YAP-ın VIII Qurultayının Strateji Kodları - ŞƏRH

Azərbaycan dövlətçilik tarixinin dönüş nöqtələrini təhlil edərkən görürük ki, mühüm siyasi prosesseslər yalnız bir təşkilatın gündəliyi ilə məhdudlaşmır, ölkənin ümumi inkişaf strategiyasını şərtləndirir. Yeni Azərbaycan Partiyasının (YAP) VIII Qurultayı və partiyamızın Sədri, Prezident cənab İlham Əliyevin bu mötəbər tribunadan səsləndirdiyi proqram xarakterli nitq məhz belə konseptual əhəmiyyətə malikdir. Ölkəmizin hər bir guşəsində xalqımızın dəstəyi bir daha göstərir ki, YAP-ın müəyyənləşdirdiyi prioritetlər birbaşa milli maraqlarımızla üst-üstə düşür. Siyasi analitikanın prizmasından baxdıqda, VIII Qurultayın verdiyi əsas mesajları və "Yeni Dövr"ün ideoloji təməllərini bir neçə strateji xətt üzrə dəyərləndirmək lazımdır.

Cənab Prezidentin nitqində ən diqqətçəkən məqamlardan biri 1990-cı illərin başlanğıcındakı xaos dövrü ilə bu günün reallıqları arasında paralellərin aparılması və tarixi həqiqətlərin dürüst qiymətləndirilməsidir. Ulu Öndər Heydər Əliyevin Moskvadakı vəzifəsindən uzaqlaşdırılmasından dərhal sonra başlayan erməni separatizmi və Bakıdakı naşı, səriştəsiz rəhbərliyin torpaqlarımızı itirməsi göstərdi ki, siyasi varislik və güclü lider amili dövlətin varlığı üçün həyati əhəmiyyət kəsb edir. 1992-ci ilin noyabrında Naxçıvanda YAP-ın təsis olunması sadəcə bir partiyanın yaranması deyildi; bu, parçalanmaqda olan Azərbaycanın xilas edilməsi üçün xalqın verdiyi təbii ictimai sifariş idi.

Digər tərəfdən, VIII Qurultay partiyamızın tarixində xüsusi bir mərhələdə - Azərbaycanın həm 44 günlük Vətən müharibəsində, həm də antiterror tədbirlərində tam Zəfər qazanaraq dövlət suverenliyini respublikanın hər bir nöqtəsində bərpa etdiyi dövrdə keçirildi. Cənab İlham Əliyevin qeyd etdiyi kimi, bu Qələbə yalnız hərbi üstünlük deyil, həm də uzaqgörən siyasi strategiyanın, iqtisadi müstəqilliyin və milli birliyin məntiqi nəticəsidir. Əldə olunmuş bu tarixi nəticələrin möhkəmləndirilməsi və regionda yaranmış yeni geosiyasi reallıqların qorunması partiyamızın əsas xarici və daxili siyasət prioritetidir.

Bununla yanaşı, qurultayda dövlət başçımızın xüsusi diqqət ayırdığı məsələlərdən biri müasir dünyada getdikcə artan ideoloji risklər və kənardan təsir cəhdləri oldu. İnformasiya texnologiyalarının və daxili-xarici çağırışların inkişaf etdiyi bir dövrdə ideoloji təxribatlara qarşı möhkəm daxili qalxan yaratmaq həyati zərurətdir. Xüsusilə gənc nəslin və tələbələrin milli-mənəvi dəyərlərə bağlılığı, vətənpərvərlik ruhunda tərbiyəsi və keçmişdə yaşanan acı dərsləri unutmaması üçün ideoloji işin keyfiyyətcə yeni müstəviyə qaldırılması tələb olunur.

YAP-ın gücü təkcə mərkəzi strukturlarda deyil, yerlərdə fəaliyyət göstərən ərazi partiya təşkilatında və onların formalaşdırdığı sağlam ictimai münasibətlərdədir. "Yeni Dövr"ün tələbi odur ki, ərazi təşkilatlarının fəaliyyəti formal tədbirlərlə məhdudlaşmamalı, əhali ilə birbaşa ünsiyyətə, vətəndaş müraciətlərinin öyrənilməsinə və sosial təşəbbüslərə yönəlməlidir. Hər bir partiya üzvü dövlət siyasətinin mahiyyətini dərindən dərk etməli, onu ictimaiyyətə düzgün çatdırmalı və gündəlik fəaliyyətində şəxsi nümunə göstərməlidir. Eyni zamanda, gənclərin siyasi mühitə inteqrasiyası və onların təşəbbüskar kimi ortaya çıxması üçün yeni imkanlar yaradılmalıdır.

Yekun olaraq qeyd etmək lazımdır ki, Yeni Azərbaycan Partiyası yarandığı gündən bəri Azərbaycanın taleyüklü məsələlərinin həllində hərəkətverici qüvvə olmuşdur. VIII Qurultay bir daha təsdiqlədi ki, YAP köhnə şablonlarla kifayətlənən deyil, zamanın çağırışlarına uyğun olaraq özünü yeniləyən, ölkənin gələcək inkişaf xəritəsini cızan müasir siyasi avanqarddır. Prezident İlham Əliyevin rəhbərliyi ilə başlanan bu "Yeni Dövr"də hər bir partiya üzvünün üzərinə düşən məsuliyyət - qazanılmış tarixi Zəfəri əbədi etmək, dövlətçiliyimizin ideoloji əsaslarını sarsılmaz qılmaq və güclü Azərbaycan naminə yorulmadan çalışmaqdır.

Gəray Zeynallı

YAP Laçın rayon təşkilatının fəalı