PDF Oxu

Siyasət

  • 330

Yeni Azərbaycan Partiyası – dövlətçilik ənənələrinə sədaqət, milli inkişaf və gələcəyə inam yolu - ŞƏRH

Yeni Azərbaycan Partiyası – dövlətçilik ənənələrinə sədaqət, milli inkişaf və gələcəyə inam yolu - ŞƏRH

Azərbaycanın müasir siyasi tarixində özünəməxsus yeri və mühüm rolu olan Yeni Azərbaycan Partiyasının yaranması ölkənin mürəkkəb ictimai-siyasi proseslərdən keçdiyi, dövlətçilik taleyinin ciddi sınaqlarla üzləşdiyi bir dövrə təsadüf edir. 1992-ci il noyabrın 21-də Ümummilli Lider Heydər Əliyevin rəhbərliyi ilə Yeni Azərbaycan Partiyasının təsis konfransının keçirilməsi Azərbaycanın siyasi həyatında yeni mərhələnin başlanğıcı oldu. Bu tarixi hadisə yalnız yeni siyasi təşkilatın meydana gəlməsi deyil, eyni zamanda xalqın milli maraqlarını, müstəqilliyini, dövlətçiliyini və gələcəyə dair ümidlərini özündə birləşdirən siyasi iradənin təzahürü idi. Həmin dövrdə ölkənin üzləşdiyi ağır problemlər, siyasi qeyri-sabitlik, idarəetmədəki böhran və cəmiyyətin sabitliyə olan ehtiyacı xalqı müdrik rəhbərliyə, qətiyyətli siyasi mövqeyə və milli maraqları müdafiə edə biləcək qüvvəyə yönəldirdi. Belə bir şəraitdə Yeni Azərbaycan Partiyasının yaradılması tarixi zərurətdən doğan mühüm siyasi qərar kimi yadda qaldı.
Partiyanın yaranmasının əsasını təşkil edən ideya və prinsiplər Ümummilli Lider Heydər Əliyevin zəngin dövlətçilik təcrübəsinə, siyasi uzaqgörənliyinə və Azərbaycan xalqına bağlılığına söykənirdi. Ulu Öndər ölkənin gələcəyinin yalnız milli birlik, siyasi sabitlik, güclü dövlətçilik və xalqın etimadı əsasında qurula biləcəyini aydın şəkildə görürdü. Onun siyasi fəaliyyəti göstərdi ki, dövlətə rəhbərlik etmək yalnız mövcud problemləri həll etmək deyil, həm də gələcək nəsillər üçün etibarlı inkişaf istiqamətləri müəyyənləşdirmək məsuliyyətidir. Heydər Əliyevin müəyyən etdiyi siyasi xətt Azərbaycanın müstəqilliyinin qorunması, milli maraqların müdafiəsi, iqtisadi potensialın gücləndirilməsi və beynəlxalq mövqelərinin möhkəmləndirilməsi kimi mühüm hədəfləri əhatə edirdi.
Yeni Azərbaycan Partiyasının siyasi fəaliyyətində Heydər Əliyev irsi xüsusi əhəmiyyət daşıyır. Ulu Öndərin siyasi fəlsəfəsi müstəqillik, azərbaycançılıq, dövlətçilik, qanunun aliliyi, varislik və tərəqqi, konstruktiv əməkdaşlıq və dialoq, sosial ədalət və insan amili, multikultural cəmiyyət, demokratik ənənələrin inkişafı kimi fundamental prinsiplərlə səciyyələnir. Bu dəyərlər partiyanın ideoloji əsaslarını formalaşdırmaqla yanaşı, onun fəaliyyət istiqamətlərinin müəyyənləşdirilməsində də mühüm rol oynayır. Hər bir prinsipin mərkəzində Azərbaycan dövlətinin güclənməsi, cəmiyyətin rifahı və milli birliyin qorunması dayanır. Xüsusilə müstəqillik və azərbaycançılıq ideyaları xalqımızın tarixi yaddaşını, milli kimliyini və dövlətçilik iradəsini bir araya gətirən mühüm mənəvi dayaqlardır.
Ulu Öndərin siyasi irsinin ən mühüm xüsusiyyətlərindən biri onun zamanın dəyişən çağırışlarına uyğun olaraq dövlətin inkişafını təmin edən uzaqgörən strategiya formalaşdırması idi. Heydər Əliyev Azərbaycanın gələcəyini yalnız bugünkü siyasi və iqtisadi imkanlarla məhdudlaşdırmır, ölkənin uzunmüddətli inkişaf perspektivlərini nəzərə alırdı. Onun rəhbərliyi ilə həyata keçirilən islahatlar, hüquqi dövlət quruculuğu istiqamətində atılan addımlar, iqtisadi sabitliyin təmin olunması və beynəlxalq əlaqələrin genişləndirilməsi müasir Azərbaycanın təməlini möhkəmləndirdi. Bu baxımdan Yeni Azərbaycan Partiyası da yarandığı gündən etibarən dövlətçilik maraqlarının qorunmasını və milli inkişafın davamlılığını öz fəaliyyətinin əsas istiqaməti kimi qəbul etdi.
Bu gün partiyanın siyasi fəaliyyətinin əsas məzmununu təşkil edən mühüm məsələlərdən biri də Ulu Öndərin müəyyənləşdirdiyi siyasi kursun müasir dövrün tələblərinə uyğun davam etdirilməsidir. Azərbaycan Respublikasının Prezidenti, Yeni Azərbaycan Partiyasının Sədri İlham Əliyevin rəhbərliyi ilə ölkəmizdə həyata keçirilən məqsədyönlü siyasət bu varisliyin real nəticələrini nümayiş etdirir. Prezident İlham Əliyev Heydər Əliyevin dövlətçilik strategiyasını yeni dövrün imkanları və çağırışları əsasında inkişaf etdirərək Azərbaycanın siyasi, iqtisadi və beynəlxalq mövqelərinin daha da möhkəmlənməsinə nail olmuşdur. Ölkənin iqtisadi potensialının artırılması, qeyri-neft sektorunun inkişafı, müasir infrastrukturun qurulması, sosial müdafiə tədbirlərinin genişləndirilməsi, təhsil və səhiyyə sahələrində aparılan yeniliklər bu siyasətin mühüm istiqamətlərindəndir.
Prezident İlham Əliyevin rəhbərliyi ilə Azərbaycanın ərazi bütövlüyünün və suverenliyinin bərpası isə müasir tariximizin ən mühüm hadisələrindən biri kimi xüsusi yer tutur. Uzun illər ərzində həyata keçirilən ardıcıl siyasət, güclü iqtisadiyyatın və qüdrətli ordunun formalaşdırılması, beynəlxalq müstəvidə aparılan prinsipial diplomatik fəaliyyət ölkəmizin tarixi Zəfərinə zəmin yaratdı. 2020-ci ildə Vətən müharibəsində qazanılan Qələbə Azərbaycan xalqının milli birliyinin, dövlətimizin gücünün və ordumuzun qəhrəmanlığının təntənəsi oldu. 2023-cü ildə həyata keçirilən lokal xarakterli antiterror tədbirləri nəticəsində ölkəmizin bütün ərazisində suverenliyin bərpası ilə bu tarixi proses yeni mərhələyə qədəm qoydu. Beləliklə, Ulu Öndərin ən böyük arzularından biri olan Azərbaycanın ərazi bütövlüyünün təmin edilməsi Prezident İlham Əliyevin qətiyyətli rəhbərliyi ilə reallığa çevrildi.
Bu gün işğaldan azad edilmiş ərazilərdə genişmiqyaslı bərpa və quruculuq işlərinin aparılması dövlət siyasətinin prioritet istiqamətlərindən biridir. Qarabağ və Şərqi Zəngəzurda həyata keçirilən infrastruktur layihələri, yeni yaşayış məntəqələrinin salınması, yolların, məktəblərin, xəstəxanaların və digər sosial obyektlərin tikintisi Böyük Qayıdış prosesinin uğurla reallaşdırılmasına xidmət edir. Bu quruculuq prosesi yalnız dağıdılmış şəhər və kəndlərin yenidən qurulması deyil, həm də ölkəmizin gələcək inkişafına, iqtisadi imkanlarının genişlənməsinə və milli həmrəyliyin möhkəmlənməsinə verilən töhfədir. Azərbaycanın qazandığı tarixi nailiyyətlər Ulu Öndərin müəyyən etdiyi strateji yolun nə qədər möhkəm təməllərə əsaslandığını bir daha təsdiqləyir.
Yeni Azərbaycan Partiyasının cəmiyyətdəki mövqeyi onun xalqla davamlı əlaqələrinə, ictimai-siyasi proseslərdə iştirakına və ölkənin inkişafına yönəlmiş fəaliyyətinə əsaslanır. Partiyanın sıralarında müxtəlif peşə və yaş qruplarını təmsil edən insanların birləşməsi onun ictimai dayaqlarının genişliyini nümayiş etdirir. Partiyanın gücü yalnız üzvlərinin sayında deyil, qarşıya qoyulan məqsədlərin həyata keçirilməsində nümayiş etdirdiyi təşkilatçılıq qabiliyyətində, ideoloji bütövlüyündə və ictimai məsuliyyətində ifadə olunur. Son seçkilərdə əldə edilən nəticələr də partiyanın siyasi proseslərdəki mövqeyinin və seçicilərlə münasibətlərinin mühüm göstəricilərindən biri kimi qiymətləndirilir.
Prezident İlham Əliyevin YAP-ın VIII qurultayında səsləndirdiyi fikirlər partiyanın qarşısında dayanan vəzifələrin mahiyyətini aydın ifadə edir. Ölkəmizin yeni ictimai-siyasi və geosiyasi reallıqlar şəraitində inkişaf etməsi partiyanın da fəaliyyətində müasir yanaşmaların, çevik təşkilatlanmanın və strateji baxışın əhəmiyyətini artırır. Azərbaycanın ərazi bütövlüyünün və suverenliyinin tam bərpasından sonra qarşıya çıxan yeni vəzifələr partiyanın siyasi fəaliyyətində də yeni məsuliyyət mərhələsi formalaşdırır. Bu mərhələdə əsas məqsəd əldə edilmiş tarixi nailiyyətlərin qorunması, dövlətin gücünün daha da artırılması, cəmiyyətin bütün təbəqələrinin inkişaf prosesinə cəlb olunması və gələcək nəsillər üçün dayanıqlı inkişaf mühitinin yaradılmasıdır.
Müasir dövrdə siyasi təşkilatların qarşısında duran əsas tələblərdən biri cəmiyyətlə əlaqələrin daha da gücləndirilməsi, vətəndaşların müraciət və təkliflərinə həssas yanaşılması, gənc nəslin ictimai-siyasi proseslərdə fəallığının artırılmasıdır.
Xüsusilə gənclərin partiya həyatında fəal iştirakının təmin olunması mühüm əhəmiyyət kəsb edir. Çünki gələcəyin siyasi, sosial və intellektual potensialı bugünkü gənclərin bilik və bacarıqlarından, vətənpərvərlik ruhundan və ictimai məsuliyyətindən asılıdır. Gənclərin təşəbbüslərinin dəstəklənməsi, onların idarəçilik və təşkilatçılıq bacarıqlarının inkişaf etdirilməsi, müasir informasiya texnologiyalarından istifadə imkanlarının genişləndirilməsi partiyanın gələcək fəaliyyətinin səmərəliliyini artıran amillərdəndir. Eyni zamanda, təcrübəli nəslin bilik və təcrübəsinin gənclərə ötürülməsi siyasi varisliyin və təşkilati davamlılığın qorunmasına xidmət edir.
Yeni Azərbaycan Partiyasının dünənin təcrübəsinə, bugünün reallıqlarına və sabahın hədəflərinə əsaslanan fəaliyyəti onun siyasi həyatımızdakı yerini müəyyənləşdirən əsas amillərdəndir. Partiyanın keçdiyi tarixi yol bir daha sübut edir ki, möhkəm ideoloji təməl, milli maraqlara sadiqlik, düzgün müəyyənləşdirilmiş strategiya və təşkilati birlik davamlı uğurların əsas şərtləridir. Ulu Öndər Heydər Əliyevin siyasi irsi bu yolun mənəvi və ideoloji dayağı, Prezident İlham Əliyevin rəhbərliyi ilə həyata keçirilən siyasət isə onun müasir dövrdəki inkişaf istiqamətidir.
Bu gün Yeni Azərbaycan Partiyasının hər bir üzvü və əməkdaşı qarşısında mühüm vəzifə dayanır: tarixi irsə hörmətlə yanaşmaq, dövlətimizin qazandığı nailiyyətləri qorumaq, partiyanın prinsiplərinə uyğun fəaliyyət göstərmək və ölkəmizin gələcək inkişafına öz töhfəsini vermək. Çünki siyasi təşkilatın gücü yalnız onun keçmiş uğurları ilə deyil, gələcək qarşısında daşıdığı məsuliyyətlə ölçülür. Bu məsuliyyət isə hər bir əməkdaşdan bilik, sədaqət, təşəbbüskarlıq, intizam və yüksək vətəndaşlıq mövqeyi tələb edir.
Əminliklə demək olar ki, Yeni Azərbaycan Partiyası bundan sonra da Ümummilli Lider Heydər Əliyevin ideyalarına sadiq qalaraq, Prezident İlham Əliyevin rəhbərliyi ilə ölkəmizin tərəqqisinə, dövlətçilik ənənələrinin möhkəmlənməsinə və milli həmrəyliyin güclənməsinə xidmət edən fəaliyyətini davam etdirəcəkdir. Çünki YAP-ın siyasi fəlsəfəsinin əsasında güclü Azərbaycan, müstəqil dövlətçilik, xalqın rifahı və gələcək nəsillərə daha qüdrətli ölkə miras qoymaq məramı dayanır. Bu məramı yaşatmaq və gündəlik fəaliyyətində əməli işlərlə təsdiqləmək isə partiyanın hər bir üzvünün və əməkdaşının şərəfli və məsuliyyətli vəzifəsidir.

Səltənət Möhsünlü
YAP Tərtər rayon təşkilatının məsləhətçisi

Digər xəbərlər