Ədliyyə Nazirliyinin əməkdaşları Heydər Əliyev Fondunda olublar

Dünən Ədliyyə Nazirliyinin əməkdaşları Heydər Əliyev Fondu ilə tanış olublar. Ulu öndər Heydər Əliyevin anadan olmasının 87-ci ildönümü ilə bağlı keçirilən tədbirdə qonaqlara Fondun fəaliyyəti haqqında ətraflı məlumat verilib. Bildirilib ki, Azərbaycan xalqının ümummilli liderinin xatirəsinə ehtiram əlaməti olaraq yaradılan Fondun məqsədi görkəmli siyasi xadim Heydər Əliyevin zəngin dövlətçilik və siyasi irsini öyrənmək, Azərbaycanın sosial-iqtisadi, mədəni tərəqqisinə yönələn genişmiqyaslı fəaliyyəti barədə gələcək nəsillərdə, xarici qonaqlarda əyani təsəvvür yaratmaq, ölkəmizin mədəniyyəti və tarixinin geniş təbliği ilə əlaqədar aparılan işlərə kömək göstərməkdir.
Ümummilli liderin şəxsi arxivindən götürülən eksponatlar qonaqlarda zəngin təəssürat yaradıb. Heydər Əliyevin dövlətçiliyə sonsuz sədaqəti və millətsevərliyi sözün həqiqi mənasında nəsillərə örnəkdir. Ulu öndərin müxtəlif dövrlərdə respublikamıza rəhbərlik etdiyi illərdə çəkilmiş fotolar və qiymətli eksponatlar şərəfli ömrün salnaməsini xatirələrdə bir daha canlandırır. Məlumat verilib ki, zəngin, şərəfli və mənalı ömrünün 25 ilini dövlət təhlükəsizlik orqanlarında xidmətə həsr edən ümummilli lider dövlətçiliyimizin möhkəmlənməsində, xalqımızın milli maraqlarının və mənafelərinin qorunmasında böyük işlər görüb.
Ulu öndər şərəfli ömür yolunu bütünlükdə doğma Vətəninin tərəqqisi işinə həsr edib. Azərbaycanın dünəni, bu günü və sabahı Heydər Əliyevin ölməz adı və əbədiyaşar ideyaları ilə bağlıdır. Fondla tanışlıqdan sonra nazirliyin əməkdaşları dahi şəxsiyyətin həyat və fəaliyyəti haqqında "Böyük ömrün anları" filminə baxıblar.