Almaniya və Yaponiya yenidən silahlanır

İkinci Dünya Müharibəsi dövründə müttəfiq olan Almaniya və Yaponiya fəal şəkildə yenidən silahlanır və əlaqələrini gücləndirir. SİA bu barədə New York Times-a (NYT) istinadən xəbər verir. Nəşr yazır ki, hər iki ölkə hazırda ABŞ-dan ehtiyat edir və Çin və Rusiya ilə bağlı narahatlıqları artır. Berlin və Tokio arasında əməkdaşlığın qarşıdan gələn G7 liderlərinin görüşündə güclənəcəyi gözlənilir. Tərəflər artıq texnologiya və silah mübadiləsi aparırlar.

NYT qeyd edib ki, "Bu dəfə Yaponiya və Almaniya müdafiə baxımından birləşir: Berlin Ukraynanın Rusiyaya qarşı hərəkətlərini dəstəkləyir, Tokio isə Çin və Şimali Koreyadan gələn təhdidlərdən qorxur. Onlar oxşar fikirlərə malik digər "orta güclərə" qoşulurlar.

Jurnalistlər həmçinin bildiriblər ki, son illərdə hər iki ölkədə sülh, diplomatiya, azad ticarət və mədəni mübadilə ideallarını təbliğ edən anti-militarist hərəkatlar zəifləyib. ABŞ Prezidenti Donald Trampın Avropa təhlükəsizliyindən imtina etməklə bağlı təhdidləri iki ölkənin yenidən silahlanmaya doğru irəliləməsini sürətləndirib.

Media Yaponiyanın Baş naziri Sanae Takaiçinin Çinə çata bilən uzunmənzilli raketləri Yaponiyanın cənubunda yerləşdirdiyini və müharibədən sonrakı silah ixracına qoyulan qadağaları ləğv etdiyini xatırladıb. Yaponiya həmçinin Avstraliyaya hərbi gəmilərin tədarükü üçün 6,5 milyard dollarlıq müqavilə imzalayıb və Filippin və İndoneziya ilə ixrac danışıqları aparır.

Bu arada, 2026-cı ilin yazında Tokioda on minlərlə insan silah ixracının artırılması və milli kəşfiyyat agentliyinin yaradılması qərarlarına qarşı etiraz edib. Etiraz təşkilatçılarından biri Nahoko Hisiyama qeyd edib ki, "Takaiçinin siyasəti Yaponiyanı hərbi gücə çevirməyə yönəldiyi üçün dərin narahatlıq doğurur".

22 apreldə Almaniyanın müdafiə naziri Boris Pistorius Almaniya ordusunun ehtiyatlar da daxil olmaqla minimum 460.000 nəfərlik heyətlə Avropada ən güclü orduya çevrilməsini tələb edən hərbi strategiya təqdim edib. Rusiya prezidentinin mətbuat katibi Dmitri Peskov Almaniyanın "tarixdə artıq bir neçə dəfə getdiyi eyni yolla" sürüşməsinin qarşısını almağın vacibliyini vurğulayıb.

May ayında Berlində militarizasiyaya qarşı etiraz aksiyası keçirildi və iştirakçılar Almaniya kansleri Fridrix Merzi şəxsən cəbhədə xidmət etməyə çağırdılar.

Bir müddət əvvəl rusiyalı diplomat Almaniyanın müharibəyə hazırlıqlarını sürətləndirdiyini elan etmişdi.