Azərbaycanın sülh və əməkdaşlıq təşəbbüsləri ŞƏRH

4 fevral tarixində Birləşmiş Ərəb Əmirliklərinin paytaxtı Əbu-Dabi şəhərində keçirilən nüfuzlu Zayed İnsan Qardaşlığı Mükafatının təqdimetmə mərasimi beynəlxalq ictimaiyyətin diqqət mərkəzində olmuşdur. Bu mötəbər mərasimdə Azərbaycan Respublikasının Prezidenti İlham Əliyevin bu ali mükafata layiq görülməsi, ölkəmizin multikulturalizm, dini dözümlülük, sülh və qarşılıqlı hörmət sahəsində apardığı ardıcıl və prinsipial siyasətin beynəlxalq səviyyədə yüksək qiymətləndirilməsinin bariz nümunəsidir.

Prezident İlham Əliyevin mərasimdə etdiyi çıxış yalnız təşəkkür nitqi deyil, eyni zamanda müasir dünyada artan çağırışlar fonunda insan qardaşlığı ideyasının aktuallığını ön plana çəkən dərin məzmunlu siyasi-fəlsəfi müraciət kimi yadda qalmışdır. Zayed İnsan Qardaşlığı Mükafatı, mərhum BƏƏ Prezidenti Şeyx Zayed bin Sultan Al Nəhyanın adını daşıyaraq, bəşəri dəyərlərin təşviqi, xalqlar və dinlər arasında dialoqun gücləndirilməsi, nifrət və ayrı-seçkiliyin aradan qaldırılması məqsədi daşıyır. Bu mükafat yalnız fərdi nailiyyətlərə deyil, dövlət siyasəti səviyyəsində insan ləyaqətinin qorunmasına xidmət edən liderlərə təqdim olunur.

Prezident İlham Əliyevin bu mükafata layiq görülməsi Azərbaycan dövlətinin humanist ideologiyasının, multikultural və tolerant cəmiyyət modelinin beynəlxalq nüfuzunun artdığını bir daha sübut etmişdir. Dövlət başçısı çıxışında vurğulamışdır ki, insan qardaşlığı anlayışı sadəcə şüar deyil, konkret dövlət siyasətində və gündəlik həyatda tətbiq olunmalı olan fundamental dəyərdir. Prezident İlham Əliyevin Əbu-Dabidə Zayed İnsan Qardaşlığı Mükafatı mərasimindəki çıxışı müasir dünyada sülh, tolerantlıq və humanizm ideyalarının dövlət siyasəti səviyyəsində necə uğurla həyata keçirilə biləcəyini göstərən nümunəvi çıxışdır.

Azərbaycan yalnız regional deyil, qlobal miqyasda da humanist dəyərlərin daşıyıcısı və təşviqçisi kimi çıxış edir. Prezident İlham Əliyevin liderliyi altında həyata keçirilən siyasət insan qardaşlığı ideyasının real həyatda tətbiqinin mümkünlüyünü nümayiş etdirir və beynəlxalq ictimaiyyət üçün mühüm mesajlar ehtiva edir.

Azər Ağayev

YAP Tərtər rayon təşkilatının sədr müavini