Yüksək səviyyəli görüşlər və strateji mesajlar - ŞƏRH

Azərbaycan ilə İtaliya arasında münasibətlər son illərdə sürətli inkişaf mərhələsinə qədəm qoyub. Bu əlaqələrin növbəti mühüm təzahürü İtaliya Respublikası Nazirlər Şurasının sədri Ciorcia Meloninin Azərbaycana səfəri çərçivəsində baş tutan görüşlər və verilən mesajlar oldu.
Səfər zamanı keçirilən yüksək səviyyəli danışıqlar iki ölkə arasında siyasi dialoqun intensivliyini və qarşılıqlı etimadı bir daha nümayiş etdirdi. Görüşlərdə iqtisadi əməkdaşlıq, enerji təhlükəsizliyi, investisiya imkanları və regional məsələlər geniş müzakirə olundu. Bu isə göstərir ki, Azərbaycan–İtaliya əlaqələri artıq yalnız ikitərəfli münasibətlərlə məhdudlaşmır, daha geniş geosiyasi və iqtisadi kontekstdə əhəmiyyət kəsb edir.
Mətbuata verilən birgə bəyanatlar isə səfərin ən diqqətçəkən məqamlarından biri oldu. Azərbaycan Respublikasının Prezidenti İlham Əliyev çıxışında iki ölkə arasında mövcud tərəfdaşlığın strateji xarakter daşıdığını xüsusi vurğuladı. Prezident İlham Əliyev qeyd etdi ki, İtaliya Azərbaycanın bir nömrəli ticarət tərəfdaşlarından biridir və bu əməkdaşlıq xüsusilə enerji sektorunda özünü daha qabarıq göstərir.
Dövlət başçısının bəyanatında Azərbaycanın Avropanın enerji təhlükəsizliyində oynadığı rol əsas xətt kimi ön plana çıxarıldı. O bildirdi ki, Azərbaycan etibarlı tərəfdaş kimi Avropaya enerji təchizatını davamlı şəkildə təmin edir və bu istiqamətdə yeni layihələr də gündəmdədir. Bu fikir, əslində, Azərbaycanın beynəlxalq enerji bazarındakı mövqeyinin gücləndiyini bir daha təsdiqləyir.
Prezident İlham Əliyev, eyni zamanda, iqtisadi əməkdaşlığın şaxələndirilməsinin vacibliyinə toxunaraq qeyri-neft sektorunda da geniş potensialın mövcud olduğunu qeyd etdi. İtaliya şirkətlərinin Azərbaycanda fəaliyyəti üçün əlverişli mühitin yaradıldığı və gələcəkdə bu əməkdaşlığın daha da genişlənəcəyinə ümid ifadə olundu.
Bu səfər və onun çərçivəsində səsləndirilən fikirlər göstərir ki, Azərbaycan–İtaliya münasibətləri yeni mərhələyə daxil olur. Yüksək səviyyəli siyasi dialoq, qarşılıqlı iqtisadi maraqlar və ortaq strateji baxış bu əlaqələrin gələcək inkişafını şərtləndirən əsas amillər kimi çıxış edir.

Çingiz İbrahimov
YAP Göyçay rayon təşkilatının əməkdaşı