3 oktyabr 1993-cü il – dövlətçiliyin möhkəmləndiyi və inkişaf yolunun müəyyənləşdiyi gün - ŞƏRH

Azərbaycanın müasir dövlətçilik tarixində elə mühüm siyasi hadisələr var ki, onların
tarixi əhəmiyyəti zaman keçdikcə daha aydın şəkildə üzə çıxır. 3 oktyabr 1993-cü il
prezident seçkiləri də məhz belə dönüş xarakterli hadisələrdən biridir. Həmin gün
Azərbaycan xalqının böyük əksəriyyətinin iradəsi ilə Heydər Əliyevin dövlət başçısı
seçilməsi ölkənin gələcək inkişaf istiqamətlərini müəyyənləşdirən mühüm siyasi seçim
oldu. Bu seçim müstəqilliyin ilk illərində ciddi siyasi, sosial və təhlükəsizlik sınaqları
ilə qarşılaşan Azərbaycanın dövlətçilik əsaslarının qorunması və möhkəmləndirilməsi
baxımından yeni mərhələnin başlanğıcını qoydu.
Ulu Öndər Heydər Əliyevin hakimiyyətə qayıdışından sonra dövlət idarəçiliyində
peşəkarlıq, siyasi məsuliyyət, uzaqgörənlik və milli maraqlara əsaslanan yanaşma ön
plana çıxdı. İlk növbədə ölkədə sabitliyin və ictimai-siyasi asayişin təmin olunmasına
xüsusi diqqət yetirildi. Dövlət çevrilişi cəhdlərinin və silahlı qarşıdurmaların qarşısının
alınması, vətəndaş müharibəsi təhlükəsinin aradan qaldırılması Azərbaycanın normal
inkişafı üçün zəruri siyasi mühitin formalaşmasına imkan verdi. Bununla yanaşı,
dövlət institutlarının möhkəmləndirilməsi, idarəetmə sisteminin təkmilləşdirilməsi və
milli ordu quruculuğunun sürətləndirilməsi müstəqilliyin etibarlı müdafiəsi
baxımından mühüm addımlar oldu.
Ulu Öndər Heydər Əliyevin dövlətçilik strategiyasında hüquqi dövlət quruculuğu da
xüsusi yer tuturdu. 1995-ci ildə ümumxalq səsverməsi yolu ilə qəbul edilən
Azərbaycan Respublikasının Konstitusiyası müstəqil dövlətin hüquqi-siyasi əsaslarını
müəyyənləşdirdi və demokratik, hüquqi, dünyəvi dövlət quruculuğunun fundamental
prinsiplərini təsbit etdi. İnsan hüquq və azadlıqlarının təmin olunması, hakimiyyətlərin
bölünməsi prinsipi və dövlət institutlarının fəaliyyətinin hüquqi çərçivəsinin
formalaşdırılması ölkənin siyasi sisteminin inkişafı üçün mühüm zəmin yaratdı.
Sonrakı dövrdə həyata keçirilən hüquqi və institusional islahatlar, o cümlədən
məhkəmə və hüquq sistemində aparılan dəyişikliklər dövlət idarəçiliyinin daha da
təkmilləşdirilməsinə xidmət etdi.
Ulu Öndərin siyasəti yalnız daxili sabitliyin və dövlət institutlarının möhkəmləndirilməsi ilə məhdudlaşmırdı. Azərbaycanın beynəlxalq mövqelərinin gücləndirilməsi də həmin strategiyanın əsas istiqamətlərindən biri idi. Heydər Əliyevin müəyyən etdiyi xarici siyasət kursu Azərbaycanın dünya birliyinə inteqrasiyasını sürətləndirdi, milli maraqların beynəlxalq müstəvidə müdafiəsi üçün yeni imkanlar yaratdı. Azərbaycan həqiqətlərinin dünya ictimaiyyətinə çatdırılması, Ermənistanın işğalçılıq siyasətinin beynəlxalq müstəvidə ifşası və ölkəmizin ərazi bütövlüyünün müdafiəsi istiqamətində aparılan ardıcıl diplomatik fəaliyyət sonrakı mərhələlər üçün mühüm siyasi baza formalaşdırdı.
Bu strateji irs cənab Prezident İlham Əliyev tərəfindən müasir dövrün reallıqları və
çağırışları nəzərə alınmaqla davam etdirildi. Ardıcıl siyasi kurs nəticəsində
Azərbaycanın iqtisadi potensialı genişləndi, sosial inkişaf sürətləndi, müdafiə
imkanları və ordu quruculuğu yeni mərhələyə yüksəldi, ölkənin beynəlxalq nüfuzu
daha da möhkəmləndi. Güclü iqtisadiyyat, güclü dövlət və güclü ordu konsepsiyası
2020-ci ildə Azərbaycanın ərazi bütövlüyünün böyük hissəsinin hərbi-siyasi yolla
bərpası ilə nəticələndi. 2023-cü ildə isə dövlət suverenliyinin tam bərpası Azərbaycan
tarixinin mühüm nailiyyətlərindən birinə çevrildi.
Bütün bunlar göstərir ki, 3 oktyabr 1993-cü il yalnız prezident seçkisinin keçirildiyi tarix kimi qiymətləndirilə bilməz. Bu tarix müstəqil Azərbaycanın böhran və qeyri- sabitlik mərhələsindən sabitlik, inkişaf və güclənmə mərhələsinə keçidinin siyasi başlanğıcı kimi tarixə düşüb. Ulu Öndər Heydər Əliyevin müəyyən etdiyi dövlətçilik strategiyası zamanın sınaqlarından keçərək öz davamlılığını və siyasi əhəmiyyətini nümayiş etdirib. Prezident İlham Əliyevin rəhbərliyi ilə həmin siyasi kursun müasir mərhələdə davam etdirilməsi Azərbaycanın suverenliyi tam təmin olunmuş, beynəlxalq mövqeləri möhkəmlənən və gələcəyə inamla addımlayan güclü dövlət kimi inkişafına şərait yaradıb.

Şövqi Həsənov,
YAP Şəmkir rayon Təşkilatı Aparatının əməkdaşı