Milli kimlik, vətənpərvərlik və təhsil – gələcəyin məsuliyyətli nəslinin formalaşması

Hər bir xalqın gələcəyi onun yetişdirdiyi gənc nəslin bilik səviyyəsindən, mənəvi dəyərlərindən və dövlətçilik düşüncəsindən asılıdır. Gənclərin milli kimliyini qoruyaraq müasir dünyanın çağırışlarına uyğun inkişaf etməsi, cəmiyyətin həyatında fəal iştirak etməsi və ölkəsinin gələcəyinə məsuliyyətlə yanaşması davamlı inkişafın mühüm şərtləridir. Bu keyfiyyətlərin formalaşmasında isə təhsil müəssisələri xüsusi yer tutur.

Məktəb uşaqların ilk ciddi ictimai təcrübə qazandığı, kollektivdə davranmağı, fərqli fikirlərə hörmət etməyi və üzərinə düşən vəzifələri yerinə yetirməyi öyrəndiyi məkandır. Burada tətbiq edilən qaydalar məktəbin gündəlik fəaliyyətinin təşkili ilə yanaşı, şagirdlərin məsuliyyət hissinin inkişafına da təsir göstərə bilər. Dövlət ümumi təhsil müəssisələrində təhsilalanların və təhsilverənlərin geyimi ilə bağlı tələblər də bu baxımdan məktəb həyatının təşkilinə aid məsələlərdən biri kimi nəzərdən keçirilir.

Azərbaycanın müstəqil dövlət kimi qazandığı uğurların qorunması və gələcək nəsillərə ötürülməsi hər bir vətəndaşın məsuliyyətini artırır. Ölkəmiz mürəkkəb beynəlxalq şəraitdə öz milli maraqlarını qorumaq, iqtisadi potensialını gücləndirmək və beynəlxalq münasibətlər sistemində nüfuzunu artırmaq istiqamətində fəaliyyət göstərir. Bu nailiyyətlərin davamlı olması üçün cəmiyyətin intellektual potensialının inkişaf etdirilməsi və gənclərin müasir biliklərə yiyələnməsi mühüm əhəmiyyət daşıyır.
Azərbaycan Respublikasının Prezidenti İlham Əliyevin Yeni Azərbaycan Partiyasının VIII Qurultayında səsləndirdiyi fikirlər də bu istiqamətdə mühüm məqamları ön plana çıxarır. Dövlət başçısı ideoloji təhlükəsizliyin fiziki təhlükəsizlik qədər vacib olduğunu qeyd edərək xalqın təhsilli, bilikli və savadlı olmasının ideoloji təxribatlara qarşı dayanıqlılığın gücləndirilməsində əhəmiyyətini vurğulayıb. Prezidentin bu yanaşması təhsilin dövlətin uzunmüddətli təhlükəsizliyi və inkişafı baxımından rolunu aydın şəkildə ortaya qoyur.
İdeoloji təhlükəsizlik anlayışı yalnız müəyyən məlumatların qəbul edilməsi və ya rədd edilməsi ilə məhdudlaşmır. Bu, insanların müstəqil düşünmək, müxtəlif mənbələrdən əldə etdikləri məlumatları müqayisə etmək, faktları yoxlamaq və hadisələrə əsaslandırılmış münasibət bildirmək bacarığı ilə sıx bağlıdır. Xüsusilə rəqəmsal informasiya mühitində yaşayan gənclər üçün media savadlılığı və tənqidi düşüncə mühüm bacarıqlardır. Məktəb bu bacarıqların formalaşması üçün əsas imkanlardan birini yaradır.
Mənim qənaətimcə, Azərbaycanın gələcək inkişafına ən böyük töhfə savadlı, milli dəyərlərinə bağlı, eyni zamanda müstəqil düşünməyi bacaran gənclərin yetişdirilməsi olacaq.

Şəfiqə Qədirova

YAP Nərimanov rayon təşkilatının fəal gənci