Azərbaycan və Mərkəzi Asiyanın yeni inkişaf mərhələsi

​ Azərbaycanın ötən ilin noyabrında Mərkəzi Asiya dövlət başçılarının məşvərət formatına tamhüquqlu üzv kimi qoşulması ölkəmizin xarici siyasətində və regionun taleyində çox parlaq və əlamətdar bir səhifə açdı. Bu mühüm hadisə təsadüfi deyil; əsrlər boyu bir-birinə bağlı olan, eyni kökdən, eyni mədəniyyətdən və adət-ənənələrdən gələn qardaş xalqların təbii olaraq yenidən bir araya gəlməsinin, güclərini birləşdirməsinin ən gözəl nümunəsidir.
​ Bu gün Xəzər dənizinə baxanda artıq uzaq sahillər deyil, bizi qovuşduran geniş bir qardaşlıq meydanı görürük. Xəzər artıq ayıran sərhəd deyil, əksinə, Mərkəzi Asiya ilə Azərbaycanı və bütün Cənubi Qafqazı bir-birinə bağlayan nəhəng, etibarlı və fasiləsiz işləyən bir körpüdür. Ortak dəyərlərimiz, dilimiz, dini və tarixi köklərimiz dövlətlərimiz arasındakı dostluğun heç vaxt sarsılmayacaq ən möhkəm təməlidir.
​ Son dövrlərdə dünyada baş verən qlobal dəyişikliklər, logistik çətinliklər və yeni iqtisadi çağırışlar ticarət yollarının şaxələndirilməsini vacib şərtə çevirib. Məhz bu məqamda Azərbaycanın fəal iştirakı ilə reallaşan Orta Dəhliz layihəsi bütün regionun iqtisadi damarına çevrilib. Mərkəzi Asiya respublikalarının zəngin təbii sərvətləri, kənd təsərrüfatı məhsulları və malları Azərbaycanın müasir dəmir yolları, limanları və magistralları vasitəsilə rahatlıqla dünya bazarlarına çıxarılır. Bu isə təkcə dövlətlərin büdcəsinə deyil, həm də bölgədə yaşayan hər bir insanın rifahına birbaşa müsbət təsir göstərir.
​ Amma əməkdaşlıq təkcə ənənəvi yüklərin daşınması ilə məhdudlaşmır. Bu gün gələcəyin texnologiyaları və yaşıl enerji layihələri üzərində də sıx işlənilir. Xəzər dənizinin dibi ilə çəkiləcək enerji və kabel xətləri, rəqəmsal ticarət şəbəkələri, eləcə də birgə istesalat sahələri ölkələrimizi daha da yakınlaşdırır. Hər bir layihə sabahkı günümüzü daha təhlükəsiz, daha bol və rahat edir.
​ Azərbaycanın yaxın illərdə bu mötəbər formata sədrlik etməsi də ölkəmizə göstərilən böyük etimadın və hörmətin açıq təzahürüdür. Sədrliyimiz dövründə qarşıya qoyulan əsas məqsədlər olduqca aydındır: regionda sülhü, əmin-amanlığı və sabitliyi qorumaq, ölkələr arasında gediş-gəlişi, sərhəd və gömrük prosedurlarını mümkün qədər asanlaşdırmaq, iş adamları üçün yeni imkanlar açmaq. Eyni zamanda, sadə vətəndaşların, gənclərin, elm və incəsənət adamlarının bir-biri ilə daha çox ünsiyyət qurması, təcrübə mübadiləsi aparması üçün geniş qapılar açılır.
​ Bu çərçivədə birgə təşkil olunacaq mədəniyyət günləri, gənclər forumları və elmi konfranslar xalqlarımız arasındakı mənəvi bağları daha da sarsılmaz edəcəkdir. Birgə investisiya fondlarının yaradılması isə kiçik və orta sahibkarlığın inkişafına təkan verərək regional məşğulluğu əhəmiyyətli dərəcədə artıracaq. Eyni zamanda, Naxçıvan vasitəsilə açılan yeni nəqliyyat və logistika imkanları Türk dünyasının vahid coğrafi və iqtisadi məkan kimi formalaşmasını sürətləndirir. Şübhəsiz ki, bu strateji tərəfdaşlıq təkcə bugünkü deyil, gələcək nəsillərin də sülh və firavanlıq içində yaşamasına zəmin yaradır. Yaranan bu yeni reallıq Azərbaycanın regional liderliyini daha da möhkəmləndirməklə yanaşı, Türk dünyasının qlobal miqyasda vahid və güclü bir güc mərkəzinə çevrilməsini təmin edir.
​ Ötən ilin noyabrında atılan bu addım artıq hər gün həyatımızda hiss olunan real bəhrələrini verməkdədir. Azərbaycan və Mərkəzi Asiya dövlətləri çiyin-çiyinə verərək yalnız öz regionlarında deyil, bütün Avrasiya məkanında sülhün, tərəqqinin və inkişafın əsas dayağına çevrilirlər. Bu birlik həm də hamımızın uşaqları üçün qurduğumuz daha etibarlı və işıqlı gələcəyin ən güclü zəmanətidir.

​Sevda Həsənli
YAP Şahbuz rayon təşkilatının fəal üzvü