Azərbaycanın inkişafı beynəlxalq nüfuzumuzun əsas göstəricisidir - ŞƏRH

Cənab Prezident İlham Əliyevin “Biz özümüzü beynəlxalq birliyin etibarlı və hörmətli bir üzvü kimi təqdim edə bilmişik, bizim inkişafımız göz qabağındadır” fikirləri Azərbaycanın son illərdə keçdiyi inkişaf yolunu, qazandığı nailiyyətləri və beynəlxalq aləmdə möhkəmlənən mövqeyini aydın şəkildə ifadə edir. Bu sözlərə diqqət yetirdikdə görürük ki, ölkəmizin bugünkü uğurları təsadüfi deyil, uzun illər ərzində həyata keçirilən məqsədyönlü siyasətin və görülən ardıcıl işlərin nəticəsidir.
Azərbaycan müstəqilliyini bərpa etdikdən sonra qarşısında duran ən mühüm məsələlərdən biri güclü iqtisadiyyat qurmaq, dövlətçiliyini möhkəmləndirmək və beynəlxalq münasibətlər sistemində öz layiqli yerini tutmaq idi. Bu istiqamətdə atılan addımlar zaman keçdikcə öz nəticəsini göstərdi. Xüsusilə iqtisadi sahədə aparılan islahatlar, ölkəyə cəlb olunan investisiyalar, sənaye və kənd təsərrüfatının inkişafı Azərbaycanın iqtisadi potensialının genişlənməsinə mühüm təsir göstərdi.
Bu gün ölkəmizin inkişafından danışarkən, ilk növbədə, iqtisadiyyatımızın müxtəlif sahələrində əldə olunan nailiyyətləri qeyd etmək lazımdır. Azərbaycanın iqtisadi gücünün artması, yeni istehsal müəssisələrinin yaradılması, sahibkarlığın inkişafına göstərilən dövlət dəstəyi və qeyri-neft sektorunun genişləndirilməsi gələcək inkişafımız üçün mühüm zəmin yaradır. Çünki hər bir dövlətin davamlı inkişafı yalnız bir sahədən deyil, iqtisadiyyatın bütün istiqamətlərinin paralel şəkildə inkişafından asılıdır.
İqtisadi inkişafın ən mühüm göstəricilərindən biri də onun insanların gündəlik həyatında necə əks olunmasıdır. Yeni iş yerlərinin açılması, əhalinin məşğulluğunun artırılması, sosial layihələrin həyata keçirilməsi, təhsil və səhiyyə müəssisələrinin yenilənməsi, yolların və digər infrastruktur obyektlərinin tikilməsi bu inkişafın real nəticələridir. İnsanlar yaşadıqları ərazilərdə müsbət dəyişiklikləri gördükcə ölkənin gələcəyinə inamları da artır.
Xüsusilə regionların sosial-iqtisadi inkişafına göstərilən diqqət bu baxımdan böyük əhəmiyyət daşıyır. Son illərdə şəhər və kəndlərimizdə həyata keçirilən abadlıq-quruculuq işləri, yol infrastrukturunun yenilənməsi, su və elektrik təminatının yaxşılaşdırılması, yeni sosial obyektlərin tikilməsi bölgələrin inkişafına öz töhfəsini verir. Əvvəllər müəyyən çətinliklərlə üzləşən bir çox yaşayış məntəqələrində bu gün müasir tələblərə uyğun şərait yaradılır. Bütün bunlar onu göstərir ki, ölkənin inkişafı yalnız paytaxtla məhdudlaşmamalı, hər bir bölgədə, hər bir kənddə hiss olunmalıdır.
Kənd təsərrüfatının inkişafı da iqtisadiyyatımızın mühüm istiqamətlərindən biridir. Torpaq və su ehtiyatlarından səmərəli istifadə, fermerlərə göstərilən dəstək, müasir texnologiyaların tətbiqi ərzaq təhlükəsizliyinin təmin olunmasında mühüm rol oynayır. Xüsusilə kənd yerlərində yaşayan əhalinin məşğulluğunun artırılması və yerli istehsalın genişləndirilməsi baxımından bu sahənin inkişafı böyük əhəmiyyət daşıyır.
Digər tərəfdən, Azərbaycanın beynəlxalq iqtisadi əlaqələrinin genişlənməsi də ölkəmizin nüfuzunu artıran əsas amillərdəndir. Enerji layihələri, nəqliyyat dəhlizləri, beynəlxalq əməkdaşlıq və ticarət əlaqələri Azərbaycanı mühüm tərəfdaşlardan birinə çevirir. Bu gün ölkəmiz yalnız öz iqtisadi imkanlarını inkişaf etdirmir, eyni zamanda regionda və daha geniş coğrafiyada əməkdaşlıq üçün yeni imkanların yaranmasına da töhfə verir.
Beynəlxalq birliyin etibarlı və hörmətli üzvü olmaq, əlbəttə ki, böyük məsuliyyət tələb edir. Bunun üçün iqtisadi güclə yanaşı, sabitlik, qarşılıqlı etimad, müstəqil siyasət və tərəfdaşlarla münasibətlərdə etibarlılıq da mühüm rol oynayır. Azərbaycanın müxtəlif dövlətlərlə qurduğu əlaqələr, beynəlxalq tədbirlərdə iştirakı və əməkdaşlıq layihələri ölkəmizin dünya miqyasında tanınmasına və mövqeyinin möhkəmlənməsinə şərait yaradır.
Mənim fikrimcə, bu inkişafın ən dəyərli tərəfi ondan ibarətdir ki, ölkəmiz əldə etdiyi imkanlardan gələcək nəsillərin rifahı naminə istifadə etməyə çalışır. Bu gün görülən hər bir quruculuq işi, istifadəyə verilən hər bir yeni obyekt, yaradılan hər bir iş yeri sabahımız üçün qoyulan bir sərmayədir. Ona görə də əldə olunan nailiyyətləri qorumaqla yanaşı, onların davamlılığını təmin etmək də hər birimizin qarşısında duran mühüm vəzifədir.
Dövlətin inkişafı yalnız dövlət qurumlarının fəaliyyəti ilə məhdudlaşmır. Bu prosesdə hər bir vətəndaşın, hər bir müəssisənin və hər bir yerli idarəetmə orqanının öz məsuliyyəti vardır. İnsanların yaşadıqları ərazilərin abadlaşdırılması, mövcud imkanlardan düzgün istifadə edilməsi, yerli problemlərin həllinə diqqət göstərilməsi ümumi inkişafımıza verilən töhfələrdəndir. Hər birimiz öz fəaliyyət sahəmizdə məsuliyyətlə çalışmaqla ölkəmizin tərəqqisinə dəstək ola bilərik.
Nəticə etibarilə, cənab Prezidentin səsləndirdiyi bu fikirlər Azərbaycanın bugünkü inkişaf mənzərəsini və qarşıya qoyulan gələcək hədəfləri özündə əks etdirir. Ölkəmizin iqtisadi imkanlarının genişlənməsi, beynəlxalq əlaqələrinin möhkəmlənməsi və regionların inkişafı bir-biri ilə sıx bağlı olan proseslərdir. Əsas məsələ bu inkişafı davam etdirmək, əldə olunan uğurları qorumaq və daha böyük nəticələrə nail olmaqdır.

Gülçin Calalova

YAP Şərur rayon Təşkilatının fəal üzvü