Yasamal rayonunda “Heydər Əliyev İli” ilə əlaqədar silsilə tədbirlər davam edir

Azərbaycan Milli Elmlər Akademiyasının (AMEA) Mərkəzi Elmi Kitabxanasında (MEK) “Heydər Əliyev və Azərbaycanda kitab mədəniyyəti” adlı lektoriya keçirilib. Lektoriya YAP Yasamal rayon təşkilatı, AMEA Azad Həmkarlar İttifaqı və MEK-in birgə təşkilatçılığı ilə baş tutub. Tədbirdə YAP Yasamal rayon təşkilatının sədri Bəxtiyar Nəbiyev, AMEA Azad Həmkarlar İttifaqının sədri Habil Qurbanov, AMEA Mərkəzi Elmi Kitabxananın baş direktoru, “H.Cavid pr.129” ünvanı üzrə ərazi partiya təşkilatının sədri Məmməd Əliyev, YAP Yasamal rayon təşkilatının məsul əməkdaşları, AMEA-nın Rəyasət Heyəti aparatının şöbə müdiri, Hüseyn Hüseynov, BDU informasiya və sənəd menecmenti fakultəsinin dekanı Ələmdar Cabbarlı, BDU Elmi Kitabxanasının müdiri Nigar İsmayılova, “Elm” nəşriyyatının direktoru, Səbuhi Qəhrəmanov, Prezident Kitabxanasının əməkdaşı Kəmalə Məmmədova, M.F.Axundov adına Azərbaycan Milli Kitabxanasının şöbə müdiri Aygün Koçak və ərazi üzrə partiya təşkilatının üzvləri iştirak edib.Tədbirin rəsmi hissəsində öncə AMEA Mərkəzi Elmi Kitabxanasının inzibati binasında yerləşən ulu öndər Heydər Əliyevin büstü önünə gül dəstələri düzülüb, əziz xatirəsi dərin ehtiramla yad edilib. Tədbir müstəqil Azərbaycan dövlətinin banisi ümummilli lider Heydər Əliyevin və Azərbaycan Respublikasının müstəqilliyi və ərazi bütövlüyü uğrunda canından keçən şəhidlərimizin əziz xatirəsi bir dəqiqəlik sükutla yad edilməsi ilə başlayıb.Lektoriyanı giriş sözü ilə açan AMEA Mərkəzi Elmi Kitabxananın baş direktoru, “H.Cavid pr.129” ünvanı üzrə ərazi partiya təşkilatının sədri Məmməd Əliyev Prezident İlham Əliyevin 2023-cü ilin ölkədə “Heydər Əliyev İli” elan edilməsi haqqında imzaladığı Sərəncamı xatırladaraq lektoriyanın məhz bu ilin çərçivəsində keçirildiyini diqqətə çatdırıb. M.Əliyev qeyd edib ki, ümummilli lider Heydər Əliyevin hər sahəyə olduğu kimi, elmə, təhsilə, kitabxanaya, kitaba qayğısı heç zaman diqqətdən kənarda qalmamışdır. “Mərkəzi Elmi Kitabxananın yeni binası Prezident İlham Əliyevin 2011-ci il 29 aprel tarixli Sərəncamına əsasən tikilmişdir. Bu, Ulu öndər Heydər Əliyev siyasətinin layiqli davamçısı Prezident İlham Əliyevin həmin sahəyə olan qayğısının nəticəsidir. Azərbaycan var olduqca bu tarixi şəxsiyyətin bizlərə ərmağan etdiyi zəngin dövlətçilik irsi daim yaşayacaq və həyat fəlsəfəsi hər zaman diqqət mərkəzində olacaqdır” – deyə M.Əliyev qeyd edib. Məmməd Əliyev çıxışında MEK-də Heydər Əliyev irsi haqqında nəşrlərin də getdikcə artdığını vurğulayıb.YAP Yasamal rayon təşkilatının sədri Bəxtiyar Nəbiyev Ulu öndərin siyasi fəaliyyəti ilə bağlı geniş məruzəsi zamanı ölkənin bugünki inkişafının təməlinin məhz 1969-1982-ci illərdə Heydər Əliyev tərəfindən qoyulduğunu, Ulu öndərin parlaq siyasi zəkası və istedadı sayəsində yeni Azərbaycanı gələcəyə aparan yolları müəyyən etdiyini vurğulayıb. “Ümummilli lider Heydər Əliyevin həyata keçirdiyi məqsədyönlü siyasətinin, sarsılmaz iradəsinin və ciddi səylərinin nəticəsi olaraq 1978-ci il Azərbaycan SSR-nin Konstitusiyasına “Azərbaycan SSR-nin dövlət dili Azərbaycan dilidir” maddəsi daxil edilmişdir”- deyə Bəxtiyar Nəbiyev qeyd edib. YAP Yasamal rayon təşkilatının sədri, həmçinin MEK-in ərazi partiya təşkilatları arasında ilk sıralarda olduğunu, bunun əyani nəticəsi kimi son günlərdə daha bir qrup əməkdaşın partiya sıralarına qoşulmaq üçün ərizə ilə müraciət etdiyini də diqqətə çatdırıb.AMEA-nın Rəyasət Heyəti aparatının Elm və təhsil şöbəsinin müdiri Hüseyn Hüseynov AMEA-nın prezidenti, akademik İsa Həbibbəylinin salamını çatdıraraq tədbir iştirakçılarına uğurlar arzulayıb. Çıxışçı, Ulu öndərin qaçqın və məcburi köçkünlərə, şəhid ailələrinə daim diqqət və qayğı ilə yanaşdığını, bir şəhid qardaşı olaraq Prezident İlham Əliyevin, birinci xanım Mehriban Əliyevanın da fəaliyyətlərində bu diqqəti gördüyünü xüsusi vurğulayıb.AMEA Azad Həmkarlar İttifaqının sədri Habil Qurbanov, BDU informasiya və sənəd menecmenti fakultəsinin dekanı Ələmdar Cabbarlı, BDU Elmi Kitabxanasının müdiri Nigar İsmayılova, “Elm” nəşriyyatının direktoru Səbuhi Qəhrəmanov, Prezident Kitabxanasının əməkdaşı Kəmalə Məmmədova, M.F.Axundov adına Azərbaycan Milli Kitabxanasının Elmi-tədqiqat və metodik təminat şöbəsinin müdiri Aygün Koçak və digər çıxış edənlər kitabxanaçılıq fondlarının genişləndirilməsinin, nəşriyyatların inkişaf etdirilməsi və maddi təchizat baxımından gücləndirilməsinin Ulu öndər siyasətinin əsas nəticəsi olduğunu vurğulayıblar.Tədbirdə MEK-in Heydər Əliyev və Azərbaycan dövlətçiliyi şöbəsinin müdiri Günel Bağırova-Hüseynovanın “Ulu öndər Heydər Əliyevin irsində kitab mədəniyyəti” adlı məruzəsi dinlənib.Sonda ulu öndər Heydər Əliyevin zəngin siyasi irsini özündə əks etdirən nəşrlərdən ibarət sərgiyə baxış keçirilib.

Nəzakət