YAP Quba rayon təşkilatında 18 Oktyabr – Müstəqilliyin Bərpası Gününə həsr olunmuş tədbir keçirilib.

Tədbir Azərbaycan Respublikasının Dövlət Himninin səsləndirilməsi, Ümummilli Lider Heydər Əliyevin və Azərbaycanın ərazi bütövlüyü uğrunda canlarından keçmiş şəhidlərimizin əziz xatirəsinin bir dəqiqəlik sükutla yad edilməsi ilə başlayıb. Daha sonra Azərbaycanın dövlət müstəqilliyinin bərpasından bəhs edən videoçarx nümayiş etdirilib.
Çıxış edən YAP Quba rayon təşkilatının sədri Fidan Hüseynova 18 Oktyabr – Müstəqilliyin Bərpası Gününün Azərbaycan xalqının tarixində mühüm yer tutduğunu qeyd edərək bildirib ki, 1991-ci il oktyabrın 18-də dövlət müstəqilliyinin bərpası xalqımızın azadlıq və milli dövlətçilik arzularının gerçəkləşməsinin tarixi təcəssümü olub. O vurğulayıb ki, müstəqilliyin qorunub saxlanılması və möhkəmləndirilməsi Ümummilli Lider Heydər Əliyevin adı ilə sıx bağlıdır. Ulu Öndərin müəyyənləşdirdiyi siyasi kurs bu gün Prezident İlham Əliyev tərəfindən uğurla davam etdirilir, Azərbaycan beynəlxalq nüfuzunu daha da artırır, dövlət suverenliyini və ərazi bütövlüyünü möhkəmləndirir.
Fidan Hüseynova, həmçinin Yeni Azərbaycan Partiyasının VIII Qurultayının əhəmiyyətinə toxunaraq bildirib ki, qurultayda qarşıya qoyulan vəzifələr partiyanın fəaliyyətinin müasir dövrün tələblərinə uyğun qurulması, təşkilati işin gücləndirilməsi və cəmiyyətlə əlaqələrin daha da möhkəmləndirilməsi baxımından mühüm əhəmiyyət daşıyır. Qeyd edib ki, Prezident İlham Əliyevin rəhbərliyi ilə həyata keçirilən siyasətin uğurla davam etdirilməsi, milli maraqların qorunması, dövlətçilik dəyərlərinin təbliği və gənc nəslin vətənpərvərlik ruhunda tərbiyəsi partiya fəaliyyətinin əsas istiqamətlərindəndir. Sədr vurğulayıb ki, müstəqilliyimizin qorunması və gələcək nəsillərə ötürülməsi hər bir vətəndaşın üzərinə mühüm məsuliyyət qoyur.
Çıxış edən Dövlət Sosial Müdafiə Fondunun Quba Rayon Şöbəsinin direktoru Səbuhi Qazıyev və “Azərbaycan Respublikası Müharibə, Əmək və Silahlı Qüvvələr Veteranları Təşkilatı” İctimai Birliyinin Quba rayon şöbəsinin sədri, Vətən müharibəsi qazisi Ruslan Bədirov müstəqilliyin Azərbaycan xalqı üçün ən böyük tarixi nailiyyətlərdən biri olduğunu qeyd ediblər. Onlar dövlət müstəqilliyinin möhkəmləndirilməsində milli həmrəyliyin, vətənpərvərlik ruhunun və gənc nəslin dövlətçilik ənənələrinə bağlılığının vacibliyini vurğulayıblar. Çıxışlarda Azərbaycanın qazandığı uğurların, ərazi bütövlüyünün və suverenliyinin qorunmasının xalqımızın birliyinin və qətiyyətinin nəticəsi olduğu diqqətə çatdırılıb.
Sonda Yeni Azərbaycan Partiyasının Himni səsləndirilib.