Parisin çirkli suları Senaya axıdılır - Olimpiada rəzilliyi

CNN: Bu səbəblə çayda triatlon məşqi ləğv edilib
Sena çayında quraşdırılan yeni çirkab sutəmizləyici qurğular öz vəzifələrinin öhdəsindən gələ bilmir. Belə ki, Olimpiadanın açılışına kölgə salan son yağışlardan sonra çay sularında E.coli-nin səviyyəsi yenidən bütün icazə verilən normaları keçib. Bu səbəbdən məşqlər ləğv edilir və yarışların özü təhlükə altındadır. Cümə günü Olimpiadanın açılış mərasimini yaxşıca isladan yağış artıq Parisə yağmağı dayandırdı, amma Sena çayının problemləri hələ də qalır. Suyun keyfiyyətsizliyinə görə triatlon yarışı ləğv olunmaq təhlükəsi ilə üz-üzədir. İyulun 31-ə təyin edilən yarış çox güman ki çayda çirkliliyin normadan dəfələrlə çox olması səbəbindən keçirilməyəcək. Təşkilatçılar isə çıxış yolu kimi alternativ də təqdim etməyiblər, çünki yoxdur.Fransanın paytaxtını ikiyə bölən məşhur çayda üzgüçülük üzrə bəzi yarışların keçiriləcəyi açıqlananda bu, problem ortaya çıxdı. Sena çayında üzgüçülük 100 ildən çox əvvəl qadağan edilib, lakin olimpiadaya ev sahibliyi edən şəhəri ən yaxşı şəkildə təmsil etmək üçün təşkilatçılar çayı təmizləmək planı hazırlayıblar ki, dünyanın ən yaxşı idmançıları 2024-cü il Oyunları zamanı orada üzə bilsinlər.Əslində, bu, riskli bir hərəkətdir. Parisdə bütün cümə və şənbə günlərində yağan yağış kimi Senadakı çirklənmə adətən şiddətli yağışlardan sonra kəskin şəkildə artır. Bazar ertəsi çayda məşq ardıcıl ikinci dəfə ləğv edilib, çünki suyun keyfiyyəti testləri bunun idmançılar üçün təhlükəli olduğunu göstərib. Bununla belə, təşkilatçılar yarışın planlaşdırıldığı kimi baş tutacağına əmindirlər. Kişilər arasında triatlon yarışı çərşənbə axşamı, qadınlar arasında isə çərşənbə günü keçiriləcək. Gözlənilməz hallar zamanı alternativ tarixlər müvafiq olaraq cümə axşamı və cümə günləridir."Növbəti 36 saatlıq hava proqnozunu nəzərə alaraq, Paris 2024 təşkilat komitəsi və Beynəlxalq Triatlon İttifaqı iyulun 30-da triatlon başlamazdan əvvəl suyun keyfiyyətinin normallaşacağına əmindir", - iki təşkilatın birgə bəyanatında deyilir. Böyük Paris bu həftə başlayan və triatlonla üst-üstə düşən yayın ilk isti dalğasına hazırlaşır. Önümüzdəki günlərdə həm yüksək, həm də aşağı temperaturlar orta səviyyədən xeyli yuxarı olacaq, bu da Fransanın aparıcı meteorologiya departamenti Meteo-Fransanın yerli vaxtla bazar ertəsi günortadan sonra 39 müxtəlif yer üçün narıncı isti xəbərdarlığı etməyə sövq edir. Paris və paytaxt regionunda minimum temperatur çərşənbə axşamı və çərşənbə günü yüksələcək və 18-22 dərəcə Selsi arasında dəyişəcək. Maksimum temperatur isə 34-36 dərəcəyə çatacaq. Triatlon yarışları məhz bu günlərdə baş tutacaq. Çərşənbə axşamı və çərşənbə günü arabir yağış yağacağı, şimşək çaxacağı ehtimalı var.Oyunlar ərəfəsində çayın təmizlənməsinə təxminən 1,5 milyard dollar xərclənib və Paris hakimiyyəti Senanın yarışların keçirilməsi üçün yararlı olduğunu nümayiş etdirmək üçün əsl şou göstərib. Paris meri Ann Hidalqo Olimpiadadan sonra çayda hovuz tikəcəyini vəd etməzdən əvvəl suyun "yüksək keyfiyyətinə" inamını nümayiş etdirmək üçün çayda üzüb. Fransanın idman naziri də Sena çayına etimad göstərərək özünü çaya vurub. Amma laborator müayinələrin cavabı fərqli mənzərəyə şahidlik edir. Çirklənmənin aradan qaldırılması üçün əsas infrastruktur layihələrindən biri Austerlitz su anbarı adlanan yeni yağış suları kanalizasiyasıdır. Paris rəsmilərinin açıqlamasına görə, onun içindəki suyun həcmi 20 olimpiya hovuzuna bərabərdir.İyunun 17 və 18-də yağan yağışlardan sonra kollektor 80% dolu olub. O, Paris merinin dediyi kimi, 40 milyon litr yağış və çirkab suyunun Sena çayına tökülməsinin qarşısını alır. Ancaq suyun keyfiyyəti sürətlə dəyişir. Rəsmi məlumatlar onu deməyə əsas verir ki, hətta bircə yağış suda E. coli səviyyəsini çox tez artıra bilər - bu, iyunun 30-da baş verən hadisədir. Əvvəlki gün yağan yağışdan sonra E. coli səviyyələri yarışın başlayacağı III Pont Alexandre ətrafındakı ərazidə 100 ml su üçün təxminən 2000 koloniya əmələ gətirən vahidə (CFU) qədər yüksəlib. Bu, Beynəlxalq Triatlon İttifaqının standartları ilə suyun keyfiyyətinin "yaxşı" hesab edildiyi səviyyədən iki dəfə çoxdur.Oyunlara qədər olan ayın çox hissəsində E. coli səviyyəsi icazə verilən həddən yuxarı idi - bu, idmançıların sağlamlığını ciddi risk altına atan bir haldır. E.coli-nin səviyyəsi 100 ml-də 1000 CFU-dan çox olduqda, Beynəlxalq Triatlon İttifaqının qaydalarına əsasən, ittifaqın tibb komitəsi yarışın davam etdirilə biləcəyinə qərar vermədiyi təqdirdə, triatlon üzgüçülük yarışı ləğv edilə bilər.Fərdi yarışda triatlon yarışları bir kilometr yarımlıq üzgüçülüklə başlayacaq. Bundan sonra Grand Palais və Champs-Elysees adalarının yanında baş tutacaq 40 kilometrlik velosiped yarışı keçiriləcək. Yarış Parisin tam mərkəzində 10 kilometrlik yarışla başa çatacaq.Qarışıq estafet dörd idmançının - iki kişi və iki qadının iştirakını nəzərdə tutur. Əvvəlcə komandanın hər bir üzvü 300 metr üzür, sonra 5,8 kilometrlik velosiped yarışı başlayır, daha sonra isə 1,8 kilometr məsafəyə yürüş başlayır.Beləliklə, Paris Olimpiadası Fransanın səriştəsiz təşkilatçıları tərəfindən problemlərlə doludur. Siyasi oriyentasiyalı bu olimpiadada təşkilatçıların içtirakçı ölkələrin idmançıları arasında ayrıseçkilik etməsi də rəzilliyin növbəti nümayişi kimi qəbul edilməlidir. Məsələ burasındadır ki, ABŞ və Yaponiyanın idmançılarına qələbədən sonra bayraqla yürüşə icazə verildiyi halda Azərbaycan və Qazaxıstan idmançılarının əllərindən bayraqlar alınıb.

V.VƏLİYEV