Zəfərə aparan yol: güclü dövlət, güclü iqtisadiyyat və qüdrətli ordu - ŞƏRH

Azərbaycan xalqının tarixində elə hadisələr var ki, onların əhəmiyyəti yalnız baş verdiyi dövrlə məhdudlaşmır, gələcək nəsillərin taleyinə, milli yaddaşına və dövlətçilik düşüncəsinə də təsir göstərir. 2020-ci il sentyabrın 27-də başlayan və 44 gün davam edən Vətən müharibəsində qazanılmış tarixi Qələbə məhz belə hadisələrdəndir. Bu Zəfər uzun illər davam edən işğala son qoymaqla yanaşı, Azərbaycanın dövlətçilik tarixində yeni mərhələnin əsasını qoydu. Lakin 44 gün ərzində əldə edilən nəticə öz-özünə yaranmamışdı. Onun arxasında illərlə aparılan məqsədyönlü siyasət, güclü iqtisadiyyatın formalaşdırılması, müasir ordu quruculuğu və milli maraqlara əsaslanan ardıcıl dövlət strategiyası dayanırdı.
Azərbaycan müstəqilliyini bərpa etdikdən sonra ağır siyasi, iqtisadi və hərbi sınaqlarla üzləşmişdi. Ermənistanın ölkəmizə qarşı hərbi təcavüzü nəticəsində torpaqlarımızın bir hissəsi işğal edilmiş, bir milyondan çox soydaşımız qaçqın və məcburi köçkün vəziyyətinə düşmüşdü. Ölkə qarşısında duran əsas vəzifələrdən biri ərazi bütövlüyünün bərpası üçün zəruri siyasi, iqtisadi və hərbi potensialın yaradılması idi. Bu məqsədə nail olmaq isə yalnız bəyanatlarla deyil, uzunmüddətli və sistemli fəaliyyətlə mümkün ola bilərdi.
2003-cü ildən etibarən Prezident İlham Əliyevin rəhbərliyi ilə həyata keçirilən siyasətin əsas istiqamətlərindən biri Azərbaycanın hərtərəfli gücləndirilməsi oldu. Dövlət başçısının vurğuladığı kimi: “Prezident kimi 2003-cü ildən bu günə qədər bütün addımlarım Azərbaycanın gücləndirilməsinə yönəldilmişdir. Vətən müharibəsinə qədər bütün addımlarım bir amala xidmət edirdi ki, biz torpaqlarımızı azad edək, düşməni torpağımızdan qovaq və biz buna nail olduq”.
Bu fikirlər Azərbaycanın müharibəyə qədər keçdiyi inkişaf yolunun mahiyyətini ifadə edir. Çünki torpaqların azad edilməsi üçün ilk növbədə güclü dövlət qurulmalı, iqtisadi müstəqillik təmin edilməli, ölkənin müdafiə qabiliyyəti yüksəldilməli və beynəlxalq münasibətlər sistemində Azərbaycanın mövqeləri möhkəmləndirilməli idi.
İqtisadi inkişaf bu strategiyanın mühüm dayaqlarından birinə çevrildi. Ölkənin maliyyə imkanlarının genişlənməsi, enerji sektorunun inkişafı, nəqliyyat və infrastruktur layihələrinin həyata keçirilməsi, qeyri-neft sektorunun təşviqi Azərbaycanın iqtisadi potensialını artırdı. İqtisadi müstəqillik dövlətə öz prioritetlərini müəyyənləşdirmək, milli maraqlara uyğun qərarlar qəbul etmək və uzunmüddətli hədəflərini reallaşdırmaq üçün geniş imkanlar yaratdı. Eyni zamanda, iqtisadi gücün artması müdafiə və təhlükəsizlik sahəsinə daha böyük resursların yönəldilməsinə şərait yaratdı.
Burada mühüm məqam ondan ibarət idi ki, iqtisadi inkişaf yalnız sosial rifahın yüksəldilməsi və infrastrukturun yenilənməsi ilə məhdudlaşmırdı. O, Azərbaycanın hərbi qüdrətinin artırılmasına da xidmət edirdi. Müdafiə xərclərinin yüksəldilməsi, ordunun müasir silah və texnika ilə təchiz olunması, hərbi təhsil və hazırlıq sisteminin təkmilləşdirilməsi, müdafiə sənayesinin inkişafı ardıcıl dövlət siyasətinin tərkib hissəsi idi. Azərbaycan öz təhlükəsizliyini təmin etmək üçün zəruri imkanları formalaşdırır, ordusunu dövrün tələblərinə uyğun yeniləyirdi.
Müasir ordu quruculuğu yalnız silah və texnika almaqdan ibarət deyildi. Peşəkar hərbi kadrların hazırlanması, şəxsi heyətin döyüş hazırlığının artırılması, idarəetmə sisteminin təkmilləşdirilməsi və müasir hərbi texnologiyaların tətbiqi də bu prosesin mühüm istiqamətlərini təşkil edirdi. Azərbaycan Ordusu illər ərzində keçirilən təlimlər, beynəlxalq hərbi əməkdaşlıq və praktiki hazırlıq nəticəsində yüksək döyüş qabiliyyətinə malik qüvvəyə çevrildi. Hərbi sənaye kompleksinin inkişafı isə ölkənin müdafiə ehtiyaclarının təmin olunmasında əlavə imkanlar yaratdı.
Bütün bunlarla yanaşı, Azərbaycanın beynəlxalq siyasəti də milli maraqların qorunmasına və mövqelərin möhkəmləndirilməsinə yönəlmişdi. Enerji təhlükəsizliyi, nəqliyyat dəhlizləri, regional əməkdaşlıq və müxtəlif dövlətlərlə qurulan tərəfdaşlıq münasibətləri ölkəmizin beynəlxalq nüfuzunu artırırdı. Azərbaycan regional və qlobal proseslərdə etibarlı tərəfdaş kimi mövqeyini gücləndirir, özünün siyasi və iqtisadi imkanlarını genişləndirirdi. Bu amillər ölkənin müstəqil siyasət yürütməsi və milli maraqlarını qətiyyətlə müdafiə etməsi baxımından mühüm əhəmiyyət daşıyırdı.
Beləliklə, 2020-ci ilə qədər görülən işlər bir-birindən ayrı tədbirlər deyil, vahid strateji məqsədə xidmət edən ardıcıl fəaliyyətin tərkib hissələri idi. Güclü iqtisadiyyat güclü ordunun formalaşmasına, müasir ordu isə dövlətin təhlükəsizlik və suverenlik imkanlarının genişlənməsinə xidmət edirdi. Siyasi iradə, iqtisadi potensial, hərbi hazırlıq və xalqın milli birliyi vahid məqsəd ətrafında birləşirdi.
Vətən müharibəsi bu hazırlığın real nəticəsini nümayiş etdirdi. Azərbaycan Ordusu 44 gün ərzində döyüş meydanında böyük qəhrəmanlıq və peşəkarlıq göstərərək işğal altındakı ərazilərin əhəmiyyətli hissəsini azad etdi. Müharibənin gedişində əldə edilən uğurlar illər ərzində aparılmış ordu quruculuğunun, düzgün müəyyənləşdirilmiş hərbi strategiyanın və Ali Baş Komandanın qətiyyətli rəhbərliyinin nəticəsi idi. Azərbaycan dövləti və xalqı qarşıya qoyduğu tarixi məqsədə nail olmaq üçün bütün imkanlarını səfərbər etdi.
Zəfərin ən mühüm xüsusiyyətlərindən biri onun təsadüfi deyil, düşünülmüş və ardıcıl dövlət siyasətinin nəticəsi olmasıdır. Bu Qələbə göstərdi ki, milli məqsədlərə çatmaq üçün siyasi iradə ilə yanaşı, güclü iqtisadi baza, müasir müdafiə sistemi və xalqın birliyi də zəruridir. Azərbaycan uzun illər ərzində məhz bu təməlləri formalaşdıraraq öz tarixi Qələbəsinə doğru inamla irəlilədi.
8 Noyabr – Zəfər Günü xalqımız üçün yalnız hərbi Qələbənin qeyd edildiyi tarix deyil. Bu gün müstəqil dövlətimizin gücünün, milli iradəmizin, ordumuzun qəhrəmanlığının və uzun illər davam edən məqsədyönlü siyasətin təntənəsidir. Zəfərə aparan yol Azərbaycanın güclənməsi, öz imkanlarına arxalanması və milli maraqlarını qətiyyətlə müdafiə etməsi ilə səciyyələnir. Bu tarixi təcrübə bir daha təsdiq edir ki, güclü dövlət, dayanıqlı iqtisadiyyat və qüdrətli ordu milli təhlükəsizliyin və gələcək inkişafın əsas təminatıdır.

Şəfəq Balaşova,
YAP Neftçala rayon təşkilatı ərazi partiya təşkilatının sədri
Neftçala şəhər 4 nömrəli tam orta məktəbin direktoru