəyərlər ruhunda yetişdirilməsi mühüm əhəmiyyət daşıyır.
Sabirabad rayonunda YAP üzvlərinin sayının və ictimai fəallığının artması partiyanın rayon əhalisi arasında nüfuzunun göstəricilərindən biridir. Qarşıdakı dövrdə əsas məqsəd yalnız üzvlərin sayını artırmaq deyil, həm də hər bir partiya üzvünün ictimai-siyasi proseslərdə fəal iştirakını təmin etmək olmalıdır.
YAP üzvləri ölkəmizin inkişafı, dövlətçilik ənənələrinin qorunması və milli maraqlarımızın müdafiəsi istiqamətində fəal mövqe nümayiş etdirməlidirlər.
Azərbaycan bu gün öz tarixinin ən güclü mərhələlərindən birini yaşayır. Ərazi bütövlüyümüz və suverenliyimiz tam bərpa olunub, ölkəmizin beynəlxalq nüfuzu yüksəlib, iqtisadi və hərbi potensialımız güclənib. Qarşıda isə daha böyük hədəflər dayanır.
Prezident İlham Əliyevin Yeni Azərbaycan Partiyasının VIII Qurultayındakı nitqi məhz bu yeni mərhələnin əsas istiqamətlərini müəyyənləşdirən mühüm siyasi proqram kimi diqqəti cəlb edir.
Qurultay bir daha göstərdi ki, Yeni Azərbaycan Partiyası yalnız keçmiş nailiyyətləri qoruyan deyil, eyni zamanda gələcəyin məqsədlərini müəyyənləşdirən siyasi qüvvədir. Partiyanın əsas gücü xalqın etimadından, milli birliyə əsaslanan siyasi xəttindən və dövlətçilik prinsiplərinə sadiqliyindən qaynaqlanır.
Bu gün bizim əsas vəzifəmiz Azərbaycanın əldə etdiyi tarixi nailiyyətləri qorumaq, dövlətimizin daha da güclənməsinə öz töhfəmizi vermək, cəmiyyətin bütün təbəqələri ilə səmərəli işləmək və qarşıya qoyulan yeni hədəflərin həyata keçirilməsində fəal iştirak etməkdir.
İnanırıq ki, Prezident İlham Əliyevin rəhbərliyi ilə Azərbaycan bundan sonra da inkişaf, tərəqqi və Zəfərlər yolunda inamla irəliləyəcəkdir.
Yeni Azərbaycan Partiyasının VIII Qurultayında müəyyənləşdirilən məqsəd və vəzifələr bu yolda bizim üçün mühüm fəaliyyət istiqaməti olacaqdır.
Güclü Azərbaycan naminə birlik, həmrəylik və məsuliyyətlə çalışmaq hər birimizin vətəndaşlıq borcudur.

Daşqın Şıxəliyev

YAP Sabirabad rayon təşkilatının sədr müavini