31 Mart Azərbaycanlıların Soyqırımı Günü YAP Qaradağ rayon təşkilatı gənclər birliyinin fəallarının hazırladığı Azərbaycanlıların tarixən məruz qaldığı və erməni vəhşiliyini özündə əks etdirən "Qan yaddaşımız" adlı 500 dən artıq buklet çap olunub. Bu bukletlər Qaradağ rayon icra hakimiyyətinin Sahil qəsəbəsində təşkil etdiyi ictimaiyyətin bütün təbəqələrinin iştirak etdiyi 31 mart azərbaycanlıların soyqırımı qurbanlarının anma mərasimində və digər insanların sıx olduğu yerlərdə paylanılıb.
YAP Qaradağ rayon təşkilatının gənclər birliyinin sədri Əlizamin Məmmədov keçirilən tədbirlə bağlı "Səs" qəzetinə açıqladı: "1918-ci ildə ermənilər Bakı quberniyasının Bakı, Şamaxı Quba şəhəri, Göyçay qəzası, Qarabağ, Zəngəzur, İrəvan və Naxçıvanda azərbaycanlılara qarşı talanlar, yanğınlar, terror və digər zorakılıq aktları həyata keçiriblər. Ermənilərin törətdiyi soyqırımı nəticəsində on minlərlə dinc azərbaycanlı əhali - qadın, uşaq, qoca yalnız milli mənsubiyyətlərinə görə vəhşicəsinə qətlə yetirilib, yaşayış yerləri yandırılıb, talan edilib, milli mədəniyyət abidələrimiz, dini ibadət yerləri dağıdılıb. Azərbaycanın ayrı-ayrı bölgələrində olduğu kimi, ermənilər Bakıda da kütləvi qırğınlar törədiblər. 1918-ci il martın 28-də ermənilərin başladığı soyqırımı aktı üç gün davam edib. Bu üç gün ərzində təkcə Bakıda otuz mindən çox dinc əhali ermənilər tərəfindən xüsusi amansızlıqla qətlə yetirilib. Daşnaklar həmin vaxt Bakıda azərbaycanlı əhalinin 400 milyon manatlıq daş-qaş və əmlakına sahib çıxıb, bir çox ziyarətgahları və tarixi abidələri dağıdıb, yerlə-yeksan ediblər. 1918-ci ilin yazında Bakı şəhərində və Azərbaycan qəzalarında daşnak-bolşevik birləşmələrinin azərbaycanlılara qarşı törətdikləri vəhşiliklər soyqırımı kimi qiymətləndirilir.
Ümummilli liderimiz Heydər Əliyevin 27 mart 1998-ci ildə imzaladığı "31 mart Azərbaycanlıların Soyqırımı haqqında" fərmanı ilə 31 mart Azərbaycanlıların Soyqırımı Günü elan edilir.
Bu soyqırımla bağlı biz gənclər də belə bir bukletləri hazılamanda məqsədimiz xalqımızın başına gətirilən müsibətlərin gənclər tərəfindən daima nifrətlə qarşılandığını bildirməklə yanaşı, tarixi düşmənimiz olan ermənilərin törətdikləri bu çirkin əməllərini ictimaiyyətin nəzərinə çatdırmaq və gələcək nəsillərə ötürməkdir. Həmçinin, hər sahədə olduğu kimi, gənclərin də bu sahədə ölkə Prezidenti İlham Əliyevin tarixi həqiqətlərin dünya ictimaiyyətinə çatdırılması istiqamətində apardığı siyasəti dəstəklədiyimizi bir daha nümayiş etdirməkdir".
