14 nömrəli tam orta məktəbdə YAP-ın VIII Qurultayından irəli gələn məsələlərə həsr olunmuş müşavirə keçirilib

Bu gün Yeni Azərbaycan Partiyası Nəsimi rayon təşkilatının üç ərazi partiya təşkilatının birgə müşavirəsi keçirilib. Müşavirə A. Mustafayev küçəsi 21 üzrə ərazi partiya təşkilatının akt zalında baş tutub. Müşavirəyə aşağıdakı ərazi partiya təşkilatları qatılıb:

A. Mustafayev küçəsi 21 üzrə (14 nömrəli tam orta məktəb);
A. Mustafayev küçəsi 20 üzrə (19 nömrəli tam orta məktəb);
A. Mustafayev küçəsi 30/15 üzrə (266 nömrəli tam orta məktəb).

Müşavirə Azərbaycan Respublikasının Prezidenti, Yeni Azərbaycan Partiyasının Sədri cənab İlham Əliyevin YAP-ın VIII Qurultayındakı nitqindən irəli gələn məsələlərə həsr olunub.

Tədbir Ulu Öndər Heydər Əliyevin və ölkəmizin ərazi bütövlüyü və suverenliyi uğrunda canlarından keçən şəhidlərimizin əziz xatirəsinin bir dəqiqəlik sükutla yad edilməsi ilə başlayıb. Sonra Azərbaycan Respublikasının Dövlət Himni səsləndirilib.

Müşavirəni 14 nömrəli tam orta məktəbin direktoru Rəfail Hüseynov aparıb. O, Partiya Sədrinin qurultaydakı nitqinin ölkəmizin ictimai-siyasi həyatında mühüm hadisə olduğunu vurğulayıb. Rəfail Hüseynov qeyd edib ki, VIII Qurultay Azərbaycanın ərazi bütövlüyünü və suverenliyini tam bərpa etməsindən sonra keçirilən ilk qurultaydır. O, dövlət başçısının ideoloji təxribatlara qarşı əsas sipərin təhsil və vətənpərvərlik olduğu barədə fikrini xatırladıb. Bu baxımdan gənc nəslin tərbiyəsində məktəblərin və müəllimlərin üzərinə böyük məsuliyyət düşdüyünü bildirib.

Daha sonra söz YAP Nəsimi rayon təşkilatının əməkdaşı Günay Mehdiyevaya verilib. Günay Mehdiyeva Partiya Sədrinin qurultayda müəyyən etdiyi əsas vəzifələrdən danışıb. Onların sırasında hərbi gücün artırılmasını, ideoloji təhlükəsizliyin təmin olunmasını, müstəqil xarici siyasətin davam etdirilməsini və «Böyük Qayıdış»ın sürətləndirilməsini qeyd edib. O, Partiya Sədrinin YAP fəalları qarşısında qoyduğu tapşırıqları da diqqətə çatdırıb. Bunlar ideoloji işin formal yanaşmalardan uzaq, müasir formatda qurulması və Azərbaycan reallıqlarının hər bir vətəndaşa çatdırılmasıdır.

Müşavirənin sonunda iştirakçılar Prezident İlham Əliyevin VIII Qurultayda müəyyən etdiyi vəzifələrin icrasında fəal iştirak edəcəklərini bildiriblər.

Tədbir Yeni Azərbaycan Partiyasının Himni ilə yekunlaşıb.