Mədəniyyət

  • 3 089

“Qarabağ gecəsi” adlı xeyriyyə konserti keçirilib

image

İyulun 10-da Qarabağ Dirçəliş Fondunun təşəbbüsü və təşkilatçılığı ilə Müslüm Maqomayev adına Azərbaycan Dövlət Akademik Filarmoniyasında “Qarabağ gecəsi” adlı növbəti xeyriyyə konserti keçirilib.SİA AZƏRTAC-a istinadən xəbər verir ki, əvvəlcə Vətənimizin ərazi bütövlüyü və suverenliyi uğrunda canlarını fəda etmiş şəhidlərimizin əziz xatirəsi bir dəqiqəlik sükutla yad edilib.Sonra açılış nitqi ilə çıxış edən Qarabağ Dirçəliş Fondunun İdarə Heyətinin sədri Rəhman Hacıyev konsertin əsas məqsədi barədə məlumat verərək əldə ediləcək vəsaitin Qarabağın bərpası istiqamətində həyata keçirilən tədbirlərə töhfə verəcəyini vurğulayıb:“Ali Baş Komandan, cənab Prezident İlham Əliyevin rəhbərliyi ilə müzəffər Ordumuzun Vətən müharibəsində qazandığı möhtəşəm qələbədən sonra işğaldan azad edilən ərazilərdə irimiqyaslı tikinti-quruculuq işləri aparılır. Qarabağ Dirçəliş Fondu olaraq bu işlərə töhfə verdiyimiz üçün qürur duyuruq. Bugünkü konsert də doğma Qarabağın bərpası istiqamətində görülən işlərə dəstək olmaq məqsədilə keçirilir. Bu baxımdan bu tədbiri adi mədəniyyət tədbirindən daha çox işğaldan azad edilmiş torpaqlarımızın bərpası və dirçəlişi naminə həmrəyliyimizin və birliyimizin təzahürü kimi də qiymətləndirə bilərik”.İdarə Heyətinin sədri “Qarabağ gecəsi” xeyriyyə konsertinin ərsəyə gəlməsində dəstək göstərən, eyni zamanda bilet əldə edərək işğaldan azad edilən ərazilərin bərpası və yenidən qurulmasına töhfə verən hər kəsə təşəkkürünü bildirib.Konsertin tərəfdaşlarından olan “Azərlotereya” ASC-nin İdarə Heyətinin sədri Osman Karakuş çıxış edərək bu cür təşəbbüslərə dəstək göstərməyin əhəmiyyətini qeyd edərək, işğaldan azad edilən ərazilərin bərpası istiqamətində həyata keçirilən tədbirlərdə həmrəyliyin vacibliyini vurğulayıb.Daha sonra tədbir bədii hissə ilə davam edib. Xalq artisti Ənvər Sadıqov, Əməkdar artist Emil Əfrasiyab, “Qaytağı” instrumental ansamblı çıxış edərək qonaqlara əsl musiqi ziyafəti yaşadıblar.Sonda konsertin ərsəyə gəlməsində həmrəylik nümayiş etdirərək Qarabağ Dirçəliş Fonduna dəstək olan tərəfdaşlara və donorlara – Mədəniyyət Nazirliyinə, Müslüm Maqomayev adına Azərbaycan Dövlət Akademik Filarmoniyasına, “Azərlotereya” ASC-yə, “Reform Group” MMC-yə, “Azərbaycan Televiziya və Radio Verilişləri” QSC-yə, “iTicket Production” MMC-yə, “Avrora” MMC-yə, Veysəloğlu Şirkətlər Qrupuna, “McDonald’s Azərbaycan” QSC-yə, “Huner Group” MMC-yə, “Caspian Event Organisers” MMC-yə, “Bakı Metropoliteni” QSC-yə, eləcə də konsertdə iştirak edən musiqiçilərə Qarabağ Dirçəliş Fondu adından rəsmi ziyafət verilib, xüsusi plaket və “Təşəkkür sertifikatı” təqdim olunub.Qeyd edək ki, konsertdən əldə ediləcək vəsait işğaldan azad edilmiş ərazilərdə mədəniyyət obyektlərinin yenidən qurulmasına yönəldiləcək.Xatırladaq ki, “Qarabağ gecəsi” adlı ilk xeyriyyə konserti 26 iyun 2022-ci ildə Bakıda, ikinci konsert isə 17 iyun 2023-cü il tarixində Gəncə şəhərində keçirilib.Müvafiq olaraq Bakıda təşkil olunan xeyriyyə konsertindən əldə olunan 171.257 manat vəsait Şuşa şəhərində yerləşən mədəniyyət müəssisələrinin birinə musiqi aləti – royalın alınmasına yönəldilib. Gəncədə təşkil olunan konsertdən əldə olunan 140.220 manat vəsaitin isə Ağdam rayonunun ərazisində yerləşən Pənahəli xanın İmarət kompleksinin bərpasına yönəldilməsi təmin edilib.

Digər xəbərlər