Azərbaycan qadınının tarixdən gələcəyə uzanan ləyaqətli yolu

Azərbaycan qadını tarix boyu xalqımızın mənəvi dayağı, milli iradənin simvolu və dövlətçilik ənənələrinin qoruyucusu kimi çıxış etmişdir. Qədimdən bu günə qədər onun adı yalnız ailə ocağı ilə deyil, həm də Vətənin müdafiəsi, dövlət quruculuğu və cəmiyyətin tərəqqisi ilə yanaşı çəkilmişdir. Azərbaycan xalqının ən qədim yazılı abidələrindən olan Kitabi-Dədə Qorqud dastanında qadın obrazlarının igidlik, sədaqət və müdriklik rəmzi kimi təqdim olunması təsadüfi deyil. Tarixi yaddaşımızda yaşayan Tomrisin cəsarəti, Sara Xatunun diplomatik zəkası, Möminə Xatunun siyasi iradəsi Azərbaycan qadınının minilliklər boyu formalaşmış qüdrətinin canlı ifadəsidir.

Azərbaycan qadını yalnız keçmişin qəhrəmanı deyil, həm də modern dövlətçiliyimizin qurucularından biridir. Şərq dünyasında ilk dəfə qadınlara seçib-seçilmək hüququnun məhz Azərbaycanda verilməsi xalqımızın humanist və qabaqcıl düşüncə tərzinin parlaq təzahürüdür. Azərbaycan Xalq Cümhuriyyəti qadınların ictimai-siyasi həyata cəlb olunmasını təmin etməklə yalnız region üçün deyil, dünya miqyasında mütərəqqi addım atdı. Bu tarixi qərar Azərbaycan qadınının cəmiyyətin bərabərhüquqlu üzvü kimi inkişaf yoluna çıxmasının başlanğıcı oldu.
Müstəqil Azərbaycan dövlətində qadına verilən yüksək qiymət məqsədyönlü siyasətin əsas istiqamətlərindən biri kimi formalaşmışdır. Ümummilli lider Heydərə Əliyev qadınların cəmiyyətin bütün sahələrində fəal iştirakını dövlət siyasətinin prioritetinə çevirdi, onların liderlik potensialının üzə çıxarılması üçün geniş imkanlar yaratdı. Onun müəyyən etdiyi strateji xətt bu gün də uğurla davam etdirilir. Azərbaycan Respublikasının Prezidenti İlham Əliyev tərəfindən həyata keçirilən sosial-iqtisadi və institusional islahatlar qadınların hüquqlarının müdafiəsini, iqtisadi imkanlarının genişləndirilməsini və ictimai fəallığının artırılmasını təmin edən mühüm addımlarla müşayiət olunur.
Müasir Azərbaycanın ictimai-siyasi həyatında qadınların artan rolu dövlət idarəçiliyində də öz əksini tapır. Ölkənin Birinci vitse-prezidenti Mehriban Əliyeva humanitar missiyası, mədəni diplomatiya sahəsində fəaliyyəti və sosial təşəbbüsləri ilə Azərbaycan qadınının nüfuzunu beynəlxalq miqyasda yüksəldən parlaq şəxsiyyət kimi tanınır. Onun rəhbərlik etdiyi layihələr milli-mənəvi dəyərlərin qorunmasına, humanizm ideallarının təşviqinə və ölkəmizin “yumşaq güc” potensialının möhkəmlənməsinə mühüm töhfə verir.
Azərbaycan qadını bu gün elm, təhsil, səhiyyə, mədəniyyət, iqtisadiyyat, ordu və dövlət idarəçiliyi daxil olmaqla həyatın bütün sahələrində uğurla təmsil olunur. Statistik göstəricilər qadınların iqtisadi və ictimai fəallığının davamlı artdığını, sahibkarlıqdan parlament təmsilçiliyinə qədər geniş spektrdə mühüm nailiyyətlər əldə etdiyini təsdiqləyir. Bu nailiyyətlər təkcə gender bərabərliyinin hüquqi təminatı deyil, həm də cəmiyyətin qadına verdiyi yüksək dəyərin real təzahürüdür.
Azərbaycan qadını tarixən müdriklik, mərdlik və mənəvi gücün daşıyıcısı olmuşdur. O, ailənin sütunu olmaqla yanaşı, dövlətin inkişafına istiqamət verən fəal vətəndaşdır. Keçmişdən gələn irs, müasir dövrün imkanları və gələcəyə inam Azərbaycan qadınının simasında birləşərək ölkəmizin tərəqqisinin mühüm hərəkətverici qüvvəsinə çevrilmişdir. 8 Mart – Beynəlxalq Qadınlar Günü bu ləyaqətli yolun, bu tarixi missiyanın və bu böyük dəyərin təntənəsidir.
Bu əlamətdar gün münasibətilə bütün Azərbaycan xanımlarını səmimi qəlbdən təbrik edir, onlara möhkəm cansağlığı, ailə səadəti, sonsuz sevgi və həyatlarının bütün sahələrində yeni-yeni uğurlar arzulayıram. Qoy Azərbaycan qadınının müdrikliyi, zərifliyi və gücü hər zaman cəmiyyətimizin inkişafına işıq saçsın, ölkəmizin tərəqqisinə ilham versin. 8 Mart – Beynəlxalq Qadınlar Günümüz mübarək!

Elnarə Akimova,

Milli Məclisin deputatı,
YAP Siyasi Şurasının üzvü,
Filologiya elmləri doktoru