Bu gün ABŞ və Azərbaycanın birlikdə olması çox mühümdür

- ABŞ Konqresinin çoxsaylı üzvləri bölgədə Azərbaycanın göstərdiyi cəsarət və iradəni yüksək qiymətləndirirlər. Təbii ehtiyatların işlənilməsi bir sıra mühüm məsələlərdə, o cümlədən, beynəlxalq və enerji təhlükəsizliyi üzrə Birləşmiş Ştatlarla Azərbaycanın əməkdaşlığını önəmli edirik.

Mən bir neçə il əvvəl Rusiyada baş verən Beslan faciəsi zamanı oraya səfər etmişdim. Terror bəşəriyyətə təhdid yaratdığına görə, biz bölgədəki bütün dostlarla birgə olmalıyıq.

Azərbaycan ətrafdakı digər dövlətlərlə müqayisədə müstəqillik qazandıqdan bəri inanılmaz uğurlar və irəliləyiş əldə etmişdir. Tarixi xatırlasaq, Azərbaycanı və Bakını ələ keçirmək hələ faşistlərin dövründə Hitler üçün arzuolunan bir məqsəd idi. Bu gün Azərbaycan, şübhəsiz, Birləşmiş Ştatların qlobal enerji təhlükəsizliyində ən vacib tərəfdaşlarından biridir.

Azərbaycan digər enerji təchizatçılarına alternativ kimi ABŞ-ın milli maraqları üçün çox əhəmiyyətlidir. Bilirəm ki, neftlə yanaşı, sizin böyük qaz ehtiyatlarınız da vardır. "Şahdəniz" yatağı dünyanın ən böyük qaz yataqları sırasındadır. Sizin neft-qaz kəmərlərini şaxələndirmək planlarınız olduqca əhəmiyyətlidir, çünki bununla enerji təminatı mənasında təkcə ABŞ-ın təhlükəsizliyini deyil, bizim müttəfiqlərin də təhlükəsizliyini möhkəmləndirmiş olursunuz. Ümid edirəm ki, bu planlar davamlı olaraq gerçəkləşəcəkdir. Xəzər hövzəsində enerji təhlükəsizliyi üzrə əməkdaşlıq bizim münasibətlərimizin əsas istiqamətidir. Bölgədə enerji dəhlizlərinin şaxələndirilməsində tutduğu mövqe Azərbaycanı strateji tərəfdaş və etibarlı müttəfiqə çevirir.

Mən bu konfransın bütün təşkilatçılarına minnətdarlığımı bildirirəm. Burada iştirak edənlərin bizim münasibətlərimizi öz işləri ilə möhkəmləndirəcəklərinə ümid edirəm. Bu gün ABŞ və Azərbaycanın birlikdə olması çox mühümdür. Çünki illər sonra bizim uşaqlarımız bu günün çətinlikləri ilə necə birgə mübarizə apardığımızla maraqlanacaqlar. Biz elə bir dövrdə yaşayırıq ki, terrorizm hamımıza təsir edir. Ona görə azadlığı və bəşəriyyəti sevənlərin birgə olması vacibdir.

Sonda qeyd edim ki, ABŞ-da Azərbaycana, xalqınıza, onun bölgədə nümayiş etdirdiyi cəsarətə rəğbət vardır. Ümid edirəm ki, biz gələcəkdə də birgə işimizi davam etdirərək, övladlarımıza daha azad və yaxşı həyat bəxş edə biləcəyik.