Tarixi ədalətin səsi, Zəfərin qüruru və sülhün məsuliyyəti - ŞƏRH

Bəzən bir siyasi çıxış bütöv bir xalqın yaşadığı ağrıları, qazandığı tarixi qələbəni və gələcəyə olan inamını özündə birləşdirir. Prezident İlham Əliyevin 2026-cı il oktyabrın 15-də Bakıda keçirilən AQEM-in VII Zirvə Görüşündəki çıxışı da məhz belə bir məzmun daşıyırdı. Bu çıxışda Azərbaycanın tarixi həqiqətləri, milli qüruru, beynəlxalq hüquqa münasibəti və sülhə sadiqliyi aydın ifadəsini tapdı.
Azərbaycan xalqı uzun illər işğalın ağrı-acısını yaşayıb. Doğma torpaqlarından didərgin düşən soydaşlarımızın həsrəti, dağıdılmış şəhər və kəndlərimiz, məhv edilmiş tarixi və dini abidələrimiz yaddaşımızda silinməz izlər buraxıb. Bir milyona yaxın azərbaycanlının öz yurdlarından qovulması xalqımıza qarşı törədilmiş ağır ədalətsizliyin nəticəsi idi. Bütün bunlar baş verərkən beynəlxalq hüququn müdafiəsinə cavabdeh olan mexanizmlərin səmərəsizliyi ədalətə olan inamı ciddi sınağa çəkirdi.
Prezident İlham Əliyev Zirvə Görüşündə bu həqiqətləri dünya ictimaiyyətinin diqqətinə çatdıraraq bir daha göstərdi ki, tarix unudulmamalı, hüquq prinsipləri siyasi maraqlardan asılı vəziyyətə salınmamalıdır. Dövlət başçısının çıxışında BMT Təhlükəsizlik Şurasının qətnamələrinin uzun illər icra olunmaması xüsusi vurğulandı. Bu, yalnız Azərbaycanın problemi deyildi. Bu, beynəlxalq sistemin öz prinsiplərinə nə dərəcədə sadiq qalması məsələsi idi.
Azərbaycan xalqı öz hüquqlarını bərpa etmək üçün böyük iradə və əzmkarlıq nümayiş etdirdi. Prezident, Müzəffər Ali Baş Komandan İlham Əliyevin rəhbərliyi ilə qazanılmış tarixi Zəfər ərazi bütövlüyümüzün və suverenliyimizin bərpasına aparan yolun ən mühüm mərhələsi oldu. Bu qələbə xalqımızın birliyinin, ordumuzun qəhrəmanlığının və dövlətimizin qətiyyətinin təntənəsinə çevrildi. Şəhidlərimizin müqəddəs xatirəsi, qazilərimizin fədakarlığı və müharibə iştirakçılarımızın cəsarəti bu tarixin mənəvi dayağıdır.
Lakin Prezident İlham Əliyevin çıxışını fərqləndirən mühüm məqamlardan biri qələbənin yalnız hərbi nəticələrlə ölçülməməsi idi. Dövlət başçısı bildirdi ki, Azərbaycan müharibədə qalib gəldikdən sonra məğlub vəziyyətdə olan tərəfə zərbə endirməyib, qisasçılıq siyasəti yürütməyib və sülh təklif edib. Bu yanaşma xalqımızın mənəvi dəyərlərini, humanizmini və gələcəyə məsuliyyətlə baxışını nümayiş etdirir.
Prezidentin “Biz sülh təklif etdik və bir ildən bir az çoxdur ki, sülh içində yaşayırıq. Bu sülh hələ də kövrəkdir, onu qorumaq və möhkəmləndirmək lazımdır” fikri xüsusi əhəmiyyət daşıyır. Bu sözlər həm tarixi təcrübədən doğan xəbərdarlıq, həm də gələcəyə yönəlmiş siyasi mesajdır. Sülh yalnız sənədlərlə təsdiqlənən razılaşma deyil; o, qarşılıqlı etimad, məsuliyyət, beynəlxalq hüquqa hörmət və siyasi iradə tələb edir.
Bakıda keçirilən AQEM Zirvə Görüşü bu mesajın beynəlxalq auditoriyaya çatdırılması baxımından da mühüm platforma oldu. Azərbaycan bir tərəfdən özünün üzləşdiyi haqsızlıqları unutmur, digər tərəfdən isə dövlətlər arasında dialoqun, əməkdaşlığın və qarşılıqlı anlaşmanın güclənməsinə çalışır. Bu, güclü dövlət olmağın məsuliyyətini dərk edən xalqın mövqeyidir.
Prezident İlham Əliyevin çıxışı bizə bir daha xatırlatdı ki, Zəfərimiz yalnız torpaqlarımızın azadlığı deyil, milli ləyaqətimizin, tarixi yaddaşımızın və ədalətə inamımızın təntənəsidir. Bu gün Azərbaycanın qarşısında duran əsas vəzifələrdən biri əldə olunmuş nailiyyətləri qorumaq, regionda davamlı sülhü möhkəmləndirmək və gələcək nəsillərə təhlükəsiz həyat bəxş etməkdir.
Azərbaycan öz haqqını müdafiə etməyi bacaran, qələbəsinin qədrini bilən və sülhün əhəmiyyətini dərindən anlayan dövlətdir. Bu yolun əsas istiqamətini isə Prezident İlham Əliyevin qətiyyətli siyasəti, milli maraqlara sədaqəti və müstəqil Azərbaycanın gələcəyinə inamı müəyyən edir.

Gündüz Bayramov

YAP Samux rayon təşkilatının sədri