VIII Qurultayda Zəfər və suverenlik: xalq–iqtidar birliyinin tarixi nəticəsi - ŞƏRH

Azərbaycanın müasir tarixində 8 Noyabr və 20 Sentyabr bir-birini tamamlayan iki böyük milli nailiyyəti ifadə edir. Birincisi xalqımızın işğala qarşı mübarizəsinin Zəfərlə nəticələndiyi, ikincisi isə dövlət suverenliyinin bütün ölkə ərazisində tam bərpa olunduğu tarixdir. Azərbaycan Respublikasının Prezidenti, Yeni Azərbaycan Partiyasının Sədri İlham Əliyevin VIII Qurultaydakı çıxışında hər iki hadisənin əhəmiyyətini xüsusi vurğulaması Azərbaycanın keçdiyi yolun bütöv şəkildə qiymətləndirilməsinə imkan verir. Bu yolun əsas dayağı dövlətin siyasi iradəsi, Ordunun gücü və xalqın ümumi məqsəd ətrafında birliyi olmuşdur.
2026-cı il oktyabrın 2-də keçirilən VIII Qurultay Azərbaycanın ərazi bütövlüyünü və suverenliyini tam bərpa etməsindən sonra keçirilən ilk YAP qurultayıdır. Bu fakt siyasi hadisənin tarixi məzmununu müəyyənləşdirir. 2021-ci il martın 5-də keçirilən VII Qurultay Vətən müharibəsində qazanılmış Qələbədən sonrakı vəzifələri gündəmə gətirmişdi. Sonrakı dövrdə Azərbaycanın fəaliyyəti həmin Qələbənin nəticələrinin möhkəmləndirilməsinə və suverenliyin tam təmin olunmasına yönəldi. VIII Qurultay artıq bu məqsədə nail olmuş dövlətin gələcək hədəflərini müəyyənləşdirir. İki qurultay arasındakı mərhələ milli iradənin ardıcıl siyasətlə necə tarixi nəticəyə çevrildiyini göstərir.
2020-ci il sentyabrın 27-də başlayan Vətən müharibəsi Azərbaycanın öz torpaqlarını azad etmək əzminin əməli ifadəsi oldu. 44 gün ərzində Ordumuz mürəkkəb müdafiə xətlərini yararaq şəhər və kəndlərimizi işğaldan azad etdi. Noyabrın 8-də Şuşanın azad olunması müharibənin gedişində həlledici hadisəyə çevrildi. Noyabrın 10-da imzalanmış üçtərəfli Bəyanatla hərbi əməliyyatlar dayandırıldı, Ağdam, Kəlbəcər və Laçın rayonlarının qaytarılması təmin edildi. Azərbaycan uzun illər davam etmiş işğalın əsas nəticələrini öz hərbi və siyasi gücü ilə aradan qaldırdı.
Bu Qələbənin arxasında uzunmüddətli hazırlıq dayanırdı. İqtisadi imkanların genişləndirilməsi müdafiə qabiliyyətinin artırılmasına şərait yaratmış, müasir hərbi texnika ilə təchizat və peşəkar hazırlıq Ordunun gücünü yüksəltmişdi. Diplomatik fəaliyyət Azərbaycanın haqlı mövqeyinin beynəlxalq müstəvidə müdafiəsinə xidmət edirdi. Bununla yanaşı, xalqın torpaqların azad olunacağına inamı qorunurdu. Müharibə başlayanda bu amillər vahid məqsəd ətrafında birləşdi. Dövlətin qərarı cəmiyyətin iradəsinə söykənir, cəmiyyət isə həmin qərarın həyata keçirilməsinə bütün gücü ilə dəstək verirdi.
Prezident İlham Əliyev VIII Qurultayda müharibə dövründə Azərbaycana açıq və qapalı müstəvilərdə təzyiqlər göstərildiyini xatırlatdı. Dövlət başçısı xalqın vahid mövqeyinin və siyasi qətiyyətin bu təzyiqlərin qarşısının alınmasında rolunu vurğuladı. Bu məqam Zəfərin hərbi nəticələri ilə yanaşı, siyasi məzmununu da açır. Döyüş meydanında uğur qazanmaq qədər həmin uğuru xarici təzyiqlər qarşısında qorumaq da vacib idi. Milli birlik Azərbaycanın öz məqsədindən dönməməsi üçün möhkəm ictimai əsas yaratdı.
Xalq–iqtidar birliyi müharibə günlərində müxtəlif formalarda özünü göstərdi. Hərbçilərə dəstək, könüllülük təşəbbüsləri, şəhid ailələrinə və yaralılara qayğı, cəbhədən gələn xəbərlərin ümummilli həyəcanla izlənməsi cəmiyyətin mənəvi səfərbərliyini ifadə edirdi. İnsanların siyasi baxışlarından, peşəsindən və yaşadığı bölgədən asılı olmayaraq, torpaqların azadlığı əsas ortaq məqsədə çevrilmişdi. Bu birlik Ordunun döyüş ruhunu möhkəmləndirir, Azərbaycan dövlətinin mövqeyinin xalqın iradəsini ifadə etdiyini göstərirdi. Zəfərin ictimai gücü məhz bu bağlılıqda görünürdü.
2020-ci ilin Qələbəsindən sonra qarşıda suverenliyin tam təmin olunması vəzifəsi dayanırdı. Prezident İlham Əliyev qurultaydakı çıxışında Vətən müharibəsindən antiterror tədbirlərinə qədər olan dövrdə Azərbaycanın bir neçə istiqamətdə fəaliyyət göstərdiyini bildirdi. Siyasi və diplomatik addımlar, beynəlxalq maarifləndirmə işi və strateji mövqelərin yaxşılaşdırılması ümumi məqsədə xidmət edirdi. Bu fəaliyyətin ardıcıllığı mühüm idi: əldə edilmiş nəticələr möhkəmləndirilir, növbəti mərhələ üçün imkanlar yaradılırdı. Azərbaycan öz ərazisində qanunsuz silahlı birləşmələrin mövcudluğu ilə barışmayacağını əməli siyasəti ilə göstərirdi.
Dövlət başçısı 2022-ci ilin oktyabrında Ermənistanın Azərbaycanın ərazi bütövlüyünü rəsmən tanımasını da bu prosesin mühüm məqamlarından biri kimi qiymətləndirdi. Azərbaycanın beynəlxalq səviyyədə tanınmış sərhədləri daxilində suveren hüquqlarının təmin olunması üçün hüquqi əsas həmişə mövcud idi. Ermənistanın ərazi bütövlüyümüzü tanıması isə onun mövqeyindəki ziddiyyəti daha aydın ortaya qoydu. Azərbaycanın ərazisində yerləşən qanunsuz silahlı birləşmələrin saxlanılması tanınmış ərazi bütövlüyünə uyğun gəlmirdi. Bu şəraitdə dövlətin bütün ərazisində nəzarətini təmin etmək vəzifəsi öz aktuallığını qoruyurdu.
2023-cü il sentyabrın 19-da başlanmış lokal xarakterli antiterror tədbirləri nəticəsində sentyabrın 20-də qanunsuz silahlı birləşmələr silahı yerə qoymaq məcburiyyətində qaldı. Azərbaycan öz suverenliyini tam bərpa etdi. Bu nəticə 2020-ci ildə qazanılmış Qələbənin davamı və dövlət qarşısında duran əsas milli vəzifənin tamamlanması idi. Hərbi hazırlıq, əməliyyatların idarə olunması və siyasi qərarların ardıcıllığı məqsədə qısa müddətdə çatmağa imkan verdi. Azərbaycan bütün ərazisində vahid dövlət hakimiyyətini təmin edərək yeni inkişaf mərhələsinə qədəm qoydu.
Zəfər və suverenliyin təhlilində şəhidlərimizin fədakarlığı xüsusi ehtiramla xatırlanmalıdır. Prezident İlham Əliyevin VIII Qurultayda şəhidlərin xatirəsini anması milli nailiyyətlərin hansı qəhrəmanlıq hesabına əldə edildiyini bir daha göstərdi. Torpaqların azadlığı uğrunda canından keçən insanlar dövlətimizin tarixində əbədi yer tuturlar. Onların xatirəsinə sədaqət ailələrinə qayğıda, gənc nəslin tərbiyəsində və qazandırdıqları azadlığın qorunmasında ifadə olunmalıdır. Qələbənin mənəvi dəyəri cəmiyyətin bu məsuliyyətə münasibəti ilə yaşayır.
Tam suverenlik Azərbaycanın qarşısında quruculuq və inkişaf üçün yeni imkanlar açıb. Qarabağ və Şərqi Zəngəzurda həyatın bərpası, keçmiş məcburi köçkünlərin qayıdışı və iqtisadi fəaliyyətin genişlənməsi hərbi-siyasi nailiyyətlərin insanların gündəlik həyatına çevrilməsidir. Bu mərhələdə də xalq–iqtidar birliyi vacibdir. Quruculuğun nəticələrini qorumaq, milli məqsədləri düzgün anlamaq və inkişafda fəal iştirak etmək ümumi məsuliyyətdir. Yeni Azərbaycan Partiyasının fəaliyyəti həmin birliyin möhkəmləndirilməsinə və yeni vəzifələrin cəmiyyətə aydın şəkildə çatdırılmasına xidmət etməlidir.
VIII Qurultayda səslənən fikirlər Azərbaycanın Zəfər və suverenlik yolunun əsas həqiqətini bir daha ortaya qoydu: ardıcıl siyasi iradə xalqın birliyi və güclü Ordu ilə tamamlandıqda tarixi məqsədlər gerçəkləşir. Azərbaycan bu gücü öz torpaqlarında nümayiş etdirdi, dövlətçiliyinin bütövlüyünü təmin etdi. Bu gün həmin nailiyyətlər gələcək inkişafın möhkəm təməlidir. Xalqımızın qazandığı Zəfərə sədaqət suveren Azərbaycanın təhlükəsizliyini, birliyini və tərəqqisini davamlı şəkildə möhkəmləndirməkdə ifadə olunur.

Vasif Əliyev,
VIII Qurultayın nümayəndəsi
YAP Neftçala rayon təşkilatı ərazi partiya təşkilatının sədri
Neftçala RİH-in ictimai-siyasi və humanitar məsələlər sektorunun müdiri