Yeni Azərbaycan Partiyasının VIII Qurultayı: yeni mərhələnin əsas hədəfləri - ŞƏRH

Azərbaycan Respublikasının Prezidenti, Yeni Azərbaycan Partiyasının Sədri İlham Əliyevin Yeni Azərbaycan Partiyasının VIII Qurultayında etdiyi çıxış ölkənin siyasi və ictimai gündəmində mühüm yer tutan hadisələrdən biri oldu. Oktyabrın 2-də Bakıda, Heydər Əliyev Mərkəzində keçirilən qurultay Azərbaycanın ərazi bütövlüyünü və dövlət suverenliyini tam bərpa etdiyi yeni mərhələyə təsadüf etməsi baxımından xüsusi əhəmiyyət daşıyır. Dövlət başçısının nitqində həm Yeni Azərbaycan Partiyasının keçdiyi tarixi yola nəzər salındı, həm də qarşıdakı dövr üçün mühüm strateji istiqamətlər diqqətə çatdırıldı.

Yeni Azərbaycan Partiyasının yaranması Azərbaycanın mürəkkəb ictimai-siyasi proseslər yaşadığı bir dövrə təsadüf edib. Sonrakı illərdə partiyanın fəaliyyəti ölkədə siyasi sabitliyin möhkəmləndirilməsi, dövlətçilik ənənələrinin inkişaf etdirilməsi və milli maraqların qorunması ilə bağlı proseslərlə sıx şəkildə bağlı olub. Prezident İlham Əliyevin qurultaydakı çıxışında da partiyanın tarixi missiyasına və Azərbaycanın keçdiyi inkişaf yoluna xüsusi diqqət yetirilib.
Son illərdə Azərbaycanın iqtisadi imkanlarının genişlənməsi, beynəlxalq mövqelərinin möhkəmlənməsi və müdafiə potensialının artırılması ölkənin yeni siyasi reallıqlar şəraitində fəaliyyət imkanlarını genişləndirib. 2020-ci ildə 44 günlük Vətən müharibəsində əldə olunan Zəfər və 2023-cü ilin sentyabrında keçirilən lokal xarakterli antiterror tədbirlərindən sonra dövlət suverenliyinin tam bərpası Azərbaycanın müasir tarixində mühüm mərhələ yaradıb. VIII Qurultayın məhz bu reallıqlar fonunda keçirilməsi tədbirin siyasi əhəmiyyətini daha da artırıb.
Prezident İlham Əliyevin çıxışında iqtisadi müstəqillik və ölkənin malik olduğu potensialdan səmərəli istifadə məsələləri də geniş yer alıb. Azərbaycanın enerji sektorundakı mövqeyi, neft və qaz imkanları, enerji təhlükəsizliyinin təmin edilməsində ölkənin rolu və gələcək perspektivlər barədə mühüm fikirlər səsləndirilib. Dövlət başçısı enerji resurslarının Azərbaycanın beynəlxalq əhəmiyyətini artıran amillərdən biri olduğunu vurğulayıb.
Nəqliyyat və tranzit imkanlarının genişləndirilməsi də qurultayda diqqət çəkən istiqamətlərdən olub. Prezident İlham Əliyevin bildirdiyinə görə, 2026-cı ildə Azərbaycan ərazisindən keçən tranzit yüklərin həcminin 16 milyon tona çatacağı gözlənilir. Qarşıya qoyulan əsas hədəflərdən biri isə orta müddətdə bu göstəricini 30 milyon tona yüksəltməkdir. Orta Dəhliz və Şimal-Cənub nəqliyyat marşrutlarının inkişafı Azərbaycanın tranzit imkanlarını artırmaqla yanaşı, yeni iqtisadi imkanların və iş yerlərinin yaranmasına şərait yarada bilər.
Qurultayda Qarabağ və Şərqi Zəngəzurda həyata keçirilən genişmiqyaslı bərpa və quruculuq layihələri də diqqət mərkəzində olub. Hazırda azad edilmiş ərazilərdə yaşayışın bərpası, infrastrukturun qurulması və əhalinin doğma yurdlarına qayıdışının təmin edilməsi istiqamətində işlər davam etdirilir. Prezidentin çıxışında bildirilib ki, indiyədək bu bölgələrin inkişafına 28 milyard manat vəsait ayrılıb, 48 yaşayış məntəqəsində keçmiş məcburi köçkünlər artıq məskunlaşıb. Bu prosesin növbəti illərdə daha da sürətləndirilməsi nəzərdə tutulur.
VIII Qurultayın diqqət çəkən məqamlarından biri də təhlükəsizlik məsələsinin yeni reallıqlar çərçivəsində nəzərdən keçirilməsi olub. Azərbaycanın əldə etdiyi tarixi nəticələrdən sonra qarşıda dayanan vəzifələr sırasında dövlətin müdafiə imkanlarının daim gücləndirilməsi məsələsi də xüsusi yer tutur. Prezident İlham Əliyev çıxışında hərbi gücün artırılmasının hər bir dövlət üçün zəruri olduğunu qeyd edib.
Müasir dövrdə informasiya və ideoloji təhlükəsizlik məsələləri də siyasi və ictimai həyatın mühüm istiqamətlərindən birinə çevrilib. Bu baxımdan cəmiyyətin, xüsusilə gənc nəslin informasiya təsirlərinə qarşı dayanıqlılığının artırılması, milli dəyərlərin və dövlətçilik düşüncəsinin qorunması aktuallığını saxlayır. Yeni dövrdə siyasi təşkilatların fəaliyyətində də bu istiqamətlərin nəzərə alınması əhəmiyyətlidir.
Qurultayda Azərbaycanın beynəlxalq münasibətlər sistemindəki mövqeyi və xarici siyasətinin əsas istiqamətləri barədə də fikirlər səsləndirilib. Azərbaycanın iqtisadi imkanlarının artması, enerji və nəqliyyat layihələrində rolunun genişlənməsi ölkənin regional və beynəlxalq əhəmiyyətini artıran amillər sırasında göstərilir. Prezident İlham Əliyev Azərbaycanın iqtisadi müstəqilliyini təmin etdiyini və beynəlxalq müstəvidə mövqelərinin möhkəmləndiyini bildirib.
Beləliklə, Yeni Azərbaycan Partiyasının VIII Qurultayı yalnız partiyanın təşkilati məsələlərinin müzakirə edildiyi tədbir kimi deyil, Azərbaycanın yeni mərhələdə qarşısında dayanan vəzifələrin də nəzərdən keçirildiyi siyasi platforma kimi diqqəti cəlb edir. Qurultayda səsləndirilən fikirlər təhlükəsizlikdən iqtisadi inkişafa, enerji və nəqliyyat imkanlarından Qarabağ və Şərqi Zəngəzurun bərpasına, beynəlxalq əlaqələrdən informasiya təhlükəsizliyinə qədər geniş istiqamətləri əhatə edib.
Prezident İlham Əliyevin çıxışında vurğulanan məsələlər göstərir ki, Azərbaycanın qarşıdakı inkişaf gündəliyində əldə edilmiş nəticələrin qorunması ilə yanaşı, yeni imkanlardan istifadə və uzunmüddətli hədəflərin həyata keçirilməsi də mühüm yer tutur. Bu baxımdan VIII Qurultay Yeni Azərbaycan Partiyasının fəaliyyətində yeni dövrün prioritetlərinin müəyyənləşdirilməsi və qarşıdakı mərhələnin əsas istiqamətlərinin ortaya qoyulması baxımından əlamətdar hadisə kimi qiymətləndirilə bilər.

İlkin Bağırov
YAP Babək rayon təşkilatının əməkdaşı