Azərbaycan – Avrasiya məkanında strateji əməkdaşlığın və etimadın mərkəzi - ŞƏRH

2026-cı il oktyabrın 15-də Bakıda Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) 7-ci Zirvə Görüşünün keçirilməsi Azərbaycanın beynəlxalq münasibətlər sistemində artan rolunu və çoxtərəfli əməkdaşlığa verdiyi əhəmiyyəti bir daha nümayiş etdirdi. Zirvə Görüşündə Azərbaycan Respublikasının Prezidenti İlham Əliyevin çıxışı ölkəmizin beynəlxalq platformalarda həyata keçirdiyi siyasətin əsas istiqamətlərini, AQEM çərçivəsində görülən işləri və gələcək əməkdaşlıq perspektivlərini əhatə etdi. Dövlət başçısının vurğuladığı kimi, coğrafi baxımdan Asiya ilə Avropanın kəsişməsində yerləşən Azərbaycan Avrasiya məkanında birləşdirici mərkəz kimi getdikcə daha böyük rol oynayır.
Azərbaycanın əlverişli coğrafi mövqeyi ölkəmizə beynəlxalq nəqliyyat, logistika və iqtisadi əlaqələrin inkişafında mühüm imkanlar qazandırır. Şərqlə Qərb arasında yerləşən ölkəmiz müxtəlif regionları birləşdirən nəqliyyat marşrutlarının inkişafına, ticarət əlaqələrinin genişlənməsinə və dövlətlər arasında qarşılıqlı faydalı əməkdaşlığın güclənməsinə töhfə verir. Bu baxımdan Azərbaycanın təşəbbüsləri yalnız milli iqtisadi maraqlara deyil, həm də daha geniş Avrasiya məkanında əlaqələrin möhkəmləndirilməsinə xidmət edir.
Prezident İlham Əliyev çıxışında Azərbaycanın xarici siyasətinin əsas prinsiplərinə də toxundu. Dövlətlər arasında bərabərlik, daxili işlərə qarışmamaq, suverenliyə və ərazi bütövlüyünə hörmət kimi prinsiplər ölkəmizin beynəlxalq münasibətlərdə rəhbər tutduğu əsas istiqamətlərdir. Azərbaycan beynəlxalq hüququn norma və prinsiplərinin ardıcıl şəkildə tətbiq edilməsini, münaqişələrin həllində ikili standartlara yol verilməməsini vacib hesab edir. Dövlət başçısının çıxışında bu məsələlərin vurğulanması beynəlxalq təhlükəsizlik sistemində hüquqi mexanizmlərin səmərəliliyinin artırılmasının əhəmiyyətini bir daha gündəmə gətirdi.
AQEM-in gücləndirilməsi Azərbaycanın sədrliyi dövründə həyata keçirilən fəaliyyətin əsas prioritetlərindən biri olub. Prezident İlham Əliyevin bildirdiyinə görə, Azərbaycan iki il ərzində təşkilatın institusional imkanlarının möhkəmləndirilməsinə, üzv dövlətlər arasında dialoqun genişləndirilməsinə və praktiki əməkdaşlığın inkişafına xüsusi diqqət ayırıb. Nəqliyyat, bağlantılar, rəqəmsallaşma, ətraf mühitin mühafizəsi, turizm, təhsil və elm kimi sahələrdə əməkdaşlığın fəal şəkildə təşviq edilməsi bu fəaliyyətin mühüm istiqamətlərini təşkil edib.
Müasir dövrdə beynəlxalq təşkilatların nüfuzu yalnız siyasi müzakirələrin aparılması ilə deyil, həm də qəbul olunan qərarların və irəli sürülən təşəbbüslərin konkret nəticələr verməsi ilə ölçülür. Bu baxımdan AQEM çərçivəsində əməkdaşlığın genişləndirilməsi, üzv dövlətlərin ortaq maraqlarının uzlaşdırılması və yeni fəaliyyət mexanizmlərinin yaradılması xüsusi əhəmiyyət daşıyır. Azərbaycanın sədrliyi dövründə təşkilatın institusional və hüquqi əsaslarının möhkəmləndirilməsi onun regional dialoq və etimad platforması kimi imkanlarının genişlənməsinə şərait yaradıb.
Nəqliyyat və bağlantılar sahəsində əməkdaşlıq Azərbaycanın təşviq etdiyi əsas istiqamətlərdəndir. Şərq-Qərb və Şimal-Cənub nəqliyyat dəhlizlərinin inkişafı, tranzit imkanlarının genişləndirilməsi və logistika infrastrukturunun təkmilləşdirilməsi Asiya ölkələri arasında iqtisadi əlaqələrin gücləndirilməsi baxımından mühüm əhəmiyyətə malikdir. Rəqəmsallaşma sahəsində əməkdaşlıq isə müasir texnologiyaların tətbiqini, məlumat mübadiləsinin sürətlənməsini və dövlətlər arasında yeni iqtisadi imkanların yaranmasını dəstəkləyir. Eyni zamanda, ətraf mühitin mühafizəsi, turizm, təhsil və elm sahələrində birgə fəaliyyət xalqlar arasında qarşılıqlı anlaşmanın möhkəmlənməsinə xidmət edir.
Prezident İlham Əliyevin AQEM-in 7-ci Zirvə Görüşündəki çıxışı Azərbaycanın beynəlxalq əməkdaşlığın inkişafına verdiyi töhfələri və Avrasiya məkanında birləşdirici rolunu ön plana çıxardı. Ölkəmizin coğrafi üstünlüklərindən səmərəli istifadə etməsi, nəqliyyat və rəqəmsal bağlantıların inkişafına yönəlmiş təşəbbüsləri, eləcə də beynəlxalq təşkilatların gücləndirilməsinə verdiyi dəstək gələcək əməkdaşlıq üçün mühüm zəmin yaradır. Bakı Zirvə Görüşü AQEM-in fəaliyyətinin genişləndirilməsi və Asiyada etimadın, təhlükəsizliyin və davamlı inkişafın təşviqi baxımından əhəmiyyətli mərhələ kimi qiymətləndirilə bilər.

Hüseyn Süleymanov
YAP Kəngərli rayon təşkilatının sədr müavini