İrəvanın yeni siyasi kursu kimə qarşıdır? - ANALİZ

Ermənistan Azərbaycanla sülh müqaviləsinin ildönümünü qeyd edir. Paşinyan Qərbin dəstəyini təmin etmək ümidi ilə Bakı və Ankara ilə münasibətləri yaxşılaşdırmağa çalışır. O, ölkəni təcriddən çıxarmaq və Şərqlə Qərb arasında körpü etmək istəyir. Bu barədə Livanın An Nahar nəşri xəbər verir.

Ermənistanın baş naziri bir il əvvəl İrəvan və Bakı arasında əldə edilən sülh müqaviləsinin artıq "görünən və hiss olunan" hala gəldiyini bildirib və bunu ölkə üçün tarixi bir dönüş nöqtəsi adlandırıb. Nikol Paşinyan çıxışında qonşu Azərbaycanla münaqişədə məğlubiyyətindən və Rusiyanın İrəvana lazımi dəstəyi vermədiyinə görə tənqidindən sonra ölkənin yeni xarici siyasət kursunu açıqlayıb. 2018-ci ildə Serj Sarkisyan hökumətinin istefasına səbəb olan etirazlara rəhbərlik edən şəxs indi Ermənistana hərbi məğlubiyyət gətirən Türkiyə-Azərbaycan ittifaqına qarşı əvvəlki düşmənçilik ritorikasından istifadə etmədən danışır. Bunun əvəzinə, o, Qərb ölkələrinin dəstəyini təmin etmək və onların maraqlarını nəzərə almaq ümidi ilə onlarla münasibətləri yaxşılaşdırmağa çalışır. Bu, Rusiyanı qəzəbləndirir və hərbi məğlubiyyətindən sonra Nikol Paşinyan ölkəsini dəyişikliklərə aparacaq bir növ milli qəhrəman olmağa çalışdığı təəssüratı yaradır.

Sülh müqaviləsi yeni bir başlanğıcdır

Paşinyan qonşuları ilə, xüsusən də Ermənistanı Avropa ilə birləşdirən ölkələrlə münasibətlərini inkişaf etdirməyə başlayıb. Onun məqsədi təcridə son qoymaqdır. 8 avqust 2025-ci ildə ABŞ-ın vasitəçiliyi ilə Ermənistan və Azərbaycan arasında əldə edilən sülh müqaviləsinin ildönümündə baş nazir iki ölkə arasında sülhün artıq "görünən və hiss olunan" olduğunu bəyan edib. O, müqaviləni Ermənistan üçün tarixi bir dönüş nöqtəsi adlandırıb. "7 iyunda keçirilən parlament seçkilərində erməni seçiciləri bir daha sülhə dəstəklərini nümayiş etdirdilər", - deyə Paşinyan sülh prosesinin hələ də davam etdiyini vurğulayıb.

O, 8 avqustu Ermənistan tarixində "dönüş nöqtəsi" adlandırıb. Onun sözlərinə görə, razılaşmadan əvvəl ölkə "durğunluq" vəziyyətində idi, amma indi onun qarşısında "məhdudiyyətsiz perspektivlər" açılır. Yeni müharibə istisna olunur.

Ermənistanın baş naziri sanki ölkə artıq əvvəlki siyasətinə qayıtmaq istəmirmiş kimi danışmağa başlayıb. İndi o, Azərbaycan və Türkiyənin təcrübəsindən öyrənməyə və münaqişələrə qarışmadan dünyanın aparıcı gücləri arasında öz yerini tapmağa çalışır.

Qırğızıstanın Çolpon-Ata şəhərində keçirilən AİB Hökumətlərarası Şurasının genişləndirilmiş iclasında Paşinyan bildirib ki, İrəvan Avrasiya İqtisadi Birliyinə (AİB) və Avropa Birliyinə eyni vaxtda üzvlüyün mümkün olmadığını başa düşür. Onun sözlərinə görə, Ermənistanın Aİ-yə daxil olması ilə bağlı referendumun vaxtı hələ çatmayıb və məsələni indi səsverməyə çıxarmaq yersiz olardı.

Moskva İrəvanın hərəkətlərini diqqətlə izləyir. Rusiya Təhlükəsizlik Şurasının sədr müavini Dmitri Medvedev bildirib ki, Qərb Ermənistanı Rusiyaya qarşı qoyur və Brüssel İrəvan onun üçün maraqsız olan kimi ona arxa çevirəcək.

Paşinyan Ermənistanı Şərq və Qərb arasında bir növ əlaqələndirici kimi təqdim etməyə çalışır. O, AİB ölkələri ilə əməkdaşlığın inkişaf etdirilməsinin Ermənistanın xarici və iqtisadi siyasətinin prioriteti olaraq qaldığını və yeni hökumətin proqramına daxil edildiyini vurğulayıb. Eyni zamanda, Ermənistan lideri Ermənistanın Qərblə əlaqələrini gücləndirməsi səbəbindən Ermənistan ixracına məhdudiyyətlər tətbiq edən Rusiya ilə münasibətləri gərginləşdirmək istəmir. Lakin Nikol Paşinyanın Bakı və Ankara ilə dialoqa hazır olması, onların ərazilərindən Qərb ölkələri ilə əlaqələri inkişaf etdirmək üçün istifadə etmək istəyini göstərir. ABŞ prezidenti Donald Trampın vasitəçiliyi ilə sülh müqaviləsinin imzalanmasının ildönümü münasibətilə Ermənistan xalqına müraciətində Paşinyan bildirib: "TRIPP (Trampın Beynəlxalq Sülh və Rifaha Yolu) layihəsi Vaşinqtonda keçirilən görüşün əsas nəticələrindən biri olub. Yaxın gələcəkdə bu, Ermənistanın təcriddən çıxmasına və Ermənistan və regional iqtisadiyyatlar üçün inkişafın vacib hərəkətverici qüvvəsinə çevrilməsinə kömək edəcək. Bu layihə Ermənistan və Azərbaycanın bir-birini maneə kimi deyil, tərəfdaş və qonşu kimi qəbul etməsinə kömək edəcək. Biz tezliklə TRIPP layihəsinin praktiki icrasına başlayacağıq və bu, böyük regional və beynəlxalq tədbir olacaq”.

V.VƏLİLİ