Sentyabrın 30-da Milli Məclisin üçüncü çağırış sonuncu sessiyası keçiriləcək

Üçüncü çağırış Milli Məclisin sonuncu payız sessiyası öz işinə sentyabrın 30-da başlayacaq. Parlamentin mətbuat xidmətinin "Səs"ə verdiyi məlumata görə parlamentin komitələri sentyabrın 15-də fəaliyyətə başlayacaq. Komitələrdə payız sessiyasının gündəliyinə çıxarılacaq qanun layihələrinə baxılacaq, iş planı müəyyən ediləcək. Payız sessiyasında müzakirə olunacaq əsas sənədlərdən biri "Azərbaycan Respublikasının 2011-ci il dövlət büdcəsi haqqında" Qanun layihəsi və büdcə paketinə daxil olan digər sənədlər olacaq. Bununla yanaşı, sessiya dövründə bir sıra qanunlara əlavələrin və dəyişikliklərin ediləcəyi, beynəlxalq sənədlərin təsdiqlənəcəyi də gözlənilir.